Popular Bible Verses from Рим 12

শেয়ার

Ти курымыштышы эдемвлӓлӓ ӹлӓш идӓ тӹнгӓл, а Йымын шанымашыжы маханьы, ма пуры, ма ярал дӓ цилӓ шотыштат яжо, тӹшлӓш манын, ышда уэммӹ доно вашталт мидӓ.

Шӱмбелвлӓ, Йымын пурыжы доно мӹнь тӓмдӓм сарвалем: кӓпдӓм ӹлӹшӹ, святой, ярал жертва семӹнь Йымылан пуда. Тенге тӓ Йымылан шот доно служедӓ.

Уанымашда улы гишӓн сусу лидӓ, нелӹ годым тырхышы лидӓ, со ыдылда.

Худалан ӹшкӹметӹм сӹнгӓш ит пу, худам пуры доно сӹнгӹ.

Иктӹ-весӹдӓм шӱмбелвлӓлӓ нӹжӹлгӹн яратыда, весӹм шотеш пиштӹмӓштӹ икӹжӓк-иктӹдӓм анзылташ цацыда.

Тӓмдӓн яратымашда йӓнг вашт лӓкшӹ лижӹ, худа гӹц карангда, пуры сага пиждӓ.

Кердӹдӓ гӹнь, цилӓ эдем доно тырын ӹлӓш цацыда.

Яратымы шӱмбелемвлӓ, ӹшке верцдӓ кӱсӹм идӓ пӧрӹктӹ, Йымын шӹдӹжӹлӓн вӓрӹм кодыда. Сирӹмӹ: «Кӱсӹм Мӹнь пӧрӹктем, Мӹнь пӧртӹлтем», – попа Господь.

Ялахай агыл, пыт цацышы лидӓ, шокшы шӱм доно Господьлан служыда.

Мӹлӓм пумы благодать доно цилӓлӓндӓ попем: ӹшке гишӓндӓ утла яжон идӓ шаны, кыце келеш, тенге веле шаныда, шот доно, каждыйлан Йымы пумы ӹнянӹмӓш висӓ семӹнь шаныда.

Худалан худа доно иктӹлӓнӓт идӓ тӱлӹ, а цилӓ эдем анзылны ма пуры, тӹдӹм ӹштӓш цацыда.

Иктӹ-весӹдӓ лошты икышын ӹлӹдӓ, идӓ когоэшнӹ, цӹтен ӹлӹшӹвлӓ докы кедӓ, ӹшкӹмдӓм когон ышанеш идӓ шотлы.

А «тышманет шужышы гӹнь, тӹдӹм пукшы, йӱмӹжӹ шоэш гӹнь, йӱктӹ: тидӹм ӹштен, тӹдӹн вуй вӹлӓнжӹ йылышы тылшолым погет».

Тӓмдӓм поктылшывлӓлӓн пурым согоньлыда; пурым согоньлыда, иктӹмӓт идӓ шудал. Ӹвӹртӹшӹ сага ӹвӹртӹдӓ, мӓгӹрӹшӹ сага мӓгӹрӹдӓ.

Иктӓ-машты ак ситӹ годым святойвлӓлӓн палшыда, корныгешӹвлӓм хынала анжыда.

Кыце мӓмнӓн ик кӓпӹштӹ шукы лаштык улы дӓ цилӓн ик пӓшӓм ак ӹштеп, тенгеок мӓӓт, шукын ылына гӹнят, Христос доно ушнен, ик кӓп, а каждый иктӹ-весӹнӓн лаштыкшы ылына.