1 Koronti 7
7
Di̱bi̱du a ya̱m ki̱nam
1Ki̱ka̱ngu we ya̱mu ta mwalemu, a le ni a yidu naye we. 2Aya di̱ne ke ti̱kulitu a ti̱radu ti̱mu we, n kawure a yiu naye, ka nang wuwule naye a swe ki̱ni kwarta. 3Kwarta a ni naye ko chi a dakanitu, naye a ma ti̱ni yiko. 4Di̱ne naye a newe ki̱ni yii we bwi kiyu ka n ke kwarta, kwarta yiko ti̱n a ne yii we bwi kiyu ka n ke naye.
5Wuka we tibe wu a koduwe ka n ke n chi ka kekadu ko ne chi madu di̱ne chi bau wauwade twa̱ba̱ku buniyange. A kuteng ki̱ku n chi ka funti̱bwi ke Setan a yo wukami̱nu dwalaku we kubeku wukaneng. 6M mi̱n m mi̱fwan mi̱n fwa chimi̱n bi̱bu, n ke yilang. 7We ki̱mangu n ke ni̱bu kanodu yinang mi̱n a ne ki̱na we, aya n Kwama a mu ni dang, a yo wu ka medu ka ma ki̱na, wuka a ne ma ki̱na.
8Bi̱bu a ne ki̱na wemu n ti bi̱bu kwartabu chimu a bwamu, mi̱n kudu a la chi n chi a swe a madu ki̱na we yinang mi̱n. 9Aya ka n chi a ne yin tau dutu chite, bunge a ma ki̱na. Nangki̱n bunge ki̱na n ti ki̱ku ki̱rangmu ka la dukan chi̱nangu.
10Bi̱bu a ma ki̱namu, mi̱n ngau chimi̱n ki̱kure, n ke mi̱n aya n Tewuduwe, mi naye a yaraduwe n ti kwartako. 11Ka aya a tu a yarane, a nadu wuka ni we, n ki̱n a ki̱lan a dokan n ti kwarta ko, kwarta ti̱n a marru naye kowe.
12We bi̱kamu mi̱n fwa chimi̱nu aya n ke chi n Tewuduwe ya̱iye, ka wuka nii ki̱ni naye wu n ke naye bunti̱ke, wu a ke ka swedu n ti ki̱ne, a marru naye we. 13Ti̱nti̱ne ka wuka naye ki̱ni kwarta, wu n ke naba bunti̱ke, wu a ke ko chi swedu ware, a koduwe. 14N fwa ying di̱ne kwarta wu n ke naba bunti̱ke, ki̱ya wauwade we naye ko, we yiko ti̱n n ti naye wu n ke naye bunti̱ke, ki̱ya wauwade we kwarta ko, ka a newe yiko, bwesi̱m chimu a ne ya wauwade, a ya ka ti̱maye, ka ya wauwade.
15Aya wu n ke naba bunti̱ke, ki̱baddu ka yaradu n ti naba bunti̱ke, ka medu ka yaradu. Aya we kwarta ka naye wu ki̱ma bunti̱ke a mwinti̱buwe ka kadi yiko we dur ki̱nu, di̱ne n Kwama a yale ni a fiswe li̱mange. 16M mun naye, n yimi yire ka mun nang wu mwang yu kwartamo? M mun kwarta mwang yima ka m mun nang wu mwang yu nayemo?
Duum fiswemu n Kwama ki̱baddi̱mu
17Kasi no a wuwule da, n kawure a ya yayu wu Tewuduwe ki̱baddu n ki̱n ka made n ti wu n Kwama a yal ki̱n wenge. Wu nang ki̱kure mi̱n ma ni̱bu bunti̱ki̱ mi̱nu ki̱ni kwange. 18Nii wu a yiu Kwama feredi a ya a bi laare, a kedu a kadu we tiyang wu a bibu laare, nii wu n Kwama a yale, wu a no n ki̱n a no bibu laare, a yiduwe ko a mwintuwe ka bi laaru. 19Biku laarangu n ti kwalan biku laarange, n ke ti̱kan chi. Aya maku nanganu ki̱ni yilangu nang chi Kwama ki̱badditu. 20Kanang wuwule niye a tatuwe fi n ki̱n a no we mi̱ne a kutengu a yiu Kwamangu. 21Ka m mun a no ka̱be ki̱dangu mwang yiu Kwamange, chakakku ki̱ni ka̱bitu. Aya ka n ya da mwang chire, mwang chirti̱nu. 22Kanang wuwule niye wu n ki̱n ka̱be, wu ni̱bu a yal ki̱n a di̱n Kwamane, n ki̱n a chir we ka̱bitu. N ki̱n n wu Kwama. We yiko, ka̱be n Tewuduwe a ni ki̱n da a chire, a kau ka̱be Masiya. 23N Kwama a fe ka̱mbi̱ru nabwen, ti̱kadu kabi wukani we ko bayim. 24“Kebu mi̱m n kawure a tituwe fi n Kwama a yon ki̱ne.”
Di̱bi̱du a bi̱bu a mabu ki̱namu n ti nati̱m buni̱mu
25We bi̱bu a mabu ki̱namu, mang yabu ya̱m we dur chi̱nu, aya we da̱ngki̱ mangu, m mi̱n wu ni̱bu a ke ki̱ne, we li̱me Tewuduwe. 26Mi̱n kudu ka la chi n kawure a swe kangu n ki̱n wemingu, di̱ne ki̱swi riye a mwatawe. 27Ka mwang ma ki̱nange, swe ki̱ni ki̱namo, chakki̱duwe, ka mwang mabu ki̱na didiine, maduwe. 28Aya ka mwang tu mwang ma ki̱nange, a kayabu di̱ne n ke ki̱le. Ti̱nti̱ne ka fwa̱n a fwa ki̱nange, n ke ki̱le, aya mi̱n fwadi ying mi ke ti̱twaiyu kadiye ki̱nawe. 29Chimi̱n fwaditu kebumi̱m, ki̱swi a ma bayim. A mwetuwe ki̱ka̱ngu, ni̱bu ki̱namu a kau yinang bi̱bu a ne ki̱nawem. 30Bi̱bu ki̱ma furi ki̱limu a swe yinangu a mabu furi ki̱liyang. Bi̱bu ki̱ma ti̱mi̱lani̱mu a kau yinang bi̱bu a mabu ti̱mi̱lani̱m. Ti̱nti̱ne bi̱bu ki̱ tana kuli̱ni̱mu a kau yinang bi̱bu a ne chiwem. 31Bi̱bu ki̱nwe ta̱ma̱ng ti̱ti̱nimu a yo ti̱nu ni̱r we, di̱ne ti̱ti̱ni ti̱tu ki̱sudusuwe.
32Mi̱n baddu ta du ti̱kurantu. Di̱ne nii wu a ne ki̱na we, ki̱yo Tewuduwe a kakku ki̱la chi yinangu n Tewuduwe ka nwe ta̱ma̱ng ki̱ni ki̱nangu. 33Wu ki̱ni ki̱na ti̱kuran kitu a kuli̱n ti̱ti̱ni, ki̱kuru yinangu n ki̱n ka yo naye ko ka nwe ta̱ma̱ngu. 34Kanang chikiye, ti̱kuran kitu a keran ti̱nti yurau. Ti̱nti̱ne naye a ne ki̱nawe ka fwa̱ne, ki̱kura Tewuduwe a la chi yinangu wauwade wu a ni̱r ki̱ne n ti bwi kiyu ka dadu we kakku Tewuduwe. Naye a ma ki̱na ki̱kura kana chi a ti̱ti̱ni, chi n ki̱n ka ma kwartako mi̱nu ka nwe ta̱ma̱nge. 35N fwa ying ke a maka chi̱n, n ke di̱ne ma ni chi̱n riye. Aya di̱ne ke fiswe chi̱n a le yinang, ke ti ni duru we kana bunti̱ki̱ Tewuduwengu.
36Aya ka ni ki̱twa̱ku fwa̱n di̱du a lam ka ki̱nane, yinu ki̱n ki̱ma ki̱mi̱n chi a lebe, ki̱kube ki̱nu yinange, ka yiko, bunge n chi a ma ki̱na. 37Aya wu a bwa̱u we ni̱r ki̱nu ko ne ka ma ki̱na, a ku ki̱na n ke ti̱kan chi we di̱ki̱ne, ti̱nti̱ne n ki̱n a me ki̱tau dur ki̱nu, yinu a me a bwa̱u we ni̱ru ko ne ka na fwa̱ne, a le ti̱n a ne ki̱le we. 38Di̱ne yiko, ni wu a na fwa̱ne a le ki̱mi̱n, wu a mabu ki̱na a le ki̱mi̱n ti̱n.
39Naye ka swedu we lo ki̱na kwarta ka we ki̱ni ti̱kuriye. Aya ka kwarta a bwange, yinu ki̱ni da ka ma wuka ki̱na wa bunti̱ke a ki̱ke Tewuduwe ti̱nti̱n. 40Aya we ti̱mitu ti̱kuran, ka nwe ta̱ma̱ng ka la chi ka a swe a mabu ki̱na. We da̱ngku mangu mi̱ni ki̱ni Fi̱ki̱m Kwama.
S'ha seleccionat:
1 Koronti 7: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.