<div class="version vid3922 iso6393mhw" data-vid="3922" data-iso6393="mhw">
 <div class="book bkMAT">
 <div class="chapter ch18" data-usfm="MAT.18">
 <div class="label">18</div><div class="s1">Mukakupiterera mughufumu</div><div class="r">(Mark 9:33&#8211;37; Luk 9:46&#8211;48)</div><div class="p"> 1Munako dhiya, ko kwiya hakathishongero kwaJesusi nomepwero eshi: &#8220;Yidye po ne ghomukuru mughufumu ghodiwiru?&#8221;</div><div class="p"> 2Aye hetha mwanuke pepi no kumwimeka mukatji kawo 3ghuninga eshi: &#8220;Shemwa na kumutongwera eshi, ngesi ngo mbadi sho mu piruke no kukara yira hanuke, ngo mbadi mbo mwingena mughufumu ghodiwiru no kamanana temba. 4Kehe yu ghokukumbirupitha thinda yira mwanuke yu, yomukuru mughufumu ghodiwiru. 5No yu ghokutambura mwanuke ghokemo muDina dyange, Yame ghana tambura.</div><div class="s1">Matangero ghokumapemukero</div><div class="r">(Mark 9:42&#8211;48; Luk 17:1&#8211;2)</div><div class="p"> 6&#8220;Kehe yu ghokupemukitha yofotji ghopawanuke wa hokutawa muMwange, hasha ne kumughanga nodiwe dyocwa&#8208;cwa muthingo no kumuvukumena mudikuruviya. 7Ngepi ne keho n&#770;eke kukaye, ko kukara noyinu yokupemukitha munu. Yinu yokenge yo kuhokoka ya hokokanga, ene mawe kwamunu yu ghana kuyireta.</div><div class="p"> 8&#8220;Ngeshi ha di kuharuritha dyoko dyoye ngambi dipadhi dyoye kukwange, di tete ko no di shwaghithe papoye. Hasha kukoye kwingena mumoyo nomukongo ngambi noghuhwere, kadi yira wa kukuvukumena mumudiro ghororuheya nomoko ghoye mawadi nomapadhi ghoye. 9No ngeshi diho dyoye ha di kupemukitha kukwange, di korongore mo no di mwaghe. Yoyishi hasha kukoye kwingena mumoyo nodiho dyofotji, kadi yira wa kukuvukumena mumudiro ghodirara nomeho mawadi.</div><div class="s1">Maghanekero ghondjwi ghokuyongara</div><div class="r">(Luk 15:3&#8211;7)</div><div class="p"> 10&#8220;Mwa nyatha yofotji ghopawanuke wa norofotji temba. Yoyi Ame na kumutongwera ghushemwa eshi, haengeli wawo mudiwiru roruheya hana karanga kwaTate. 11Yoyishi Mwanamunu, gheya kukughamwena wa ha yongara.</div><div class="p"> 12&#8220;Ngepi muna kughayara mwe? Ngeshi munu gha muna ndjwi dithere, ha yongara po yofotji, mbadi gha kona kuthigha dhi dhomakumi kwoko nomane nokwoko nodhine mudidyo no kuyenda gha ka shane ghokuyongara ndi? 13Ene ngeshi ghana ka mu wana, shemwa na kumutongwera, ghana kumushamberera kupiterera dhomakumi kwoko nomane nokwoko nodhine dhi dha dhirire kuyongara. 14Kemo ne gha kara mahimeno ghaWihenu ghomudiwiru eshi, pawanuke wa, kadi wa kuyongara po noyofotjie temba.</div><div class="s1">Muyendha ghokuharura</div><div class="r">(Luk 17:3)</div><div class="p"> 15&#8220;Ngeshi ku ghana shinyi muyendhoye thothiyi kukoye, yende ghu ka mu koghaghure oku mudi pithenu mwawadi. Ngeshi ha kutegherera, ghuna mu witha muyendhoye. 16Ene ngeshi mbadi ghana kutegherera, shimbe ko karo yofotji ngambi hawadi pofotji noye. Yoyishi eyi sho mu ghambe, yi katanarere pawashupi hawadi ngambi hahatu. 17Ngeshi shime ha ka twa ndundu, ka yi tongore kumbunga. No ngeshi nawambunga temba mbadi ghana kuwayuva, mu yendithe nowe thihayidena no thika muketethi.</div><div class="p"> 18&#8220;Ghushemwa na kumutongwera: Eyi muna kughanga pamuve, mbo yina pu kughanga no mudiwiru, no yi muna kushutura pamuve, mbo yina pu kushutura mudiwiru.</div><div class="p"> 19&#8220;Shime na kumutongwera eshi: Ngeshi hawadi hopapenu pano pamuve, ha kuyuvu kehe thinu no kuthikumbera, ghana kuthiwapa Tate ghomudiwiru. 20Yoyishi oku hana kukongwedha hawadi ngambi hahatu muDina dyange, Name nawo ni di.&#8221;</div><div class="s1">Methero ghokumakuthigherero</div><div class="p"> 21Heya Petrusi kwaJesusi gha mwipure eshi: &#8220;Fumu, rungatji sho ni thigherere muyendhange oku ghana shinyi kukwange? Kate kurukwoko noruwadi ndi?&#8221;</div><div class="p"> 22Ha mu hutha Jesusi eshi: &#8220;Kutongwera na kukutongwera eshi, kadi rukwoko noruwadi keho, ene makumi kwoko nomawadi, rukwoko noruwadi. 23Po ha ghu rikanyithera ghufumu ghodiwiru pofotji nafumu, oyu ghana kuyuvu nawaguva wendi kukuwadimukitha mukudi wawo. 24Apa gha tangire kurondonona, ko kumuretera kwawo yu gha karire nomukudi ghomarandi mayovi. 25Ene mbadi gha konine kughururwera. Po gharawerire fumu eshi ha mu ghurithe ye namunu wendi nohanendi noyoyiheya yi gha wana. 26Murume yu, gha furumanine kughutho wendi no gha kandererire eshi: &#8216;Ngo ni peko tango karuvedhe, mbo na ruwera yoyiheya.&#8217; 27Fumu gha mu dhekerire n&#770;eke, ha mu thighi gha ka yende no gha dhimithire mukudi.</div><div class="p"> 28&#8220;Eyi gha shwaghire munu yu, ko kuwana muyendhendi oyu gha karire nomurandu kukwendi ghomarandi ghomapu. Ko kumufinyata kwendi gha mu kame pamudyu ghu mu tongwera eshi: &#8216;Tape mukudi ghoye!&#8217; 29Muyendhendi yu gha kuvamine kughutho wendi no ghukuhema eshi: &#8216;Hewa ni yake ko karuvedhe, mbo na kuruwera.&#8217; 30Aye ne mbokapwe, ko kumukoka&#8208;koka popo gha mu tware mudorongo kate gha kuruwere murandu wendi.</div><div class="p"> 31&#8220;Apa ha yi monine hayendhendi yi ya hokokire, ha tokotire thikuma no ha ka thimwetwedherire yoyiheya yi ya hokokire kwafumu wawo. 32Fumu gha tumine ha ka mu rete no gha ningire kukwendi eshi: &#8216;Ghomuringi-ringi we! Mirandu dhodhiheya dhiya na kuthigherera, yoyishi ghuna ni kanderera. 33Mbadi wa kona kudhekera n&#770;eke muyendhoye, kenge di na kudhekera n&#770;eke me ndi?&#8217; 34Fumu gha fudhakanine thikuma, ho gha mu tapire ha mu shinye kate gha kuruwere murandu ghoghuhe.</div><div class="p"> 35&#8220;Kemo mbo gha tenda nenu naye, Tate ghomudiwiru, ngeshi kehe yu kadi wa kuthigherera muyendhendi mumutjima.&#8221;</div>
 </div>
 </div>
</div>

Mbunga dhoBayibili dhaNamibia (Bible Society of Namibia) 1986

Munako dhiya, ko kwiya hakathishongero kwaJesusi nomepwero eshi: “Yidye po ne ghomukuru mughufumu ghodiwiru?”
Aye hetha mwanuke pepi no kumwimeka mukatji kawo ghuninga eshi: “Shemwa na kumutongwera eshi, ngesi ngo mbadi sho mu piruke no kukara yira hanuke, ngo mbadi mbo mwingena mughufumu ghodiwiru no kamanana temba. Kehe yu ghokukumbirupitha thinda yira mwanuke yu, yomukuru mughufumu ghodiwiru. No yu ghokutambura mwanuke ghokemo muDina dyange, Yame ghana tambura.


“Kehe yu ghokupemukitha yofotji ghopawanuke wa hokutawa muMwange, hasha ne kumughanga nodiwe dyocwa‐cwa muthingo no kumuvukumena mudikuruviya. Ngepi ne keho n̂eke kukaye, ko kukara noyinu yokupemukitha munu. Yinu yokenge yo kuhokoka ya hokokanga, ene mawe kwamunu yu ghana kuyireta.
“Ngeshi ha di kuharuritha dyoko dyoye ngambi dipadhi dyoye kukwange, di tete ko no di shwaghithe papoye. Hasha kukoye kwingena mumoyo nomukongo ngambi noghuhwere, kadi yira wa kukuvukumena mumudiro ghororuheya nomoko ghoye mawadi nomapadhi ghoye. No ngeshi diho dyoye ha di kupemukitha kukwange, di korongore mo no di mwaghe. Yoyishi hasha kukoye kwingena mumoyo nodiho dyofotji, kadi yira wa kukuvukumena mumudiro ghodirara nomeho mawadi.


“Mwa nyatha yofotji ghopawanuke wa norofotji temba. Yoyi Ame na kumutongwera ghushemwa eshi, haengeli wawo mudiwiru roruheya hana karanga kwaTate. Yoyishi Mwanamunu, gheya kukughamwena wa ha yongara.
“Ngepi muna kughayara mwe? Ngeshi munu gha muna ndjwi dithere, ha yongara po yofotji, mbadi gha kona kuthigha dhi dhomakumi kwoko nomane nokwoko nodhine mudidyo no kuyenda gha ka shane ghokuyongara ndi? Ene ngeshi ghana ka mu wana, shemwa na kumutongwera, ghana kumushamberera kupiterera dhomakumi kwoko nomane nokwoko nodhine dhi dha dhirire kuyongara. Kemo ne gha kara mahimeno ghaWihenu ghomudiwiru eshi, pawanuke wa, kadi wa kuyongara po noyofotjie temba.


“Ngeshi ku ghana shinyi muyendhoye thothiyi kukoye, yende ghu ka mu koghaghure oku mudi pithenu mwawadi. Ngeshi ha kutegherera, ghuna mu witha muyendhoye. Ene ngeshi mbadi ghana kutegherera, shimbe ko karo yofotji ngambi hawadi pofotji noye. Yoyishi eyi sho mu ghambe, yi katanarere pawashupi hawadi ngambi hahatu. Ngeshi shime ha ka twa ndundu, ka yi tongore kumbunga. No ngeshi nawambunga temba mbadi ghana kuwayuva, mu yendithe nowe thihayidena no thika muketethi.
“Ghushemwa na kumutongwera: Eyi muna kughanga pamuve, mbo yina pu kughanga no mudiwiru, no yi muna kushutura pamuve, mbo yina pu kushutura mudiwiru.
“Shime na kumutongwera eshi: Ngeshi hawadi hopapenu pano pamuve, ha kuyuvu kehe thinu no kuthikumbera, ghana kuthiwapa Tate ghomudiwiru. Yoyishi oku hana kukongwedha hawadi ngambi hahatu muDina dyange, Name nawo ni di.”

Heya Petrusi kwaJesusi gha mwipure eshi: “Fumu, rungatji sho ni thigherere muyendhange oku ghana shinyi kukwange? Kate kurukwoko noruwadi ndi?”
Ha mu hutha Jesusi eshi: “Kutongwera na kukutongwera eshi, kadi rukwoko noruwadi keho, ene makumi kwoko nomawadi, rukwoko noruwadi. Po ha ghu rikanyithera ghufumu ghodiwiru pofotji nafumu, oyu ghana kuyuvu nawaguva wendi kukuwadimukitha mukudi wawo. Apa gha tangire kurondonona, ko kumuretera kwawo yu gha karire nomukudi ghomarandi mayovi. Ene mbadi gha konine kughururwera. Po gharawerire fumu eshi ha mu ghurithe ye namunu wendi nohanendi noyoyiheya yi gha wana. Murume yu, gha furumanine kughutho wendi no gha kandererire eshi: ‘Ngo ni peko tango karuvedhe, mbo na ruwera yoyiheya.’ Fumu gha mu dhekerire n̂eke, ha mu thighi gha ka yende no gha dhimithire mukudi.
“Eyi gha shwaghire munu yu, ko kuwana muyendhendi oyu gha karire nomurandu kukwendi ghomarandi ghomapu. Ko kumufinyata kwendi gha mu kame pamudyu ghu mu tongwera eshi: ‘Tape mukudi ghoye!’ Muyendhendi yu gha kuvamine kughutho wendi no ghukuhema eshi: ‘Hewa ni yake ko karuvedhe, mbo na kuruwera.’ Aye ne mbokapwe, ko kumukoka‐koka popo gha mu tware mudorongo kate gha kuruwere murandu wendi.
“Apa ha yi monine hayendhendi yi ya hokokire, ha tokotire thikuma no ha ka thimwetwedherire yoyiheya yi ya hokokire kwafumu wawo. Fumu gha tumine ha ka mu rete no gha ningire kukwendi eshi: ‘Ghomuringi-ringi we! Mirandu dhodhiheya dhiya na kuthigherera, yoyishi ghuna ni kanderera. Mbadi wa kona kudhekera n̂eke muyendhoye, kenge di na kudhekera n̂eke me ndi?’ Fumu gha fudhakanine thikuma, ho gha mu tapire ha mu shinye kate gha kuruwere murandu ghoghuhe.
“Kemo mbo gha tenda nenu naye, Tate ghomudiwiru, ngeshi kehe yu kadi wa kuthigherera muyendhendi mumutjima.”

শুনুন Mateghusi 18