Mbunga dhoBayibili dhaNamibia (Bible Society of Namibia) 1986

Apa gha manine Jesusi kughamba yinu yoyiheya yi, ha ningi kwawakathishongero wendi eshi: “Muna yi dimuka eshi, munyima dhomayuwa mawadi ne, mbo ghana kara Paska. Naye Mwanamunu mbana mu tapa ha mu pamarere.”
Munako dhi, hapristeri hokakuru nawamayami hodiko ha kukongwedhire pofotji, murombe waKayifasi ghomupristeri shokuru. Ha nungire dighano pofotji dyokumughombeka Jesusi, ha mu kwate no ha mu paghe. Ene ha ningire eshi: “Kadi mudifeste, maghana gha kara po meman̂anyeno mudiko.”


Oku shime gha karera Jesusi muBetaniya, kuthidyero thaSimoni ghomukayin̂ondwe, ko kwiya mukamadi nokawero komaghadhi ghothiwe mwene ghondhiro, no gha gha terire pamutwi waJesusi. Apa ha yi monine hakathishongero, ha tokotire. Hepura kwawo eshi: “Pashanye ghana kushinyihera gha maghadhi? Munu ne gha kona kughuritha thende yu nomanyinga, no kughatapera kwawahepwe.”
Jesusi gha yicenunine no gha ningire kukwawo eshi: “Nye muna kuyimupakera yinu yi mukamadi mughukukutu? Aye ne ghana tendi thitenda thothiwa kukwange. Hahepwe ne, nenu ha kara roruhe. Ame ne kadi nange mwe roruhe. Pamaghadhi gha ghana teri payirama yange, po ghana tendi makwindukero ghomuvumbekero wange. Shemwa na kumutongwera: Kokuhe ku sha yuvithe mbudhi dhino mukaye, mbana thimwetwedha karo eyi ghana tendi, kate kumavurukero ghendi.”


Ko kuyenda mukathishongero yofotji ghopawashadikumi nohawadi, oyu ha toyire eshi Judas Iskariyoti kwawapristeri hohakuru, no gha ningire eshi: “Yinye yi sho mu nipe, apa sho ni mu hokwere Jesusi?” Awo ko kumuruwera kwawo, masherenyi makumi mahatu. Kutunda po, gha shanine kambenene mwene ko kumuhokora Jesusi.


Mudiyuwa dyokutanga, dyomaghuroto ghothuthun̂unyi, heyire hakathishongero kwaJesusi ha mwipure eshi: “Kupi ghuna haka ku sho tu ka kuroghithere, ghu ka dyere ko makuyerekero ghoPaska?”
Ha hutha Jesusi eshi: “Mu yende mumbara, n̂anyi mu ka wane ghumweya ho mu ka mu tongwere eshi: Muhongi ghana kuninga eshi: ‘Nako dhange ne pepi. Mundhugho dhoye, mo na kushana kukuyarekera nawakathishongero wange, makuyarekero ghoPaska.’ ”
Hakathishongero ha tendire thika di gha wa rawerire Jesusi, no ha rongathanine makuyarekero ghoPaska.


Parunguro, gha hungumanine Jesusi mudyango dyendi kuthidyero, pofotji nawashadikumi nohawadi. Oku ye pakudya, gha ningire eshi: “Shemwa na kumutongwera: Yofotji ghopapenu, ghana kunihokora.”
Awo ha ndundumenine thikuma, no ha tangire kukwipudhura yofotji kuyofotji eshi: “Kadi yame Fumu?”
Ha hutha Ye eshi: “Yoyu ghana kuverera nange ghuroto mukaronga, yo sho gha ni hokore. Mwanamunu ghana kuyenda gha kafe, thika di ha yi mu tjangera. Ene mawe, kwamunu yu ghana kuhokora Mwanamunu. Hasha kwamunu yu, ngo mbadi gha pwire kushamuruka.”
Judasi ghomunyathi wendi gha ningire eshi: “Ngwa yame, Muhongi?” Jesusi ha hutha eshi: “Thika di ghuna kuyighamba!”


Oku shime ha di, ha tumbura Jesusi ghuroto no kukumbera makandadhekero. Munyima gha ghu yondorire no kughutapa kwawakathishongero wendi noman̂ando eshi: “Mu tumbure mu dye, eyi ne yirama yange.”
Ko kutumbura kwendi thinwitho, no apa gha manine kutumera nondapero, gha thi wa pire ghuninga eshi: “Mu nwe mu mwahe, yoyishi agha ne manyinga ghange, manyinga ghoghundambo ghoghupya, agha mbo gha notokera hengi kate kumathigherero ghomaharwero. Na kumutongwera eshi: Kutunda pano mbadi mbo ni nwa karo vinyu, kate mudiyuwa di mbo ni nwa nenu vinyu mughufumu waTate.”
Apa ha manine kwimba dimbo dyodifumanekero, ko kushwagha ha yende kudirundu dyondhwe.


Ko kuninga Jesusi kukwawo eshi: “Mughuthiku ghuno, muna kunimwagha mwaheya. Yapwa kutjanga eshi:
‘Mbo na pagha mudithi,
nondjwi dhomumutanga wendi,
mbo dhina pu kuharan̂anya.’
Ene munyima dhomuvumbukero wange, mbo na mu piterera kuGalileya.”
Po gha ghamberire Petrusi kukwendi eshi: “Ngambi ngo ha kumwaghe wahe, ame ne nokamanana temba mbadi na kona kukumwagha.”
Ha ningi Jesusi kukwendi eshi: “Shemwa na kukutongwera: Mughuthiku ghuno, kughutho ghokwigha ngondovoro, ghuna kunihamura paruhatu.”
Petrusi ha ningi kukwendi eshi: “Ngambi ngo ni fe noye, shemwa mbadi na kona kukuhamura!”
Hakathishongero hamweya, nawo kemo ha ningire.


Munyima gheyire Jesusi nawakathishongero wendi, kudyango di ha tire eshi Getsemani no gha ningire kukwawo eshi: “Mu hungumane pano, tango ni yende ni ka rapere.” Ha shimbi kwendi Petrusi nawana Sebedeghusi hawadi. Ko kutanga kwendi kundundumena no kuguva no gha ningire kukwawo eshi: “Na kasha yira ni fe. Mu kare pano nomurawo nange.”
Ko kuhenya kamanana gha ka tongamene no kukunyumeka rupara rwendi pamuve, ghurapera eshi: “Tate wange, ngo ghuhunga ngo ghu ni kerukithe thinwitho thoyinyanda thino. Wa yi tenda thika di na kuhima me, ene kuyihima yoye keho.”
Ko ka huka kwendi kwawakathishongero, no kuwawana hana rara. Ha ningi kwaPetrusi eshi: “Mbadi mwa kona kurawa nange thitunde thofotji ndi? Mu rawe nomurapere, maghana sho mwingene mumayerekero. Mudhimu ne ghuna himi, yirama ne yina kasha.”
Paruwadi gha yendire gha ka rapere eshi: “Tate wange, ngeshi mbadi sho thi ni kerukithe thinwitho thoyinyanda thi, oku mbadi na thi nu, yihima yoye keho.” Eyi gha ka thighukire, kuna wa wana karo muturo, yoyishi pamurandu ghokukotha po gha remwenine meho ghawo.
Ko kuwathigha karo pithawo, no gha yendire gha ka rapere paruhatu man̂ando ghofotji. Ndani ghana ka huka kwawakathishongero no kuwatongwera eshi: “Shime ha mu rara no kuturumutha ndi? Nako ne dhi neya. Mwanamunu, kuna kumutapa munyara dhawakamaharwero. Mwimane, tu yende. Mu mone, murume yu ghana kunihokora ne pepi ghadi.”


Mu kapupi koko oku shime ha ghamba Jesusi, ko kwiya Judasi yofotji ghopawashadikumi nohawadi. Pofotji nendi, dya karire dikuta dyawanu hohengi, awa ha pwire kutuma kwawapristeri hohakuru nawamayami hodiko noyimende nomiramu.
Munyathi, gha ghambire nawarume wa yothidimukitho. Gha ningire eshi: “Oyu sho ni cumite, yodiye. Mu mu kwate!” Ko kutamba kwendi kwaJesusi ghuninga eshi: “Ghurumere, Muhongi,” ha mu cumita.
Ene Jesusi gha ningire kukwendi eshi: “Hewa, tende thi ghu neyera kukuthitenda!”
Ko kumupindurukera kwawo kughutho, ha mu gahukere Jesusi no kumukwata. Yofotji wa wa ha karire naJesusi, ko kunyenya thimende thendi gha thi pweyure. Ha yeyi kwendi mupika mupristeri shokuru no kukeshura ditwi dyendi. Ha ningi Jesusi kukwendi eshi: “Huthe thimende thoye muthirungo thatho. Yoyishi waheya wa hana hushwamuna thimende, mbana fu kuthimende. Endi ghuna kughayara eshi, ngeshi ha ni kumbera kwaTate maghamweno pan̂anyi‐n̂anyi ne, mbadi gha kona kuniroghithera tumbimba twawaengeli tokupiterera dikumi notuwadi ndi? Ngeshi ngo kemo sho yi kare ne, ngo ngepi sho yi rikanye yitjanga yi ya ninga eshi, yi kone kukara pamuhingo ghu?”
Ya karire yi, apa gha ningire Jesusi kumbunga eshi: “Eyi muna yi nyandera yokwiya noyimende nomiramu eshi na mu ni kwate yira noshondoro ne nye? Diyuwa nodiyuwa na hungumanine mutembeli no kuhonga hanu, ene mbadi mwa ni kwatire. Ene yoyiheya yi yina hokoka eshi, yi rikanye yitjanga yawaporofeta.”
Ko kumuyepeka mo hakathishongero wendi wahe, no ha tjirire.


Hanu wa ha mu kwatire Jesusi, ha mu twarire kwaKayifasi ghomupristeri shokuru, oku ha kukongawedherire hakamarukwaro nawamayami. Petrusi gha mu kutha‐kuthire kokayenda, kate gha kengenine mumarombe ghamupristeri shokuru. Hengena gha ka hungumane kwawakakukunga, pakungengerera edi sho yi yende.
Hapristeri hohakuru nondhango dhodhihe, ha yerekire kushana ghushupi ghombango kwaJesusi eshi ha kone kumupagha. Hengi hashupi hombango wa heyire kughutho, ene nokamanana temba thi ha konine kuwana mumwendi. Kambiru‐mbiru ko kupita karo kughutho hawadi ghuninga eshi: “Murume yu gha ningire eshi: ‘Na kona kudhingununa dhi tembeli dhaNyambi, no kudhitendurura mumayuwa mahatu.’ ”
Ko kwimana mupristeri shokuru gha mwipure eshi: “Mbadi ghuna kukumburura nokamanana temba ndi? Ngepi yoyinongonona yi hana kukuretera wa hanu?” Ene Jesusi ne kupira non̂umbu. Mupristeri shokuru gha ningire kukwendi: “Na kukwedhera kwaNyambi ghomuyumi ghu kone kututongwera eshi: Yowe Kristusi ghoMwana Nyambi ndi?”
Jesusi gha mu huthire eshi: “Thika di ghuna yi ghamba. Karo na kumutongwera eshi:
‘Kutunda pano mbo muna mono Mwanamunu oku
ghana hungumana kurudyo rwaMukangcamu
dhodhihe, no mbo muna mumona apa mbo gheya
mumavuyi ghodiwiru.’ ”
Ko kupayura mupristeri shokuru yivata yendi ghuninga eshi: “Ghana shamuna Nyambi. Nye sho tu nyandere karo hashupi? Muna yuvu n̂anyi‐n̂anyi man̂ando ghodishamu dyokwaNyambi. Yinye muna kughayara pan̂anyi‐n̂anyi mwe?”
Awo ha hutha eshi: “Gha wane kufa!”
Ko kumuthipera kwawo mate murupara no kumupumura nodikonye. Hamweya ha mu ngcamburire no ha ningire eshi: “Owe ne yowe muporofeta, Kristusi! Tu tongwere eshi, dye ghana kupumura?”


Petrusi gha hungumanine muditete panunda, apa gheyire mukamadighana ghomukareri kukwendi ghuninga eshi: “Nowe karo wa karire naJesusi ghoMukagalileya.”
Ene ye gha hamurire kughutho wawahe eshi: “Mbadi na dimuka eyi ghuna kughamba we.” Ko kuyenda kwendi kudikorogho dyoditete. Ha ka mu mona karo mukadhi‐kareri ghumweya no gha ningire kwa wa hemainie po eshi: “Murume yu, gha karire naye naJesusi ghoMukanasareti.”
Petrusi gha hamurire karo wedha eshi: “Mbadi na mu dimuka murume yu me!”
Kapupi kamanana, ko kwiya kwaPetrusi harume wa hemanine po ghuninga eshi: “Yashemwa, nowe karo ghowawo. Munu ne kukona kuyiyuva kurughambitho roye.”
Ko kutanga kwendi kutukadhana no kwedha eshi: “Ava me, mbadi na mu dimuka murume yu!”
Ghufupi podigho popo, ko kwigha ngondovoro. Ko kuvuruka Petrusi eyi gha ningire Jesusi eshi: “Kughutho ghokwigha ngondovoro, ghuna kunihamura paruhatu.” Ko kushwagha kwendi panunda no gha ka dirire thikuma.

শুনুন Mateghusi 26