Versets bíblics populars de Romanos 14

Comparteix

Tayta Dios mandaykashqancho kawayqa manami munashqansita mikunansipaqsu ni upunansipaqsu kaykan, saypa trukanqa alilata ruranansipaq, pïmaywanpis ali kawanansipaq y Espíritu Santu yanapämash kushish kawanansipaqmi. Jesucristuta sirvir sayno kawarqa Tayta Dios munashqannömi kawaykansi. Sayno kawashqaqa manami pipis jamurämäshunsu.

Kawarpis Tayta Diospaqmi kawaykansi. Wanurpis Tayta Diospaqmi wanushun. Saymi kawarpis wanukurpis Jesucristupa makincho kaykansi.

Sayno kaptinqa shumaq yarpachakushun yärakuq mayinsikunawan ali kawanansipaq y shakyäsinakur Tayta Dios munashqanno kawanansipaq.

Tayta Dios juzgamänansipaq kaykaptinqa yärakuq mayinsikunawan amana juzganakushunnasu. Yärakuq mayinsi imatapis rurashqansita rikar qepaman kutikunanpaq kaptinqa sayta ama rurashunsu.

Tayta Diospa palabranchöpis kaynömi qelqaraykan: <<Noqa Tayta Diosmi jurar nï: Lapanmi nawpäman qonqurpakayämunqa. Lapanmi cäsukayämänanpaq niyämanqa>>. Sayno kaptinqa lapansimi Tayta Diosta cuentata qoshun.

Jesucristuman yärakuq mayinsikuna shumaq mana tantiyakuyaptinpis ama jamuräyaysu. Tantiyayashqaykino mana tantiyayaptinpis paykunawan ama churakäyaysu.

Qam ¿pitaq kanki Jesucristupa ashmayninta juzganaykipaq? Jusalikuptinqa patronnin Jesucristumi juzganqa. Imano kaptinpis mana jusalikunanpaq Jesucristumi yanapaykan.