1 कुरुन्थियों 10
10
इस्राएल रे इतिहास रे जरिए चितौणी
1ओ संगी विश्वासियों, मैं तुसा जो याद दुआणा चाह्ंदा कि बियाबान बिच असा रे सारे पूरखां ने इक्क बद्दल रे खम्भे रे हेठ सुरक्षा पाई थी, ते से सारे जणे समुन्दर रे बिच का सुके पैर पार होई गे थिये। 2ते ए इदेया कि जिय्यां सारेया ने बद्दल ते समुन्दर बिच बपतिस्मा लित्तेया हो ते मूसा रे चेल्ले बणी गे हो, 3ते सबणी जणेया ने इक्क ही रोट्टी खाई जे परमेश्वर ने स्वर्ग का दित्ती थी। 4ते सबणा ने से ही पाणी भी पित्तेया जे परमेश्वर ने सप्पड़ बिच का दित्तेया थिया। ते से सप्पड़ मसीह यीशु री बराबरी बिच भी है जे तिन्हा लोक्कां कने तिन्हेरे सफर बिच कन्ने-कन्ने थी ते जिनिये तिन्हा जो जिन्दगी भी दित्ती। 5पर परमेश्वर तिन्हा बिच का मते जणेया का खुस नी होए, इधेरे तांइ से बियाबान बिच ही मरी गे। 6ए गल्लां असा तांइ चितौणी ठैहरी कि जिय्यां तिन्हा ने लालच कित्तेया, तिय्यां असी भी बुरी चीजां रा लालच ना करण। 7ते ना तुसा मूर्तां री पूजा करणे वाले बणदे, जिय्यां कि तिन्हा बिच का मते जणे बणी गे थिये, जिय्यां कि पवित्रशास्त्र बिच लिख्खे रा है,
“मणू खाणा-पीणा बैठ्ठे ते फिरी उठी करी अनैतिक कम्म करणा लगे”
8ते तुसा कुसकी भी तरिक्के रे अश्लीलता वाले कम्म मत करदे, जिय्यां कि तिन्हा बिच का मते जणेया ने कित्तेया थिया ते इक्क दिन बिच त्रेई हजार मणू मरी गे। 9ते नां असा जो मसीह यीशु जो परखणा चाएदा, जिय्यां तिन्हा बिच का मते जणेया ने कित्तेया, ते से जहरिल्ले कीड़े रे कटणे कने मरी गे। 10ते ना तुसा कुड़कुड़ाओ, जिय्यां कि तिन्हा बिच का मते जणे कुड़कुड़ाए थिये ते परमेश्वर रे भेज्जे रे इक्क स्वर्गदूत ने तिन्हा जो मारी रख्खेया। 11पर ए सब गल्लां जे तिन्हा कने होई थी, असा लोक्कां जो चितौणी दैणे तांइ लिख्खी गे री हिन जे इन्हा आखरी दिनां बिच रैह्न्दे। 12इधेरे तांइ जे विश्वासी ए दावा करदा कि से विश्वास बिच पक्का है, से चुकन्ना रेयो कि कुदखी तिस्सी तरिक्के रे पाप बिच ना पेई जाओ। 13तुसा सिर्फ इदेइ ही परिक्षा बिच ही पे, जदेई परिक्षा बिच सारे जणे पैंदे। परमेश्वर भरोस्सेमंद हिन ते तिन्हा ने तुसा जो सैह्णे री ताकत का बधी करी कुसकी परिक्षा बिच नी पैणा दैणा। पर तिन्हा ने तुसा जो से ताकत दैणी जिसेरी जरुरत तुसा जो पाप करणे का बचणे तांइ पैणी।
मूर्ति पूजा रे खिलाफ चितौणी
14इधेरे तांइ ओ मेरे प्यारेयों, पूरी तरिक्के कने मूर्तां री पूजा करणा का छड्डी देयो। 15मैं तुसा जो समजदार मन्नी करी बोलदा, जे गल्ल मैं बोल्लेया करदा है तिन्हा गल्लां जो तुसा परखी करी दिख्खो कि से सही हिन या गलत हिन। 16जां असी प्रभु-भोज बिच तिस कटोरे बिच का पिंदे, ते जां रोट्टी बिच का खांदे ते जिसेरे तांइ असी परमेश्वर रा भी शुक्रिया करदे तां असी हकीकत बिच मसीह पर होए रे जुल्म ते तिन्हेरी कुर्बानी जो याद करदे। ए तिन्हा आशीषां रा हिस्सा बणने री निशानी है जे असा जो मसीह सरीर रा हिस्सा बणने री वजह कने मिलदी। 17इधेरे तांइ जां इक्क ही रोट्टी है जे मसीह हिन, तां असी भी जे मते हिन असी इक्क सरीर बणी जांदे किजोकी असी सब जणे तिस्सी इक्क रोट्टी बिच शामिल हुंदे। 18इस्राएल रे लोक्कां रे बारे बिच सोच्चो, जां से तिस रोट्टी जो खांदे जे परमेश्वर जो भेंट चढ़ाए री हुंदी, तां से परमेश्वर री अराधना करणे बिच शामिल हुंदे, तिय्यां ही जे मणू मूर्तां जो चढ़ाए री भेंट खांदे तां से मूर्तां री अराधना करणे बिच शामिल हुंदे। 19मैं ए नी है बोलदा कि मूर्ति पर चढ़ाए री बलि किच्छ है, या मूर्ति अप्पु किच्छ है, 20मैं ए बोलणे री कोसीस करेया करदा है कि जां मणू मूर्तां जो भेंट चढ़ांदे से परमेश्वर तांइ नी पर दुष्टात्मा तांइ भेंट चढ़ांदे। ते मैं नी चाह्ंदा कि तुसा दुष्टात्मां री अराधना करणे बिच हिस्सेदार बणो। 21ए मुमकिन नी है कि तुसा इक्क ही समय पर दुष्टात्मा जो चढ़ाए रे कुर्बानी बिच का भी खाओ-पीयो ते कन्ने-कन्ने प्रभु भोज बिच शामिल हो जे असा जो मसीह री मौत रा चेत्ता दुआंदा। 22जे अगर असी इय्यां करदे तां असी प्रभु जो बड़ा वरी गुस्सा चढांदे। असी परमेश्वर का जादा ताकतवर नी हिन।
सब किच्छ परमेश्वर री महिमा तांइ
23जिय्यां कि तुसा बोलदे कि असा जो सब किच्छ करणे री अजादी है, हाँ, पर सब किच्छ करणा असा तांइ खरा नी है। असा जो सब किच्छ करणे री अजादी ता है, पर सब किच्छ परमेश्वर बिच असा रे विश्वास जो मजबूत नी करदा। 24हर कोई सिर्फ अपणे ही फायदे तांइ ही नी पर दूज्जे रे फायदे तांइ भी सोच्चे। 25हालांकि जां तुसा कसाईयां री दुकान का मांस खरीददे तां अग्गे बधो ते तिसजो खाओ, ते तिन्हा का किच्छ ना पूच्छणे कने साफ रख्खो। 26तुसा से खाई सकदे किजोकी पवित्रशास्त्र बिच लिख्खे रा है, “दुनिया ते जे किच्छ भी तिस बिच है से सब परमेश्वर रा है।”
27जे अगर विश्वास नी करणे वालेयां बिच का कोई तुसा जो अपणे घरे सद्दो, ते तुसा तिन्हा का जाणा चाओ, तां जे किच्छ भी से मणू तुसा जो खाणे तांइ परोस्से से बिना सवाल कित्ते रे खाओ ते तुसा जो इस गल्ल तांइ बुरा ना लग्गो कि से मूर्तां जो चढ़ाए रा है या नी। 28-29पर जे अगर कोई तुसा जो बोल्ले, ए तां मूर्ति जो भेंट कित्ते री चीज है, तां अपणे विवेक री वजह नी पर तिस बोलणे वाले रे विवेक री वजह कने से मत खाओ। किजोकी मेरी अजादी दूज्जे री सोच कने परखी नी जाणी चाएदी। 30जे अगर मैं परमेश्वर रा शुक्रिया करी के से रोट्टी खांदा, तां तिस रोट्टी री वजह कने मेरे पर इल्जाम किजो लाया जांदा जिसेरे तांइ मैं परमेश्वर रा शुक्रिया कित्तेया? 31इधेरे तांइ आखिर बिच मैं तुसा कने ए ही बोलणा चाह्ंदा कि तुसा चाए खाओ, चाए पीयो, चाए जे किच्छ भी करो, सब किच्छ परमेश्वर री बड़ाई तांइ करो। 32-33जे किच्छ भी मैं करदा तिस बिच मैं सारेयां जो खुस करणे री कोसीस करदा, मैं सिर्फ अपणा फायदा नी सोचदा पर सारेयां रे फायदे तांइ सोचदा ताकि से मणू छुटकारा पाई सकण। तिय्यां ही तुसा इस तरिक्के कने जिन्दगी जियो कि यहूदी, गैर यहूदी ते परमेश्वर री कलीसियां रे लोक्कां तांइ मुसीबत री वजह बणो।
S'ha seleccionat:
1 कुरुन्थियों 10: CDHNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.