2 Gaolliqthu 3
3
Daoqma saljial aqsivq nail haqbhoil ganl nl nail
1Nv juq neq, yovqgavq nail salkhil yovqgavq khanq nail ngel ail laiq. Maq ngel haq neq, tsaol-aq teevq pav ga nav juq-i mail nl nail khe-ai, nul juq nail haqbhoil salkhil khanq nail haoqgavq gevq bhoel-ai lavq nail maqkhaiq, nul juq-i mail gevq bhoel-ai leevq-a nail salkhil khanq nail haoqgavq bhai maqkhaiq, nv juq loq nail laiq. 2Nul juq neq, nv juq nail haqbhoil salkhil khanq nail haoqgavq pevq nail ngaol. Haoq gavq al, nv juq nail neema bhai gevq-ai thaq nail ngaol. Tsaol-aq iqsanl mail haoqgavq al bhai heeq nia khi ge daiq nia nail ngaol. 3Nul juq neq, Khali-i mail gevq bhoel-ai leevq khi nv juq-i mail oil ha lee-a nail haoqgavq teevq keiv pevq nail ngaol dai, bhaq laoq kheq dai dov lal-a nail ngaol. Haoq gavq gevq nail dailkheq-i mail gevq-ai thaq nail haoqgavq maq ngel-ail. Lovmav nail dailpav kovtavq bhai gevq-ai thaq nail haoqgavq iqsanl maq ngel-ail. Aq doevq doevq nail Miqyail nail Aqhaqlal-i mail tsaol-aq nail neema bhai gevq-ai thaq nail haoqgavq ngaol.
4Khali bhai juq nail lavqkhoel nee Miqyail bhai neema eeq duq jiav nail ngel-i mail, nv juq niail hai ge tseq nail ngaol. 5Thail hai ngaol-aoq, ganl niil nv juq teevq phaq ail maq nl kivq-ail. Nv juq nl kivq nail neenoeq neekha khi gaq neq, Miqyail-i mail bivq lavq-a nail phaq pevq nail ngaol. 6Daoqma saljial aqsivq nail haqbhoil ganl nl kivq dai, Miqyail nv juq bhai neenoeq neekha khi gaq bivq lavq-a nail ngaol. Daoqma saljial niil neq, gevq dov-ai thaq nail aoldaoq kovqdaoq bhai tavq nail maq ngel-ail. Aqhaqlal Miqyail bhai tavq nail ngaol. Khul khi mail dai ngal-aq neq, gevq dov-ai thaq nail aoldaoq kovqdaoq neq, lav heivq nail ngaol. Thail hai ngaol-aoq, Aqhaqlal Miqyail neq, lav doevq nail ngaol.
7Lovmav nail dailpav kovtavq-ai gevq-ai thaq nail lav heivq nail aoldaoq kovqdaoq neq, seiqleiq khaoqsail kav dee dee nail lavqkhoel nee, dov lal-a nail ngaol. Aq-u phao, Maolseiq nail maivphaoq bhai bhaq dov lal-a nail seiqleiq khaoqsail peivq ail thail thaiq khi ngaol-aoq, Ilsaqleiqlav nail tsaol-aq aivq nail maivphaoq bhai maq hel daiq nia-u phao kev dai, seiqleiq khaoqsail bhaq dov lal-a nail ngaol. 8Thail hai phal-iq neq, Aqhaqlal Miqyail bhai tavq nail ganl neq, a dai nee maq tsil seiqleiq khaoqsail kha dai eeq jaiq nail-aiq. 9Khul khi mail dai ngal-aq neq, yalkhaq dal lavq nail aoldaoq kovqdaoq kev lee-u phao, seiqleiq khaoqsail aol haq neq, tsaq nail daol nail tsaol-aq bhi pevq lal dai, nl nail phaq neq, a dai nee maq tsil seiqleiq khaoqsail kha dai eeq jaiq nail-aiq. 10Haoqnao khe dov lee-a nail seiqleiq khaoqsail neq, eeq dee meeq dee dee nail ngel-i mail, iqmoeq khe jiav nail seiqleiq khaoqsail peivq-ai thaq nail khe-ai, dul nail ngaol. 11Khul khi mail dai ngal-aq neq, peivq-ai thaq nail khe-ai dul nail al phaq seiqleiq khaoqsail aol nail lavqkhoel kev lee haq neq, ivq nail phaq neq, a dai nee maq tsil seiqleiq khaoqsail aol nail ngaol.
12Nv juq niail hai noeq thunq duq ya nail ngel-i mail, gee sil nail neema maq aol mail bhaq laoq kheq dai, ge tseq nail ngaol. 13Nv juq neq, Maolseiq khe-ai, maq dul-ail. Maolseiq neq, peivq ail thail thaiq nail seiqleiq khaoqsail bhai haoqnao nao saq kev dai, Ilsaqleiqlav nail tsaol-aq bhai maq bhi hel daiq nail dai khi, aivq nail maivphaoq bhai haqphal he pheeq-ai thaq nail ngaol. 14Ilsaqleiqlav nail tsaol-aq al juq nail neema aqgaol gaol lal-a nail ngel-i mail, yaq n n-gaol kev dai, daoqma saljial aqlil bhai ge-u phao, he pheeq-ai thaq nail haqphal al maq phao lal haq-al. Khul khi mail dai ngal-aq neq, Khali bhaq da nee taivq-ail haqphal al phao lal nia nail ngaol. 15Yaq n n-gaol kev dai, Maolseiq-i mail gevq-ai thaq nail haoqgavq bhai khal ge-u phao, aqyu juq nail neema bhai haqphal-i mail he pheeq-ai thaq nail ngaol. 16Thail hai ngaol-aoq, khul yanq bhai maqkhaiq, Heeqphaq Miqyail jaol nail phao kovq lal haq neq, he pheeq-ai thaq nail haqphal al bhai Miqyail phao bhiq nail ngaol. 17Miqyail neq, Aqhaqlal pevq khi, Miqyail nail Aqhaqlal khal jaol nail bhai, jel-ail nail phaq jiav nail ngaol. 18Ngadao juq iqsanl mail haqphal maq he pheeq-ai thaq nail phaoqdaiq bhai hel daiq nail khe-ai, Yeiqsul nail seiqleiq khaoqsail bhai hel daiq-u phao, ngadao iqsanl aivq khe-ai seiqleiq khaoqsail aol lal nail ngaol. Ngadao seiqleiq khaoqsail al teevq pov nee teevq pov bhaq jaiq lal dai, Aqhaqlal Miqyail nl lavq nail ngaol.
S'ha seleccionat:
2 Gaolliqthu 3: aeu
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.