Amaköri gha Bhatomu 3
3
Bheetero ˆakamuhöri omubhëëru kwo riina re Yesu
1Orosiko rumu, Bheetero na Yohana mbaare bharaghe Mwisëngërö, eriibhagha re ghusabha Eryobha re chaasa kende che mwishe. 2Mwisëngërö hayo, haghuhe ne ekehita kino ghekobherekeru Eghichömu, naare‑ho omooto uno are omubhëëru korwera kwibhoru kooche. Chaasiko choose naare ararëëtu na abhaato na ghotooru haghuhe ne ekehita kiyo, kubha asabhe chambiiri kwo bhaato bhano ꞉bhaare bharasöha Mwisëngërö.
3Hano omooto uyo abharooche Bheetero na Yohana ˆbhaghatingʼi ghusöha Mwisëngërö, akabhasabha bhamuhë chambiiri. 4Niho Bheetero na Yohana bhakamoomeri amiisho, akamara Bheetero akamobhoorera, “Tumööhërëri itu!” 5Akabhamööhërëri, ino ariitëngʼëra kubha mbaare ne egheghiro ghe komuha.
6Ibheere Bheetero akamobhoorera, “Ntighöötë chambiiri,#3:6 Ekeyunaani ngekobhugha, chambiiri hamu asahaabhu. Egheteemoro keeche n‑chambiiri. amare neenyi na angʼana ino neghotora ghoghukörëra, nayo niyo ino. ˆNeghakobhoorera kwo riina re Yesu Kirisito o Nasareeti, imeerera ughëndë!” 7Niho Bheetero akamughööta okubhökö gho kwiro akamwimeereri. Hayo hayo amaghoro ne ebhyemo bheeche bhe maghoro bhekabhöna changuru. 8Akiimeerera bhwango, aghasëëma ghughënda omwene. Aghasöha Mwisëngërö haghirohamu na Bheetero na Yohana, ino aratuumatuuma na koritöghösi Eryobha. 9Abhaato bhoose bhakamorighi araghënda na koritöghösi Eryobha. 10Hano bhamënyiri kubha n‑omubhëëru uno are ariikara arasabhasabha chambiiri mo‑kehita ke Risëngërö kino ghekobherekeru Eghichömu, bhoose bhakaroghoora na kuhagha chwee korighi angʼana ino emorweriire. 11Eriibhagha riyo, omooto uyo ahöruru tëëndiri ataane na Bheetero na Yohana. Abhaato bhoose bhano ꞉bhaare hayo, bhakabhiikomanera bhararoghoora chwee. Ahaghiro hano ꞉bhaare Bheetero na Yohana, ꞉haare harabherekeru, Eriibhuru re Seremaani.
Bheetero ˆakabheeghi abhaato ighoro e Yesu
12Hano Bheetero arooche abhaato bhayo, akabhabhoorera akabhugha, “Abhaghëndi bhaane abhaato bha Isiraeri, ngwake ghakobharoghoori ghayo? Kana ndighi moghotoomeri amiisho nköra n‑gho changuru chiito, hande obhutööbhiyu bhwito nibho bhomuköriri omooto uno atore ghughënda? 13Eryobha re bhasookoro bhiito, Abhurahamu, Isaka, na Yakobho, ꞉ndeemoghongiri omutamishi waache Yesu. Wiiki Yesu niwe uno inyu momoruusiri ateneru ekiina aku! Koru hano Bhiraato ëndiri abhiighorere Yesu, ꞉mwaangiri, 14mokamusabha Bhiraato kubha, omwiti ighoreru, amare Yesu aku. Mokamwanga Yesu Omutööbhiyu o Ryobha, uno niwe omwene chiri omuhëënë ambërë e Ryobha.#3:14 Mööhi Ruuka 23:18–25. 15Mbe, mokamwita uno anyi omutangi o bhuhöru! Amare Eryobha rekamoryoki koru mo‑bhaku, na niitu n‑abhiibhateri bha koryoka kooche toonyi. 16Omooto uno mokomorighi hano, momweche bhoheene. Iwe naahöruru gho nchëra e ghotoora obhokumi bhooche kwo riina re Yesu. Eriina riyo, haghirohamu no okomokumi, nibhyo bhighëriri akabha muhöru, kinya mokomorighi anyi ibheere.
17“Ibheere bhahiiri bhaane, ghayo ghoose ꞉moomuköriire Yesu, inyu na abhakoro bhaanyu, nimënyiri kubha ꞉mooghaköriri gho kwanga kumënya koonyu. 18Amare, ghayo ꞉ngaabheere hangʼu kubha Eryobha rehikeerani amangʼana ghano riröötiri gho nchëra e bharööti bhaache bhoose kubha, Kirisito waache nakunyaakibhu. 19Ibheere, motuukuune amasari ghaanyu, na moriigharurere Eryobha, rebhaabhërë. Ghaache amabhagha gha koweera gho kubha‑ho Omutëmi, 20na ndekomotoma Kirisito ghokoonyu. Iwe niwe Kirisito Yesu Omotoori uno Eryobha remwahwire gho ghiri yaanyu korwera simoka. 21Ibheere Yesu nakwëndëru asaaghe Mwishaaro mbagha hano Eryobha reghuköra ebheghiro bhyose bhe mo‑se ino bhibhe, kinya bhuure abhughiri korwera kare gho nchëra e bharööti bhaache abhatööbhiyu.
22“Omurööti Musa ꞉naabhughiri, ‘Ghate yaanyu, Omutëmi Waryobha waanyu nakobhaahurera omurööti kinya eni. Amangʼana ghoose ghano akobhabhoorera, momutëghëërërë bhoheene. 23Omooto wowoose uno ataakomutëghëërëra omurööti uyo, naghotooru rubhareka na abhaato bha Ryobha.’#3:22–23 Mööhi Kohiita kwo Meghiro 18:15, 18–19. 24Koru abharööti bhoose, korwera Samweri na abhande bhano ꞉bhaamurööbhiire, ꞉mbaaröötiri amangʼana gha chaasiko chino. 25Inyu n‑abhaana bha bharööti moonyi, wiiki moghusanga eriiraghano rino Eryobha ꞉riiköriri na bhasookoro bhaanyu. Eryobha ꞉ndeemuraghiri Abhurahamu, ‘Gho kohetera orwibhoro roocho, abhaato bha chaase choose mbaghwitabheru.’#3:25 Mööhi Simoka 22:18, 26:4. 26Mbe, hano Eryobha remwahwire#3:26 Remwahwire. Egheteemoro ekende ngeghotora kubha, remoryokiri. omutamishi waache Yesu, ꞉ndeemotomiri ghokoonyu singa, kubha abhiitabheri gho koruusi mooto woose mo‑mabhe ghaache.”
S'ha seleccionat:
Amaköri gha Bhatomu 3: ntk
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2022 Wycliffe Bible Translators, Inc. All rights reserved