Versets bíblics populars de I-Roma 14

Comparteix

Ta say epateg koma ja nemnemen tayo niman na nayda‐kam kitod pantoshayan nen Apo Shiyos, sota mapteng nga ogadi, sota talna, tan sota imdeng ja medepod Ispirito Santo nen Apo Shiyos; eg kito koma mansosongbat pangkep nonta emengidin ja eg mekan ono ma‐inom. Jet no sajay i pesing mo, moka pan‐onora sota bilin nen Cristo, jet kosto‐an toka nen Apo Shiyos; tan angken pay sota kait mon too, kosto‐an shaka ngo.

Niman na ẃara kitod biyag, mansilbi kito so nen Apo Jesus, jet no metey kito, iso met laeng ja maytodoy i tayoka pansilbi. Isonga angken niman na ẃara kitod biyag ono metey kito, si Apo Jesus met laeng i makatoo son si‐katejo.

Isonga niman ma, say mesepol la menemnem, sota mengi‐kan ni olnos, tan mengi‐kan ni kedsangan ni pamati ni eshom.

Jet niman ma, ibi‐jag tayo sota tayoka pemedaw ni eshom. Mesepol la nemnemen tayo shorog i tayoka dagdag‐a say aliẃen si‐katejoy kabol la kepoyan ni pamati ni eshom.

Sota isango tayo son Apo Shiyos ali, si‐katoy kaytoshongan nonta esel nen Apo Shiyos ja naysolat nonta bayag da ja kowan to ey, “Sigoradon ẃara‐ak shi biyag, jet emin na too, sigorado ngon mantedimokod ira son si‐kak, jet ikowan shay shayaw sha son si‐kak met laeng.” Kowan nen Apo Shiyos. Isonga emin kito, no ngantoy dingka tayo, songbatan tayo di so nen Apo Shiyos.

No ẃara son si‐kayo i toon ekapoy i pamati to ta eg etod‐an ni kosto, awat jo sotan na too. Karekayo mekisongbat son si‐kato, no diket ipeteg jo sota ẃared nemnem to.

No eg nay‐inges i nemnem ni eshom son si‐kam, eg mo koma bedawen, tep aliẃen si‐kam i apo to, no diket si Cristo. Eg mo koma ikowan ey kosto ono aliẃen kostoy nemnem ni sakey ya baga‐en ja aliẃen si‐kam i apo to. Tep sota apo to bengat i mebedin na mengikowan no kosto ono aliẃen kostoy dingka ni sakey ya baga‐en to. Jet sota maka‐apo son Cristo, eg ira bedawen nen Cristo, tep toka ira pekedsang ni olay.