Versets bíblics populars de KOLOSI 2

Comparteix

Tigwaravu tulu ne hariki lui Jisas Kraes lo nomiu tokaana, huri tulu lavia ba mo kwareki a nomiu Hugwe*. Hoki na vikai a kakwarina mo vano u bua tilolo tano, vae i kamu tulu ne hokinia, tulu ne tu ne madi lui Kraes. A nomiu tokaana lui Kraes ne tu ne madi hoki na ingwa mo tu lo tano, vake a nomiu hauhuriana luna ne huira vakevake tigwaravu hokinia ramo huhuikamu luna. Vunu vake tulu ne lagwakinia tigwaravu.

Tulu tagahuri ne karea kwara vae a tangaloi ramai vaikamu tulu mo mulemai hoki na tangaloi gwarugwaru kina leo vuroki hinea u huri na kikikila na tangaloi na varamana. A leo vano hi aira a leo kurakura vohoki hinea a tangaloi rau tuku viti hurira tuai ba, rau vanamai tina tanungwe hati hinea rau hugu laliki lo varamana tomua halaradu, vae rahe vanamai te ti Kraes.

Tuai, a tanungwemiu rau mate lo nako i God huri na nomiu vaivai hati, vunu vake, huri tulu he kikilai na Tangwata* te noi God, tulu he lavi na kaimatai te lo siosio. Vae hikani i God u vaikamu tulu mo ahi haragoki mai Kraes. Mo domidomi koro na noda vaivai hati savia, mo bari na bukuda letiu hinea rau uliana lo buku, vake mo bari leletiuki na tangwata hinea ramo toko gwarubibikita. Mo lai vunuhira leletiu hokinia mo durubibira tilo kaibetu haragoki mai Kraes.

I Kraes aia u mulemai kina tangaloi na varamana, vae savisavi na karekarea noi God rau eno vunu luna ba, aia u taritarisa mai God vohoki. Vae i kamu hinea tulu hariki lui Kraes, i God u bete savi na kinau lakwakamu ba kwara ne vakakukwere na mamaurianamiu. I Kraes u hugwe koro na kinau doluaki, aia aulu sileti na kaihora lolo taetae mana tanungwe doluakinira, u huira sileti na huirana savia.

Vae huri hi, tulu hatu tiraki na tangaloi ramo tau na tangwata lumiu kwara tulu ne kani a havakinau diko tulu ne inu a havakinau. Tulu hatu tirakinira ramo viti kwara tulu ne kwiribibi na rani hinea rau kokona vake hinea tulu ne vai kanikani huri na vula tavidiri, diko kwara tulu ne kwiribibi na Rani* na Mabuana hokinia hika. A kinau vano hi tuai aira a nunu na kinau hinea kwara vae rana vanamai lo taroki, vae a kinau kareaki rau vanamai ba, aira lui Kraes*.