Tepehuán del Norte - GP (NT) NonDrama

Tepehuán del Norte - GP (NT) Drama

Dai gokiïrï aipako aimïraitadai Suxi xako Galileïrï tïgidu oidigi dai ka maiti ipïrhi ix imiagi Judeamu. Go judidiu bhaitï gukakami mïï Judeana óídakami mua ïrhiditadai kaxkïdï mai imia ïrhiditadai Suxi gamoko. Dïï ka miadaimitadai go bagimi ami Judeana ix tuigako go judidiu ibuadana ikusai baidi susukurhidï Suxi aagidi sai gï agaitadai ix imia ïgai gamoko. Itïtïdai ïgai go Suxi,
—Maiti gï agai ix mosïkaxi tanai Galileïrï biiyagi aapi. Imiñi Judeamu bhaiyoma bai gï mamaatïrdamiga nïijadana ibuadatai aapi naana maaxi maaxidaragai gupukami. ¿Mai ix ipïrhidi aapi ix kïïga gï maatïkagi bïïxi óídakami xorai aapi?— itïtïdai. —Gï agai tudu ix mai ïxto ibuadagi aapi gï aaduindaga di. Ix ïr buaboikagi tudu ix ibuayi aapi gupukami maaxidaragai gï agai ix bïïxi óídakami buitapi ibuada aapi— itïtïdai.
Potïtïdai susukurhidï Suxi parunaitai. Tomarhi susukurhidï mai buaboidaitadai kaxkïdï.
Dai Suxi itïtïdai susukurhidï,
—Aanï in bïïtarï mai kia ayi ixtuigako imiagi gamoko. Dïï gia aapimï gïn bïïtarï kïïgadu ix iimia aapimï tomax xuduku— itïtïdai. —Mai tipu tudu ixtukïdï gïn kïïdadagi odami dïï aanï gia gin kïïdai ïgai. Maaxi aagaiña aanï xïïxi ïr soimaaxi ibuadami ïgai dai kaxkïdï gin kïïdai— itïtïdai Suxi. —Iimibïrai aapimï gamo dana bagimiïrï tudu— itïtïdai. —Aanï mai imimu kia, mai kia ayi ixtuigako ix imia aanï kaxkïdï— itïtïdai.
Potïtïdai Suxi susukurhidï daidi bhodïrï mos amaxi bii Galileïrï lachi kia. Dïï gia gokiïrï ka iimïkai susukurhidï maigo dana bagimiamu, aidï gia jii go Suxi ïpï dïï mos ïïgi jii ix mai maatïkana odami. Daidi go bhaitï gukakami judidiu ami darakatadai bagimiana dai aipako gaagaimi go Suxi dai gatïkakaimi odami sa bhai mai nïiditadai. Daidi go odami ka mos dudusurhi aatagaitadai aipakoga aagaitai go Suxi. Ïïmoko pokaitiña sai kïï tuiga go Suxi dai jaa pokaitiña sai mos buirumadai ïgai óídakami. Go odami ïbhïiditadai go judidiu bhaitï gukakamigadï dai maiti ipïrhiditadai ix kaïkagi aagaitai ïgai go Suxi ix kaxkïdï duudusurhi ñokaitadai ïgai aipakoga.

Dai aidïxi kia biïgatadai tajukami ix ugitiagi go bagimi sai baa go Suxi go gïï kiupiïrï mïï Jerusalenïrï dai gamaa ñoki. Daidi go bhaitï gukakami judidiu mai tïtïïgaitadai ixtumaxi gïn tïtïgitoagi kaïkai aatagidï go Suxi daidi ikaiti,
—¿Ix dukatai máí mos ïxi aatagi? Tomarhi ojiïrï mai daiba gobai di— ikaiti go bhaitï gukakami judidiu.
Dai Suxi itïtïdai aidï,
—Diuxi otosadï aanï dai ïgai gin aagidimi ixtuma ñokiada aanï. Mai xu ïïgi gin tïgibudagakïdï ñokai aanï tudu— itïtïdai. —Daiñi, odami ix makïdï kïïga ïïgiada ïrhidi Diuxi kïïga maatïkamu sa bhai ix Diuxiañdïrï ñokai aanï. Daiñi, kïïga gï maatï sai ïïmo odami ix makïdï ïïgi tïgibudadïkïdï gamaakai ñoki bupuirumadai odami ïïgi gïn bïïtarï ñokaitai dai ipïrhiditai ix odami kïïgakïrï gïn nïijadagi kaïkatai aatagidï. Dïï gia ix makïdï ïr ojotoxikami mai pomaaxi ibuayi. Ïgai ñokaiña ïmai bïïtarï ipïrhiditai ix odami kïïgakïrï nïijadagi ix makïdï gaotoi dai mai xu ix kïïgakïrï nïijada ïïgi ïgai ix makïdï ñokai, kaxkïdï kïï sïïrhi ñokai ïgai dai mai bupuirumadai odami. Podukai tudu ñokai aanï ipïrhiditai ix odami kïïgakïrï nïijadana Diuxi ix makïdï gin otoi dai mai xu ñokai aanï ipïrhiditai ix kïïgakïrï gin nïijada odami aanï. Kaxkïdï kïïga gï maatï sai aanï mai bupuirumadai odami. Aapimï pobïnïrhidi sai aanï mai ïïgidi go sïïrhikami ix makïdï gïn biturhi go Moiseskaru dïï bhaiyoma ïïgi aapimï tomarhi ïmadutai mai kïïga ïïgidi gobai. ¿Ix tuixidï gin mua ïrhidi aapimï?— itïtïdai Suxi.
Daidi go bhaitï gukakami judidiu potïtïdai,
—Aapi Suxi bia ïmo diabora tïañikarudï dai po kaiti di. Xadïrï gï muana aatïmï— itïtïdai.
Daidi Suxi itïtïdai,
—Mos arhi ïmo maaxidaragai idui aanï ibhïxtaragai tasïrï dai ka soi gïn ïrhidi aapimï. Daiñi, aapimï aatabuayi ibhïxtaragai tasïrï ïpï xïïxkadï gacircuncidandoagi aapimï gïn maamara ibhïxtaragai tasïrï. Go Abraam ïr ïgai dai gïn biturhi gobai dai gokiïrï go Moiseskaru gïn tïjai ïpï mïsai ibuadana go circuncision. Daiñi, aapimï toma xuduku aatabuayi gacircuncidanduitai gïn maamara tomaxi ïr ïmo ibhïxtaragai tasïrïkagi dai gobai maiti ïr soimaaxkami. Xadutuada ïrhidi aapimï go Moises sïïrhikamigadï dai pobuayi. Dai aanï aatadui ibhïxtaragai tasïrï ïpï duadikai aanï ïmo kïïrhi dai gobai ïpï maiti ïr soimaaxkami kaxkïdï maiti gï agaitadai ix bhakoikagi aapimï gokïdï— itïtïdai. —Kïïga abïr gïn tïtïgitoka tudu ix bhai ïr buaboi sai mai xadutudai aanï go ibhïxtaragai tasai. Maiti gï agai ix gïpiïrï gin bupada mai kïïga gïn tïgitokatai. Kïïga abïr gïn tïgitoka aapimï ixtumaxi ïr sïïrhi tudu— itïtïdai Suxi go judidiu bhaitï gukakamigadï.
Dai go odami Jerusalenïrï óídakami ikaiti kaïkatai ñokidï Suxi,
—¿Maiti ix tudu idi ïr go kïïrhi ix makïdï gaagai go judidiu dai mua ïrhidi?— ikaitiña. —Daiñi, gobai toma xakoga gamaakai ñoki toma xorai buitapi dai bïïxkïrï go judidiu mai bui ñokai toma lïïchi— ikaitiña. —Maatï ix go bhaitï gukakamigadï go judidiu pobïnïrhidi ïpï ix gobai ïr Ga Bhaitï kïakami dai kaxkïdï mai bui ñokai. Dïï kïïga maatï aatïmï baadïrï oidakami idi kïïrhi dïï xïxkadï dibiagï go Ga Tïanïdami odami as mai maatïmu xajadïrï oidakami ïgai, kaxkïdï ¿Dukatai ïr ïgaikana idi?— ikaitiña odami.
Dai Suxi gïïgïrï ño go gïï kiupiïrï dakatai dai potïtïdai go odami,
—Aapimï po bïnïrhidi mïxi kïïga gin maatï xorai aanï dai xajadïrï dibia aanï ïpï, dïï maiti gin maatï aapimï. Daiñi, mai xu mos ipïldakai dibia aanï. Ïmai gin otoi bhaiyoma dai aapimï mai maatï xorai ïgai. Go makïdï gin otoi tomarhi ïmo imidagai mai buirumadai odami dai aanï kïï maatï ïgai. Ïgai ïmadï dajatadai aanï tudu dai ïgai bhaigobai gin otoi— itïtïdai.
Aidïpïrï go judidiu bhaitï gukakamigadï bhïiya ïrhiditadai go Suxi dïï maiti ixtui, mai kia ayitadai ixtuigako gï bhïituda ïgai kaxkïdï. Dïï bïïxkïrï jaa mui gia buaboitu go Suxi daidi ikaitiña,
—Idi gia ïr buaboi ix ïr go Ga Tïanïdami ïrhi aanï— ikaitiña. —Xadïrï oidakana ïmai ix ibuadagi po ïï gïgïrdukami maaxidaragai ix makïdï ibuayi go Suxi— ikaitiña buaboidaitai.
Daidi ïïmoko go bhaitï gukakami judidiu ïr go fariseokatadai dai ïïmoko ïr bhaitï gukakami dadaxdadami dai ïgakoi ïgai kaïkai aatagidï gobai dai otoi sandaru sai mïï bhïna go Suxi.
Daidi Suxi potïtïdai go odami,
—Mosïkaxi chïki tasai dakamu aanï tami gïn ïmadï dai bhodïrï ïpamu noragimu aanï dai ïmadï dakamu ïpamu go makïdï gin otoi bhaigobai— itïtïdai. —Dai aapimï mos gin gaagadamu dïï maiti gin tïïgimu. Maiti ixtutiadamu aapimï ix iimiagi amïka xako dakamu aanï kaxkïdï— itïtïdai.
Daidi go judidiu bhaitï gukakami ïïgi gïn tïkakatadai aipako daidi ikaiti,
—Mai maatï aatïmï ix tumaxi gïr aagida ïrhidi Suxi. ¿Xakoga imïna gobai ix mai tïïgana aatïmï?— ikaiti. —Maatï ix imia gobai mïkaxi dai dibida agai go jaa judidiu saagida ix makïdï ïr griego ñokadami. Maatï ix gatïïgida agai aatagi go óídakami maigobai ix makïdï maiti ïr judidiu ïpï— ikaiti. —Xorai maatï ix tïiya ïrhidi Suxi aidï aagaitai sai gaagadamu aatïmï ïgai dai mai tïïgimu, dai sai mai bhaiga aatïmï ix iimiagi mïïka xako imi agai ïgai— ikaiti go judidiu bhaitï gukakami.

Dai go kugatïrï tasïrï go bagimiïrï bamioma ïr namïakïdï. Dai aidï kugatïrï tasïrï go Suxi kïkiba dai gïïgïrï ño dai potïtïdai go odami,
—Xorai tonokoñikagi sai gin urabana sai yïïdana go sudagi ix makïdï aanï maakimu. Potudu kaiti go ojixikami ïïki sai xorai gin buaboitudagi ibhïgadïrï ïrabiadïrï busaimu go sudagi ixtukïdï kïïgakïrï óídakana odami bïïxkïrï bïïtarï— itïtïdai Suxi.
Dai Suxi agaitadai go Diuxi Ibhïgadï gubukarhigadï ix ïr go sudagi gï dukami dai sai busi agai gobai odami iibhïadïañdïrï ïpïan dukai ix go sudagi busanïi ïmo babikiañdïrï. Dai go Diuxi Ibhïgadï ïr ix makïdï dibiagai odami iibhïadïana buaboitudakai ïgai. Dïï aidïpïrï ix pokaiti Suxi mai kia otoitadai ïgai Diuxi Ibhïgadï. Gï agaitadai kia ix imiagi Suxi tïbagiamu xako oidaka agai ïmo gïdukami xadutudaragai ïgai bïïtarï. Dai ka imïkai aidï gia otosa agaitadai ïgai Diuxi Ibhïgadï.
Kïïga muidukatadai odami ami aidï dai ïïmoko ikaitiña,
—Idi gia ïr buaboi ix ïr go Aagadami Diuxi Ñokidï ix makïdï nïnïrakana aatïmï ïïki abhiadïrï— ikaitiña. Dai jaa ikaitiña, —¡Idi gia ïr go Ga Tïanïdami ïrhi aanï!— Dai jaa ikaitiña, —Cho ïrhi aanï. Xadïrï Galileïrï oidakamikana go Ga Tïanïdami— ikaitiña. —¿Mai ix tudu pokaiti go ojai sai go Ga Tïanïdami ïr pipiixaradï ka agai go Rey Dabidkaru dai sai Bhelenïrï busi agai? Ami tudu Bhelenïrï ïr busaikami Dabidkaru— ikaitiña ïïmoko.
Ïïmoko ïmo dukai aagai bai jaa ïma dukai, aagaitai go Suxi. Dai jaa mos ipïrhiditadai ix gï bhïitudagi go Suxi dïï modukai maiti gï bhïitu.

Daidi go sandadaru ix makïdï bhïiyi agaitadai go Suxi ïpamu nonora mïïka xako darajatadai go fariseos ïmadï go bhaitï gukakamigadï go dadaxdadami. Ïgai tudu otoitadai go sandadaru sai mïï bhïna go Suxi. Baidi go fariseos potïtïdai go sandadaru,
—¿Tui mïxi mai bhïiyi go Suxi? Gï agaitadai ix buapagi aapimï bhaigobai— itïtïdai.
Baidi go sandadaru itïtïdai,
—Arhiïxi kïïga ñokai ïgai. Mai tipu xorai pomaaxi ñokadagi— itïtïdai.
Daidi go fariseos itïtïdai,
—¿Aapimï ix kaxi gïn buirumadagi go Suxi ïpï?— itïtïdai. —¡Daiñi, mai tipu tomarhi ïmoko gïr dudunukami dai tomarhi ïmoko gïr aaduñi fariseo ix makïdï buaboitudagi go Suxi! Dai go odami ix makïdï oidatukïi go Suxi mos ïr pupuirugami mai maatïkatai go sïïrhikami dai gobai gïgïbitulda agai Diuxi— itïtïdai.
Dai bhodïrï ño ïmo fariseo Nikodemo tïgidukami. Ïgai ïr ix makïdï dibijitadai go Suxi ïmo imidagai tukarï. Daidi itïtïdai ïgai go gaa fariseos,
—¿Gïr maakai ix oigaragai gïr sïïrhikamiga ix mos ïïgikïdï tañiagi gïgïbituldagi ïmo kïïrhi mai tipukatai ñoki ïgai bui ix tuma soimaaxi idukami ïgai?— itïtïdai.
Daidi go gaa fariseos itïtïdai aidï,
—¿Aapi pïx tudu ïr Galileïrï oidakami ïpï ïpïan dukai go Suxi? Daiñi, gï aagai ix kïïga gï tïgito nïñiada aapi Diuxi ñokidï, ami ojixi sai tomarhi ïmadutai go aagadami Diuxi ñokidï ïr Galileïrï oidakami kaxkïdï go Suxi dukatai ïr aagadamikana Diuxi ñokidï. Ïgai ïr Galileïrï oidakami di— itïtïdai go gaa fariseos.
Dai amaxi ukami bii go aatagi dai ka bïïxkatai nonora kiikidïrï.

Listen to Juan 7