मत्ती 1
1
यीशु मसीह दा खानदान
(लूका 3:23-38)
1एह़ यीशु मसीह दे पूर्वजां दे नां हन, जेह्ड़े अब्राहम कने दाऊद राजे दे वंशे दे थे। 2अब्राहमे ते इसहाक, इसहाके ते याकूब, याकूबे ते यहूदा कने तिसदे भाऊ पैदा होये, 3यहूदा ते फिरिस कने जोरह पैदा होये, कने तिन्हां दिया माँऊ दा नां तामार था, कने फिरिसे ते हिस्रोन, कने हिस्रोने ते एराम पैदा होएया, 4एरामे ते अम्मीनादाब, अम्मीनादाबे ते नहशोन, कने नहशोने ते सलमोन पैदा होएया, 5सलमोने दा पुत्तर बोअज था, तिसदिया माँऊ दा नां राहाबा था, बोअजे दा पुत्तर ओबेद था कने तिसदिया माँऊ दा नां रूत था, कने ओबेदे दा पुत्तर यिशै था। 6कने यिशै ते दाऊद राजा, कने दाऊद राजे ते सुलेमान तिसा जणासा ते पैदा होएया जेह्ड़ी पैहल्ले उरिय्याह दी लाड़ी थी। 7सुलेमाने ते रहबाम, रहबामे ते अबिय्याह, कने अबिय्याह ते आसा पैदा होएया, 8आसा ते यहोशाफात, यहोशाफाते ते योराम, कने योरामे ते उज्जियाह पैदा होएया, 9उज्जियाह ते योताम, योतामे ते आहाज, कने आहाजे ते हिजकिय्याह पैदा होएया, 10हिजकिय्याह ते मनश्शिह, मनश्शिहे ते आमोन, कने आमोने ते योशिय्याह पैदा होएया। 11योशिय्याह, यकुन्याह कने तिसदे भाऊआं दा दादा था, जेह्ड़े इस्राएली लोकां जो गुलाम बणाई करी बेबीलोन देसे जो लेई जाणे ते पैहल्ले पैदा होये थे।
12गुलाम बणाई करी बेबीलोन देसे जो लेई जाणे ते बाद यकुन्याह ते शालतिएल, कने शालतिएल ते जरूब्बाबिल पैदा होएया, 13जरूब्बाबिले ते अबीहूद, अबीहूदे ते इल्याकीम, कने इल्याकीमे ते अजोर पैदा होएया, 14अजोरे ते सदोक, सदोके ते अखीम, कने अखीमे ते इलीहूद पैदा होएया, 15इलीहूदे ते इलियाजार, इलियाजारे ते मत्तान, कने मत्ताने ते याकूब पैदा होएया, 16याकूबे ते यूसुफ पैदा होएया, जेह्ड़ा मरियमा दा लाड़ा था कने मरियमा ते यीशु पैदा होएया, जिसियो मसीह भी ग्लांदे हन। 17इस तरीके नैं अब्राहमे ते दाऊद राजे तिकर चौदा पीढ़ियाँ होईयां, कने दाऊद राजे बग्त इस्राएली लोकां जो गुलाम बणाई करी बेबीलोन देसे जो लेई जाणे तिकर चौदा पीढ़ी, कने बेबीलोन देसे दी गुलामी ते यीशु मसीह तिकर चौदा पीढ़ियाँ होईयां।
यीशु मसीह दा जन्म
(लूका 1:26-38; 2:1-7)
18यीशु मसीह दा जन्म होणे ते पैहल्लैं इआं होएया, कि जाह़लू तिसदिया माँऊ मरियमा दी मंगणी यूसुफ नांऐ दे इक्की माणुये नैं होई गेई, अपर तिन्हां दा ब्याह होणे ते पैहल्ले ई सैह़ पवित्र आत्मा दे जरिये ते गर्भवती होई। 19यूसुफ जेह्ड़ा मरियमा दा होणे आल़ा लाड़ा था, सैह़ इक्क धर्मी माणु था, जाह़लू तिसियो एह़ गल्ल पता लग्गी, तां सैह़ तिसा जो बदनाम नीं करणा चांह़दा था, एह़ सोची करी तिन्हीं तिसा जो चुपचाप छड्डी दैणे दा बचार कित्ता। 20जाह़लू सैह़ इन्हां गल्लां जो सोचा ई करदा था, तां परमात्मे दा सुअर्गदूत तिसियो सुपणे च दुस्सी नैं ग्लाणा लग्गा, “हे यूसुफ। दाऊद राजे दे वंश, हुण तू अपणिया होणे आल़िआ लाड़िया मरियमा जो अप्पु अल्ल रखणे ते मत डर, क्जोकि जेह्ड़ा तिसादे पेटे च ऐ, सैह़ पवित्र आत्मा दिया तरफा ते ऐ। 21सैह़ जागत जम्मगी कने तू तिसदा नां यीशु रखेयां क्जोकि सैह़ अपणे लोकां दा तिन्हां दे पापां ते उद्धार करगा।”
22एह़ सब कुच्छ इसतांई होएया कि जेह्ड़ा वचन परमात्मे भविष्यवक्ता दे जरिये ग्लाया था, सैह़ पूरा होयैं, 23“दिक्खा, इक्की कुआरिया कुड़िया गर्भवती होणा कने इक्क जागत जम्मणा, कने तिसदा नां इम्मानुएल रखेया जांगा,” जिसदा मतलब ऐ, परमात्मा अहां सौगी। 24ताह़लू यूसुफ निंदरा ते जागी करी प्रभु दे सुअर्गदूते दे हुक्मे मताबक अपणिया होणे आल़िआ लाड़िया जो अप्पु अल्ल लेई आया। 25कने जाह़लू तिकर मरियमा जागते जो जन्म नीं दित्ता ताह़लू तिकर यूसुफैं तिसा सौगी लाड़ा-लाड़ी आल़ा रिस्ता नीं रखेया, कने जाह़लू जागत पैदा होएया, तां तिन्हीं तिसदा नां यीशु रखेया।
S'ha seleccionat:
मत्ती 1: XNR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.