Sɛɡla 4
4
Wejema kan taeh
1N bii, hɛɛ no waa he mɛɛ aa dɛ baɡle,
hé cheɡ deŋne dɛɛ no,
ásɛ dɛɛ no waa mun.
2Wedɛɛɡaa mɛɛ baɡle heyaa
la,
hé ɡel a do he liire bini.
3N fa aa lɔ n nya ne n mɛɛ sie,
dɛ ɡbo ɛ bibaa
dɛ ta ɛ bechala la,
4n mɛɛ fa yon bol
waa dɛɛ baɡ mɛ dɛ ŋɔ,
“Gel waa nɔ ɛɛ liire dɛ bɛ
soh.
Dɛɛ teŋɛ a ta ásɛ dɛ biɡri.
5Kpɔ wejema dɛɛ no waa mun,
do liire a ta, dɛ bɛ waa
maa bola la ta le.
6Bɛ wejema vɛh,
ásɛ o nyiŋi he nɛ.
Nyinu he bambile bwa,
ásɛ o kpɔ nɔn tɔ he nɛ.
7Wejema kan taeh,
anomanta, hwelu.
Waa mun noe ɡwaa
komɛlbwa haa dɔa.
8Duu wejema, ásɛ o ɛɛ nɛnjen,
kpɔ he te pɛlo,
ásɛ o tɛɛ jirima.
9Wɛɛ kpɔ jirimaa
sime kɛŋɔ botidɛɛɡe,
dɛ́ kpɔ pii kɛŋɔ kooɡbɛrɛ
he dɔ jirima.”
10N bie, no n be,
dɛ́ do sie a ta kɛrɛdɛ,
ásɛ dɛ dɔ mkpajaŋ.
11N baɡle wejema,
n kpɔe cheɡ ŋwɛnɛdɛɛɡe
haa kpɔ o ta dɛ́ so.
12Dɛ he dɛ valɛ wejema ne naa,
wobɛlbwa toole dɛ́ tɔe ŋwɛnɛ,
he dɛ chwa kwaraa naa,
haa nakpalaa lɔ.
13Lawɛ waa haa hwela la bini
saŋ bɛlbwa,
dɛ bɛ ɡel a le he nɔn ta,
nyiŋi a ta kɛrɛdɛ,
anee he mkpa.
14Bɛ bela nɛnchɔɡa aa dɛ la la,
bɛ ba waa dɔŋa ɛ.
15Dɛɛ ke he te, bɛ ɡɛ ŋwɛnɛ la
ta kpɔ, ke o ta,
dɛ́ kpɔ he ŋwɛnɛ.
16Gɛ nɛra la aa won chɔ,
dɛ ba ta wechɔɡa ɛɛ,
baa won haŋre, dɛ ba ta
wechɔɡa dii.
17Nyubinikpeɡ ne yoi we-ɛɛlaa
ɛ ba kondikwaa ne sen.
18Nɛra ba wa aa toɡra
waa do kɛŋɔ, bɔr aa
chaahna chɔmbibii
ka tel kɛŋɔ wee aa baŋa.#Dan 12:3
19Kɛ nɛnchɔɡa ŋwɛnɛ te
do kɛŋɔ, bɔr aa bira
kpirkpir ken,
baa kon baa lɔ naa o ta na.#Jɔn 12:35
20N bie, cheɡ deŋne dɛɛ no
waa maa bol baɡle,
dɛɛ no n be kɛrɛdɛ.
21Bɛ ɡel a le he liire ta,
ɡel a do he nyu bini.
22A ɛ mkpa dɛ tɛ banɔ la
baa dɛ no a mun,
dɛ berɛ dɛɛ tɛɛ ba bokpeɡa.
23He dɛ lii wa aa,
dɛɛ nyiŋa kɛrɛdɛ,
waa haa dɛ lii la,
anee hɛɛ ɛ.
24Bɛ waa aa wola kpela ɛɛ bol
bwa,
laa he te kpɔ neɡra wobol
ta.
25Do sie dɛɛ ɛ waa haa dɛ ɛ,
do sie a ta,
dɛ bɛ bobɛlbwa nyiŋi.
26Nyiŋi he vala bini kɛrɛdɛ,
ásɛ dɛ che kiŋkiŋ
bela haa dɛ kaa.
27Laa he te kpɔ wechɔɡa ta,
dɛ́ ɡel he ŋwɛnɛ toɡre.
Bɛ ŋwɛnɛdɛɛɡe la ta le.
বর্তমানে নির্বাচিত:
Sɛɡla 4: mzw
হাইলাইট
কপি
তুলনা করুন
শেয়ার
আপনার সমস্ত ডিভাইসে আপনার হাইলাইটগুলি সংরক্ষিত রাখতে চান? সাইন আপ বা সাইন ইন করুন
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.