Popular Bible Verses from 1 Пётр 1

শেয়ার

Мана Деед Эзн Исус Христосин Эцк Бурхнд магтал! Эврәннь хәәрлтәр Бурхн Исус Христосиг әмдрүләд маднд шин җирһл өгсмн. Цуг эн маднд әмд нәәлвр өгчәнә. Тегәд чигн цевр болн төрүц үрдго, цагин аюлар уга болдго, тана төлә теңгр деер хадһлгдсн зөөриг бидн авхар нәәлҗәнәвидн.

Олн зүсн сөрлһнәс көлтә тадн невчкн зуур зовад бәәвв чигн, энүнд байрлтн. Тана иткл йосн иткл мөн гидгнь лавлхин төлә сөрлһнлә харһна. Тана иткл уга кегдв чигн, зуг һалар сөргдҗәх алтнас үнтә. Сөрлһ үзсн тана иткл йосн иткл болҗ үзгднә. Тегәд тер иткл Исус Христосин ирх өдр таднд туурмҗ, магтал, ач өгх.

Ю эс күцәв чигн, таниг дуудсн Бурхнла әдл әрүн кевәр бәәтн. Энүнә тускар Бурхна Бичгт иигҗ бичәтә бәәнә: «Нанла әдл әрүн болтн, яһад гихлә, Би әрүнв».

Соңсхврта үрдүд мет бәәтн. Бурхиг медхин өмн бәәсн му седвәрәр бичә бәәтн.

Тиим учрар ухан седкләрн юм күцәхд белн бәәтн, серглң бәәтн. Исус Христосин ирх өдр таднд өггдх хәәрлтд бүклдән нәәлтн.

Яһад гихлә, «орчлңгин әмтә-киитә юмн ноһан мет, теднә туурмҗ теегин цецгә мет. Ноһан хумхарна, цецгәс хагсад унҗ одна, Зуг Деед Эзнә үг мөңк болна». Эн үг тадн дунд тархагдсн мөн.