San Mateo 2
2
Edau obeerjem bi garmua reinaanau chaai oothurtarr
1Mag Jesús thaabaawai phobordam Belén anʉm eeta thaabajim aajem, Judea durr. Mag jaar Erodeeta mag Judea durr reikha sĩejim aajem. Ich mag jaar ĩchab khĩirjug khaug athee chi machnaan magonaan anʉm khʉʉn edau obeerjem bi garmua beejierram aajem, Jerusalén phoborog. Makhʉʉn, edjã eem phĩdagta estudiejem khʉʉn ajim aajem. 2Mag beewi bardʉtkhachewi, judionaanag, —Pãar rey thaabatarr, ¿jamta wai nʉma? I thaababarm jaau sim phĩdag maach daúacha ootarr aawai iita marau jʉr wedurumgui aajeejim anʉm, iita judionaan reikhaju aawai i ajaug tho iekhaan.
3Mag judionaan rey thaababarm anʉm ũr athaawai chi rey Erodes warre khakhaisamjo aadejim anaabá. Mag nʉm dʉi tagam khʉʉn chi Jerusalenpienjã jʉ̃gderraata aphobaadejim anʉm. 4Magbaawai chi rey Erodeeu phadnaan chi pornaan thum Moiseeu Ẽwandam iek phã pʉarr jawaag chi machnaanpa thʉ̃rkhʉʉipʉiwia amag, —¿Jamta mag warrgarwe Ẽwandamau pʉiju jaaujerr thaabaju aajẽ? ajim anʉm.
5Magbaawai amachdeu irig, —Judea durr phobordam Belén anʉm eeta thaabaju aajem anaabahab, ich magta Ẽwandamau ich i jaaumie Miqueas khakhitarrag jaaupitarr aawai ajim anʉm. Mag irua jaautarr iek gaai,
6“Pãar, Judá durram phobordam Belenpien, pãran chadcha khapan khaba durrum.
Mag durrab mamʉ, pãar ee ãb thaababarmuata israelnaan mʉ õorkha thʉnʉm khʉʉn gobernaaju aawai, pãach durr agjo phobor thʉnʉm ee pãar phobor chan chi serbiibam khabam” a phã simgui ajierram anʉm, chi Erodeeg. (Mi. 5:2)
7Phadnaan chi pornaanau maestronaan dʉimua ichig mag jaaubaawai, chi rey Erodeeu jũrr mag chi magonaan ed obeerjem garmua beetarr khʉʉn amach appai thʉ̃rkhanaa wajapha ichig jaaupijim anaabá, jãagwaichata mag phĩdag amau oo naajĩ. 8Mag wajapha ichig jaaupinaan chadau amag, —Ĩsin chad ereubaadet ajim anʉm, Belenag. Ereubaadewi thumaa jeeu oopetat ajim anʉm, wajapha mag chaai khap aag. Maimua ya pãachdeu wajapha khaphʉ nʉisiewai mau mʉ aar iek pʉibapʉit, muajã mawia ĩchab pãar denjo i ajaug tho iekhaimaag ajim anaabá, juau ogthom.
9Mag chadcha chi rey Erodeeu amachig jaautarrta jʉ̃g thõba ereubaadejim aajem. Mag wetumua, warrcha amach thʉgdʉawai amachdeu phĩdag ootarrta deeu ũwaai am na phuu joisijim anaabá. Magbaawai ag ẽudee oo warrmamua, ya chi chaai sim aig pabaimaawai, ag ʉ̃r edjã ee bar joisijim anʉm. 10Mag amach chi magonaanau chi phĩdag oo athaawai onee aphobaadejim anʉm. 11Mag barwia, chi chaai kherarr aar dubnaa ooimaawai, chadcha chi chaaidam ich María dʉi ooimajierram anaabá. Magbaawai ag khĩirphee jĩepor phõbkhanaa i ajaug tho iekhajierram aajem, ich reikhaju igwi. Magnaa amach nem wai beetarr eem phĩr maimua incienso mirra dʉi thũpha khitheem aunaa irig deejierram aajem. 12Mag agtha am aig nʉm ee, ich chi Ẽwandam chogau khãai khõrg ee tag amag Erodes gar dichpiba jaautarr aawai, ag garjã dichba, deeum khʉd garta phʉʉrdʉ dichwi amach durrag wetjierram aajem.
Egiptoog chaai dʉr arrtarr
13Mag chi magonaan ereutarr khur Ẽwandam chogau deeu José khãai khõrkhapi auwia irig jaaujim aajem, Erodeeu chaai thõopʉyaag jʉrpiju. “Mamʉ magju nawe phiidʉtkhawi jopkhaa chaai dʉi Egiptoog ereubaadet” ajim anaabá. “Mua jaaubam aig chan oob mammua beemiet” ajim anʉm.
14Magbaawai José daukhanpawi, chadcha ag bʉrre nem khĩir khaugwia, agtha ãspaju wají nʉwe, jopkharraa amach chaai athaadejierram aajem, Egiptoog. 15Mammua da beeba, ya chi Erodes meebaadem a ũrbaawaita deeu beejierram aajem. Pari mam mag chaai arrtarran, maan maach Por Ẽwandamau ich i jaaumie Oseas khararrag jaaupitarrjo amkhĩir ajiebma. Magju igwiata chi Oseas khararrag Ẽwandamau,
“Egipto durrmuata mua mʉch Chaai thʉ̃rpʉiju” a phãpijim. (Os. 11:1)
Erodeeu chaain khechpi jaautarr
16Erodeeu chi khĩirjug khaphʉm khʉʉn nʉ sim ee, ĩchab khaug athajim aajem, ya jũrr deeum khʉd garta phʉʉrdʉ ereubaadem. Mag ich khũgurbapäaiwai, khĩir machgau warm khʉʉnau ichig jaautarr khĩirjunaa, Belén phobor eem chaain maimua ag bigaau phobordam nʉnʉidʉm eem chaaindampa thumaa año numiimua eegam khʉʉndam khechpi jaaujim anaabá. 17Mag khechpi jaautarran, maan mag chaain obarm gaaimua Ẽwandamau ich i jaaumie Jeremías khararrag phãpitarr gaai jaau simjota ajim. Irua phã pʉatarr mʉg ajim:
18“Ramá phobor ee ʉʉi bĩep jẽbʉ okhĩirjug machgau idawaa ʉapeper khaju.
Ma Raquel ajim, ich chaain ewagam khʉʉn athee bĩewai.
Mag sim chan par khĩir jãsenkha nʉmjã khĩupaba, waragta bĩe thʉnaaju ich chaaindam otarr athee” a phã sim Ẽwandam iek gaai. (Jr. 31:15)
19Pari chi Erodes meetarr khur, agtha chi José mam Egipto nʉm ee, Ẽwandamau ich chog pʉiwi khãai khõrkha thʉnʉm eeta irig, 20—José, phiidʉbá aichejim anʉm. Chaai thõoju ẽkha narr khʉʉnjã amachta ya khechphobaadeewai ya deeu pãach durrag chaai arrju aai nʉmgui ajim anʉm.
21Magbaawai José phiidʉwia Jesudam dʉi chi ãdpa deeu ũwaai Israelag beejierram aajem. 22Pari mag chi rey meebaadeewai, chi iewaa Arquelao a thʉ̃r sĩerrta jũrr Judea durr ich aaijo reikha sĩsim a ũrbaawai, agʉg maju ogkhajim aajem. Mag nʉm ee ĩchab deeu Ẽwandamau khãaipi athaawai, Ẽwandam chogaujã magʉg mapiba jaautarr aawai jũrr Galileaagta ereujim anaabá. 23Galilea durr barwi, sĩi khajapha Nazaret phobordamagta wetwi, mamta naaimajim aajem. Pari mag Nazaret phobor eeta naaimarran, maan Ẽwandamau ich i jaaumienag jaaujerrjo, Jesús Nazaretpierr a thʉ̃rju arr aawai ajima.
S'ha seleccionat:
San Mateo 2: noaA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.