Nombres 12
12
Miiriyam kpántì unyaŋgbanti
1Mooyiisi nìn cáá unimpu ubɔ u sá Kuusi tiŋkin, ní Miiriyam nì Aarɔn nìn bíi kpākantí-u u-nimpucáatam gbanti pu. 2Bi nìn bí ki lì yii: «Mooyiisi baba pu ní ti-Dindaan pée dī ki sòon̄aaa? Waa dī ti mun pu ki sòon̄aaa?» Ní ti-Dindaan gbìl̄ tin bi sòon̄ee. 3Di sá Mooyiisi nìn sá unil un sīntì u-ba taapu tikpil ki jítiǹ kitiŋ pu nib kɔkɔee ní. 4Kpalaayee ní ti-Dindaan yíiń Mooyiisi nì Aarɔn nì Miiriyam ki bí-bi yii: «Ni-taatil ń dāan̄ circir kɔŋkooŋŋu nyɔkɔpu.»
Ní bi nyáń ki búntì. 5Ti-Dindaan nìn sīntìń ditagbancancaal poon ki yúl̀ tanti punyɔkɔpu. Ní ki yíiń Aarɔn nì Miiriyam, ní bi-liitil nyáń ki síl̀#12.5 Kpèè Disa 13.21 nì tin bi ŋmàn̄ kugbɔŋu faaku taapuee.. 6Ní ti-Dindaan bí-bi yii: «Ní pīlifì tin m cáá kí tùkù-ni nee tiŋan. Ni-kansikin m-bɔnaatiliu yaa bée, an sá nì dileedakal nì tidamintiil poon ní man ni-Dindaan lèekī m-ba ki dàkà-u, ní ki sòoǹ nì u. 7Ama m-tɔntɔnliu Mooyiisi úǹ cee kaa sá míǹ. Úǹ kpèé m-nibul mmɔntiim ní ki bí deedee#12.7 m-dicaŋku: kpèè Eebru 3.2.. 8M yú u-nimbiin ní ki sòoǹ nì u, ní ki cántí-u tikɔkɔ ní u wāĺ man ni-Dindaan naŋku. Ba pu ní naa fāŋkì m-tɔntɔnliu Mooyiisi ní ki kpákáǹ-u míǹ?» 9Ní ti-Dindaan fōō bi-pu diŋuul, ní ki fātìi nín jɔ́ḿ. 10Ditagbandee tin lì yii dì yíkí tanti puee, Miiriyam wunti pu dinyaŋgbampindi píń ki pīiǹ kii ntaayimee. Aarɔn fātìi kpēēyee dinyaŋgbandi píń Miiriyam pu. 11Ní Aarɔn bí Mooyiisi yii: «M-kpiliu, m gbàam̄-si, taa pà-ti ti-kpitii in ti-gbaandi yāntì ti ŋá-see paati. 12Taa yàntī Miiriyam ń kpántí kii kibiki kin kpíì ki-na poon ki-wunti dijandi sūū ki wāatì bi nín màl̄-kèe.»
13Niinee Mooyiisi mēē ti-Dindaan nì dinimbinaamandi yii: «Unimbɔti, m gbàam̄-si, cáaǹ Miiriyam!» 14Ní ti-Dindaan kíí-u yii: «U-baa di yaa bàà tíil̀ ki làb̄ u-nimbiin nee, icoo kaa bàà cútí-u áli iwiin ilulaaa? Míǹ puee an sá ní nyāntí-u dinaapaalin ú nīn bí ŋkpaanceeti áli iwiin iluli, ní boonee ú fàtīí gítiń samaa kansikin.» 15Niinee bi nyántì Miiriyam dinaapaal poon iwiin iluli. Samaa kaa nìn yíkì dinaapaal pu, see u nín dāa fātìi gítìńee. 16Míǹ boonee ní samaa yíkì Aseerooti ní ki cūtìi ŋātì dinaapaal Paaran teekun ki kāl̀.
S'ha seleccionat:
Nombres 12: BASSARDC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
BIBLE EN N'TCHAM (Bassar) © Alliance Biblique du Togo, 2013.