Матфейица бицараб Рохалил хабар 3
3
3 бетӏер
Яхӏя авараг халкъалда цеве вахъуна
1Гьеб заманаялда Ягьудиялъул гӏицӏаб авлахъалде вачӏуна Яхӏя авараг.
2– Нуж кантӏе, Аллагьасде русса, Зобалазул Парччахӏлъиялъул заман тӏаде гӏунтӏун бугебин! – абун лъазабулеб букӏана гьес.
3«Цо ахӏи буго авлахъалда рагӏулеб: Бетӏергьанасе нух къачӏай, битӏизабе гьесда цебе шагьра!» – Гьединал рагӏаби Аллагьас Ишая аварагасда жиндир хӏакъалъулъ абурав чи вукӏана Яхӏя. 4Яхӏяцайин абуни, варанидул квасул ретӏел ретӏунаан, рачлихъ борчунги букӏана хьвацӏил рачел. Гьес кваналеб жоги букӏана гарцӏги гӏалхул гьоцӏоги. 5Гьесухъе рачӏунел рукӏана Иерусалим шагьаралдаса, Ягьудия улкаялдаса, Иордан гӏурул тӏолабго сверухълъиялдаса гӏадамал. 6Жидерго мунагьал рехсон хадур, Аллагьасде руссун, гьезул мунагьал чуризе, Иордан гӏурул лъадалъ ччун рахъулаан Яхӏяца гӏадамал.
7Лъадалъ ччун рахъизе гӏемерисел фарисеялги саддукеялги жиндихъе рачӏунел рукӏин бихьидал, Яхӏяца гьезда абуна:
– Гӏай, нуж чӏегӏераб борхьил наслу! Нужеде гӏагарлъун бугеб Аллагьасул тамихӏалдаса лъутизе лъица малъараб? 8Нужерго мунагьаздаса руссун, кантӏиялъул гъотӏода пихъ барщизабе. 9Ниж Ибрагьимил наслуялъул лъимал ругилан гаргадизеги ракӏалде ккоге. Гьале дица нужеда абулеб буго: жиндие бокьани, гьал ганчӏаздасанги Ибрагьимил наслуялъул лъимал лъугьинаризе кӏола Аллагьасда. 10Гъутӏбузда гъоркь гӏащтӏи лъун тун бугеблъи лъай нужеда. Лъикӏаб пихъ тӏад бижичӏеб гъветӏ къотӏун цӏадаб лъезе бугебха! 11Дица нуж кантӏизелъун, мунагьал чуризе лъадалъ ччун рахъун, рацӏцӏад гьарулел руго. Амма дида хадув вачӏунев вуго гӏемерго дидаса къудрат цӏикӏкӏарав чи. Гьес тӏаса рахъарал хьитал кодоре росизецин мустахӏикъав гьечӏо дун. Лъадаца гуреб, Илагьияб Рухӏалдалъун ва цӏаялдалъун чурун рацӏцӏад гьарила гьес нуж. 12Гьес бугьун хъатикь ккун буго, жиндирго гьоцӏиб ролъги бацӏцӏад гьабун, гьеб цагърахъе буссинабизе, наккуги ссвинго гьечӏеб цӏадабе бан бухӏила.
Гӏиса Аллагьасул Вас вукӏин загьирлъула
13Гьеб заманаялда Галилеялдаса вахъун Гӏисаги вачӏана Иорданалде Яхӏяца лъадалъ ччун вахъизе. 14Амма Яхӏя разилъулев вукӏинчӏо, гьес Гӏисада абуна:
– Лъадалъ ччун вахъизе дун духъе вачӏине кколеб бакӏалда, мун дихъе щай вачӏарав? – ан.
15Гьесие жавабалъе Гӏисаца абуна:
– Цин гьадин букӏине те. Гьадин щвалде щун тӏубазабизе ккола нилъеца Аллагьас нилъедаса тӏалаб гьабулебщинаб жо.
Гӏисаца абухъе гьабизе разилъана гьебмехалъ Яхӏя.
16Лъадалъ ччун вахъун гьебсагӏат къватӏиве лъугьун вачӏана Гӏиса. Гьебмехалъ зобги кӏибикьизабун, миккидул сураталда боржун бачӏун, Аллагьасул Рухӏ Гӏисахъе рещтӏунеб бихьана. 17Гьале гьаракьги рагӏана зобалаздасан:
– Гьав вуго дие вокьулев дир Вас. Гьесдаса вохун вуго дун!
বর্তমানে নির্বাচিত:
Матфейица бицараб Рохалил хабар 3: AvrNT
হাইলাইট
শেয়ার
কপি
Want to have your highlights saved across all your devices? Sign up or sign in
© Библия таржама гьабиялъул институт Москва 2008