যাত্রা 21
21
ইস্রায়েলীয় চাগর্ আর চাগরানীগুনোর দাবী
1সে পরেদি লগেপ্রভু মোশিরে কলঅ, ইস্রায়েলীয়গুনো মুজুঙোত্ তুই মর্ এই বেক্ সুদোমানি তুলি ধুরিবে।
2চাগর্ ইজেবে যুনি কনঅ ইব্রীয় মান্জ্যরে তুমি কিনি নেযঅ, সালে ছয় বজর্ সং তে তমার অধীনোত্ থেইনে কাম্ গুরিবো, মাত্তর্ সাত্ বজর বিদি গেলে তাত্তুন্ কিজু নেযেইনে এম্নে তারে ইরি দিয়্যে পড়িবো। 3যুনি তে গায়্ গায়্ তমা ইদু এই থায়্ সালে তে গায়্ গায়্ যেবগোই, মাত্তর্ যুনি তে তার্ মোক্কোরেয়ো সমারে আনি থায়্ সালে তারেয়ো তা সমারে যেবাত্তে দিয়্যে পড়িবো। 4সেই চাগর্বোর্ মেলা যুনি তা গিরোজ্সোই গুরি দি থায়্ আর তার্ ঝি-পূঅ ওই থান্ সালে সে মোক্কো আর ঝি-পূঅগুন গিরোজ্সো ইদু থেবাক্; তে গায়্ গায় নিগিলি যেবঅ। 5মাত্তর্ যুনি সেই চাগর্বো উজু গুরি জানেই দে, তে তার্ গিরোজ্, তার্ মোক্ আর পূঅ-ঝিগুনোরে কোচ্পায়্ আর তারারে ফেলেই যেবার্ আওজ্ তার্ নেই, 6সেক্কে তা গিরোজ্সো তারে গোজেন ইদু আঝিল্ গুরিবো। সে পরেন্দি দোর্ বা দোরানর্ ফ্রেমান ইদু তারে নেযেইনে ড্রিল্ মেশিন্দোই তার্ কানান্ ফুদো গুরি দিবো। সেক্কে তে সারা জীংকানিবর্ তার্ গিরোজসোর্ চাগর্ ওই থেবঅ।
7যুনি কনজনে তা ঝিবোরে চাগরানী ইজেবে বিজি দুয়োন্ সালে চাগর ধোক্ক্যেন গুরি সেই চাগরানীবোরে ইরি দিই ন-পারিবো। 8মাত্তর্ যে গিরোজ্সো তারে নিজোত্যেই বেঈ লোইয়্যে তে যুনি তা উগুরে হুজি ওই ন-পারে সালে টেঙার্ বদলে তারে ইরি দিয়্যে পুরিবো। অন্য জাদর্ কনঅ মান্জ্য ইদু তারে বিজি দিই ন-পারিবো, কিত্তে তা উগুরে গিরোজ্সো তার্ যিয়েন্ গুরিবার্ সিয়েন ন-গরে। 9যুনি গিরোজ্সো তার্ পূঅবোত্তেই তারে বেঈ লোয়্ থায়্ সালে নিজোর ঝি ধোক্ক্যেন বেক্ অধিকারানি তারে দিয়া পুরিবো। 10সেই গিরোজ্সো সেই চাগরানিবোরে মোক্ লনার্ পরেন্দিয়ো যুনি অন্য কাররে লয়্ তো তে তার্ হেবার্-থেবার্, কাবড়-চুগোর্ দেদে বাধ্য থেবঅ আর কিয়্যেত্ তার্ যিয়েনি পেবার্ সিয়েনি তারে দিয়্যে পরিবো। 11তে যুনি এই বেক্ কামানি ন-গরে সালে কনঅ টেঙা ন-লোইনেই তারে যেবাত্তে দিয়্যে পরিবো।
আঘাত গুরিয়্যেবোর্ সাজা
12কনঅ মান্জোরে আঘাত্ গুরিবার্ কারনে যুনি তার্ মরণ অয়্ সালে আঘাত গুরিয়্যেবোরে হামাক্কায়্ মারে ফেলা পুরিবো। 13মাত্তর্ খুন গুরিবার্ সল্লা যুনি তার্ ন-থায়্, যুনি ইয়েন্ অদাদৎ ঘুদি যেইয়্যে কনঅ ঘটনা অয়্ যেনে মুই মানা ন-গরং, মাত্তর্ তে এন্ এক্কান জাগাত্ ধেই যেই পারিবো যিয়েন মুই তমাত্যেই ঠিগ্ গুরি দিম্। 14যুনি কনজনে আগেত্তুন্ ধুরি চিন্তে-ভাবনালোই আওজ্ গুরিনে অন্য কাররে মারে ফেলেইনে ডালিপূজোবো ইদু যেইনে আশ্রয় লয়, সালে সিয়োত্তুনো তারে ধুরি আনিনে মারে ফেলা পুরিবো।
15বাবরে বা মাবোরে যে আঘাত গরে তারে হামাক্কায়্ মারে ফেলা পুরিবো।
16যুনি কনজনে কাররে চুর্ গুরি আনিনেই বিজি দুয়োন্ বা যুনি তারে তা লগে পাহ্ যায়, সালে হামাক্কায়্ তারে মারে ফেলা পুরিবো।
17যিবের্ কধালোই মা-বাব উগুরে অশ্রদ্ধা থায়্ তারে হামাক্কায়্ মারে ফেলা পুরিবো।
18-19দ্বিজন মান্জ্যে কোল্ বাজেদ যেইনে যুনি একজন আরেক জনরে এন্জান্ গুরি পাত্তর্ বা ঘুষি মারে, যিয়েনত্তে তে মুরি ন-গেলেয়ো বিচ্ছনত্ পড়ি থায়্ আর যেরেন্দি গম্ ওইনে বাইরে যেইনে তাত্তুন্ লুদিগোত্ ভর্ দিইনে আদা-উদো গরা পড়ে, সালে সেই আঘাত গুরিয়্যেবোরে মরণর সাজা-দেনা ন-চুলিবো; মাত্তর্ যিবেরে আঘাত্ গরা ওইয়্যে তার্ সময়্ বর্বাদ্ অনার্ কারনে আঘাত গুরিয়েবোত্তুন ক্ষোতিপূরোণ দিয়্যে পুরিবো আর তারে পুরো গম্ গুরি তুলিবার্ বেবস্থা গরা পুরিবো।
20যুনি কনজনে তার্ চাগর্ বা চাগরানিবোরে লুদিক্কোয়্ মারণ্ আর সিয়েনর্ কারনে তে মুরি যায় সালে আঘাত গুরিয়্যেবোরে সাজা-দিয়্যে পুরিবো। 21মাত্তর্ যুনি তে সে পরেদি দ্বি একদিন্ বাঁজি থায়্ সালে আঘাত গুরিয়্যেবোরে সাজা-দেনা ন-চুলিবো, কিত্তে তে তার্ নিজোর সোম্বোত্তি।
22পিদেপিদি গুরিবাত্তে যেইনে যুনি কনজনে কনঅ পিদিলী মিলেরে এমন গুরি আঘাত্ গরন্ যেনে তার পেদ ভিদিরে পুঅবো বর্বাদ্ ওই যায় মাত্তর্ আর কনঅ ক্ষোতি ন-অয়, সালে সেই মিলেবোর্ নেক্কোর্ দাবি আর বিচের্ গুরিয়্যেগুনে যিয়েন্ ঠিগ্ গুরি দিবাক্ সেই ধগে আঘাত গুরিয়্যেবোত্তুন্ হামাক্কায়্ ক্ষোতিপূরোণ দিয়্যে পুরিবো। 23যুনি ইয়েন্বাদে অন্য কনঅ ক্ষোতি অয়্ সালে এমনভাবে তারে সাজা-দিয়্যে পুরিবো, যেন পরাণর্ বদলে পরাণ, 24চোগোর বদলে চোগ, দাদর্ বদলে দাদ, আদর্ বদলে আত্, টেঙর্ বদলে টেঙ্; 25পুড়োনার্ বদলে পুড়োনা, ঘার্ বদলে ঘা আর রগ্ বুদি দেনার্ বদলে রগ্ বুদি দেনা।
26যুনি কনজনে তার্ চাগর্ বা চাগরানীরে কনঅ চোগোত্ আঘাত্ গুরিলে সিবে বর্বাদ্ ওই যায়্ সালে সিয়েনর্ বদলে তারে এম্নে যেবাত্তে অনুমতি দিয়্যে পুরিবো। 27যুনি তে আঘাত্ গুরিনে তা দাত্তুন্ ফেলেই দে সালে তার্ বদলেয়ো তারে এম্নে যেবাত্তে দিয়্যে পুরিবো।
28যুনি কনঅ গোরুয়ে বেজামারিনে কনঅ মরদ্ বা মিলেরে মারে ফেলায় সালে পাত্তর্ দলা মারিনে সে গোরুবোরে হামাক্কায়্ মারে ফেলা পুরিবো। সে গোরুবোর্ য়েরাগান্ কনজনে ন-হেবা আর গোরুর্ গিরোজ্সোয়ো কনঅ সাজা-ন-পেবঅ। 29মাত্তর্ গোরুবোর্ যুনি বেজামারেদে অভ্যেস্ থায় আর তা গিরোজ্সোরে উজিয়ার্ গুরি দেনার্ পরেন্দিয়ো তে তারে আক্সো ন-রাগায়্ আর সে গরুবো কনঅ মরদ্ বা মিলেরে মারে ফেলায়্, সালে পাত্তর্লোই দলা মারিনে সে গরুবোরে মারে ফেলা পুরিবো আর গিরোজ্সোরেয়ো মারে ফেলা পুরিবো। 30মাত্তর্ যুনি গিরোজত্তুন্ কনঅ ক্ষোতি পূরোণ দাবি গরা অয় সালে সেই ক্ষোতি পূরণর্ টেঙা দিইনে গিরোজ্সো তার্ নিজোর জীংকানিগান্ রোক্ষ্যে গুরি পারিবো। 31সে গরুবো যুনি কনঅ পূঅ বা ঝিরে বেজা মারিনে মারে ফেলায়্ সালে তাত্তেয়ো এক্কুই সুদোম। 32কনঅ গোরু যুনি কনঅ চাগর্ বা চাগরানিরে মেরেইনে মারে ফেলায় সালে তা গিরোজ্সোরে সে গোরুর্ গিরোজ্সো ত্রিশ কট্টা রূবো দিবো, আর সেই গোরুবোরে পাত্তর্লোই দলা মারিনে মারে ফেলা পুরিবো।
33যুনি কনঅ ভূইয়োর্ গিরোজে তার্ ভুয়োর্ কনঅ গাদর্ মুয়োন্ খুলি রাগায়্ বা কনঅ গাত্ খুড়িনেই গমেদালে তার্ মুয়োন্ নাঢি ন-দিইনে রাগায়্ আর সেই গাত্তোত্ যুনি কনঅ গোরু বা গাধা পড়ি যান্, 34সালে তাত্তুন্ সিয়েনর ক্ষোতি পূরোণান্ দিয়্যে পুরিবো। সে গোরু বা গাধার্ গিরোজ্সোরে সে ক্ষোতি পূরোণুন্ দিয়্যে পুরিবো; সেক্কে মরা গোরু বা গাধাবো তার্ ওই যেবঅ।
35কনঅ মান্জ্যর্ গোরুবো যুনি অন্য কনঅ মান্জ্যর্ গোরুরে বেজামারিনে মারে ফেলায়, সালে জেদা গরুবোরে বেজিনে সে টেঙাগুন্ আর মরা গরুবো তারা দ্বিজনে সমান গুরি ভাগ গুরি নিবাক্। 36মাত্তর্ যুনি আগেত্তুন্ ধুরি জানা থায়্, গরুবো বেজামারে তো তার্ গিরোজ্সো তারে আক্সোই ন-রাগায়্ সালে সেই মালিগোত্তুন্ গোরুর্ বদলে গোরু দিয়্যে পুরিবো আর মরা গোরুবো তার্ ওই যেবঅ।
S'ha seleccionat:
যাত্রা 21: CBT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright © 2021 Bangladesh Bible Society