रूमी 13

हातपात होड़कूराः आड़रेपे दोहोन

1सरकाररिकुःआ जमा हातपात होड़कू भगवान सुनावकेडकूखन हातपाते ओवाकेडकुःआ। हनालगा अपे जमाकू हँकुःआ होड़कूराः आड़रेपे दोहोन। 2अरू सरकारराः हुकुमकूने टड़ावता हाँयग होड़, भगवान बड़ाँवकेरा हना हातपातकूने घंटावता अरू हाँय डंडे पनावाःता। 3नपाय बुताय बुताता हाँयग होड़, हातपात होड़कू सुदा बोर मेर दोहोनता। मनदो बेलूरे एचेयता हाँयके हँकू सुदा बोर दोहोनता। अपे हातपात होड़कू सुदा बेगर बोरते दोहोन लगापे चहाःतना दो, अपे नपाय बुताकूनपे एचेगोड ञवन अरू हनाते हँकू अपेकू मान मरजइतता। 4अपेराः जीवरे नफा होयाः लगा हँकू भगवानरिकुःआ सेवकिया होड़कू इयाय सुनाव दोहोकेडकुःआ। मनदो अपे बेलूर बुताकूनपे एचे दो, हँकू भगवान अगीते अपे डंडियावपे लगा हातपातकू पवावकिया। हनालगा अपे हँकू सुदापे बोर। 5अपे हँकूराः डंडियाव अते बनसाः लगा एकला हँकूराः आड़रे अहापे दोहोन, मनदो अपेराः इंदरी कतायता, नाःआ सताय हवे, माःआन, हनानाःपे एचे।

6जमा हातपात होड़कू भगवानरिकुःआ सेवादारकू इया अँननकूराः जिमेवारीकू एचे पुरावगेता। हनालगा अपे जमा बरानाः मलगुजारीकून एएमे लगा इदा, हनापे एमेगोड। 7अरू अपे होड़कू एमेवा लगा इदा, हना जमाकून एनेमेगोड। अपे सरकारके एमे लगा इदा हना ढिबुवाकूनपे एमेगोड। अकूस मनाः लगा इदा हँकूराः अकूसपे मनाः अरू मान मरजइतकू लगा इदा हँकूपे मान मरजइत।

अलार-दुलारकू लगा रिनहादारकूपे बड़ाँः

8अपे तोनोंगीग होड़राः कहिसाः गोःकेडखन रिनहादार अलोपे बड़ाँः। मनदो अपे एटाः होड़कू अलार-दुलारकू लगा एकला रिनहादारकू इयापे दोहोन। एटाः होड़कूय अलार-दुलारता हाँयग होड़, भगवानराः जमा नियमकूने मनाःता। 9भगवानराः नियमकून कतायता,

“अलोपे सनहा-सनही,

तोनोंगीग अलोपे ञेड एंडाय,

अलोपे इनिग,

अलोपे ललचीःआ।”#एचे उडुंग 20:13-15,17

नाःआ जमा नियमकून मिनीटोंग नियमरे मिनी जुवाःता,

“अपे अँननपेरिकुःआ परुसीकू अँननपे इयापे अलार-दुलारकू।”#लेवी 19:18

10एटाः होड़कूय अलार-दुलारता हाँयग होड़ आँयग परुसी एचेरे तोनोंगाः मेरेय गारबारगेता। हनालगा तोनोंगीग एटाः होड़कूय अलार-दुलार, हाँय भगवानराः जमा नियमकूने पुरावगोडता।

11दो नाःआ जमाकून अपे एनेचेगोड ञवन लगा इदा। अबू ईसू मसी एचेरेबू बिसवासकेरा हना वरीते, भगवान अबू जमालेःआतेय सडावबूता, हना दिन लेनेसान इदा। हनालगा अपे नाःआ जूग बदीरे नाय नपायते सुदीकेडखन अपीगतो होड़कू इया अहापे दोहोन, मनदो बेरेडकियानखन सवासितीपे दोहोन। 12रइत चबनतना अरू दिन दरवाःआ। हनालगा अपे अंदरा इयाःआ बेलूर बुताकून अड़ाः एंडाकेडखन नपाय लूर-नेवनराः मरसल इयाःआ बुताकूनपे एचेय। 13अपे कसूर लूर-नेवन इया कोसोड़ा-दारू झड़ीकेडखन हउड़ी होड़कू अलोपे होयाः, सनहा-सनही अरू बेलूर बुताकून अहापे एचेय, कड़ीग अरू इरा होड़कू इया अहापे जियाः। मनदो अपेराः जीव भगवान मरसलगोतेडकुःआ हँकुःआ होड़कू इया नपाय लूर-नेवनतेपे जियाव ञवन। 14अपेराः इंदरी कसूर लूर-नेवन इया जियाः लगा चहाःता, मनदो अपे हनानाः ओंगोल इया अलोपे सलाः अरू नँवा सोनहेपे तुसिंगता हनन इया ईसू मसीपे तुसिंगका।

S'ha seleccionat:

रूमी 13: kfp

Subratllat

Copia

Compara

Comparteix