If you would like a copy of this version please contact info@davaraudiobibles.org

Bhadrawahi Bible, CC-BY-SA-4.0, Beyond Translation. (Text)
Bhadrawahi New Testament Audio Bible, CC-BY-SA-4.0, Davar Partners International, Hosanna/Faith Comes by Hearing, 2021. Bhadrawahi Old Testament Audio Bible, CC-BY-SA-4.0, Davar Partners International, Beyond Translation, 2026. (Audio)

Bhadrawahi Bible

Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.

एन्च़रां अम्बर ते धरती ते ज़ैन किछ तैस मांए तैसेरू बनानू पूरू भोइ जेवं। ते परमेशरे अपनु कम ज़ैन तै केरतो थियो सत्तोवं दिहाड़े पूरू कियूं, ते तैने अपने कियोरे सारे कम्मे करां सत्तोवं दिहाड़े आराम कियो। ते परमेशरे सत्तोवं दिहैड़ी बरकत दित्ती ते पवित्र ठहराई; किजोकि तैस मां तैने रच़ना केरतां अपने सारे कम्मे करां आराम कियो। अम्बर ते धरती बनानेरे बारे मां ज़िक्र एन्च़रां सेइं आहे कि ज़ैखन तैना पैदा भोआं मतलब ज़ैस दिहाड़े यहोवा परमेशरे धरती ते अम्बर बनावं। तैखन मैइदानेरो कोई पौदो धेरती पुड़ न थियो, ते न मैइदानेरो कोई निकड़ो बुट लग्गोरो थियो, किजोकि यहोवा परमेशरे धेरती पुड़ झ़ड़ी न थी बखावरी, ते धेरती पुड़ ज़मीनदारी केरनेरे लेई मैन्हु भी न थियो। पन धुंध ज़मीनी मरां निस्तां धेरती पुड़ पेती थी ज़ैस सेइं सारी ज़मीन सेगोती थी।

तैखन यहोवा परमेशरे आदम धेरतरी मित्ती सेइं बनाव, ते तैसेरे नक्‍के मां ज़िन्दगरी सांस छ़डी; ते आदम ज़ींतो प्राणी बेनि जेव। ते यहोवा परमेशरे पूर्वेरे पासे, अदने मां अक बाग लाई; ते तैड़ी आदम ज़ै तैनी बनेवरो थियो तै तैड़ी रख्खो। ते यहोवा परमेशरे धेरतरे मरां सब किसमां केरे बुट लाए, ज़ैना हेरने मां खूबसूरत ते ज़ैन केरे फल खाने मां रोड़ेन, ते बागरे मझ़ाटे ज़िन्दगरो बुट ते भले ते बुरे ज्ञानेरो बुट भी लाव।
तैस बागी सगनेरे लेई अक बड्डो दरिया अदने मरां निस्सो ते तैट्ठां अग्रोवं बेगतां च़ेवर दरिया बने। पेइले दरियारू नवं पीशोने, ई तैए ज़ै हवीला नंव्वेरे सारे मुल्खे मां फैलोरोए ज़ैड़ी सोन्नू मैलते। तैस मुल्खेरू सोन्नू बड़ू रोड़ू भोते; तैड़ी मोती ते सुलैमानी घोड़ भी मैलतन। ते दूइयोवं दरियारू नवं गीहोने; ई तैए ज़ै कूशेरे सारे मुल्खे मां फैलोरोए। ते ट्लेइयोवं दरियारू नवं हिद्देकेले; ई तैए ज़ै अश्शूरेरे पूर्वेरे पासे बगते। ते च़ेवरोवं दरियारू नवं फराते।
तैखन यहोवा परमेशरे आदम नेइतां अदनेरे बागी मां रख्खो, कि तै तैस मां कम केरे ते तैसेरी देखभाल केरे। ते यहोवा परमेशरे आदमे ई हुक्म दित्तो, “तू बागी मरां कोन्ची भी बुट्टेरो फल खेइ सकतस; पन ज़ै बुट रोड़े-बुरेरू ज्ञान देनेबालो, तैसेरो फल तू कधी न खेइयां; किजोकि ज़ैस दिहाड़े तू तैसेरो फल खालो तैस्से दिहाड़े तू ज़रूर मेरि गालो।”
फिरी यहोवा परमेशरे ज़ोवं, “आदमेरू अकैल्‍लू रानू ठीक नईं; अवं तैसेरेलेइ अक एरहो मद्दतगार बनेइलो ज़ै तैस सेइं मेल खाए।” ते यहोवा परमेशरे धेरती पुड़ेरे सब किसमां केरे जंगली जानबर, ते अम्बरेरे सब किसमेरां च़ुड़ोलू बनेइतां आदमे कां आनां कि हेरे, कि तै तैन केरू कुन-कुन नवं रखते; ते ज़ैस-ज़ैस ज़ींते प्रैणी जो ज़ैन-ज़ैन नवं आदमे ज़ोवं तैन्ने तैसेरू नवं भोइ जेवं। एस तरीके सेइं आदमे सब किसमां केरे पैलतू जानबर, ते अम्बरेरां च़ुड़ोलू, ते सब किसमां केरे जंगली जानबरां केरू नवं रख्खू; पन आदमेरे लेई कोई एरहो मद्दतगार न मैल्हो ज़ै तैस सेइं मेल खाए। तैखन यहोवा परमेशरे आदमे पुड़ भारी निड्ल छ़ेडी दित्ती, ते ज़ैखन तै झ़ुल्‍ली जेव तैखन तैने तैसेरी अक दल्‍लोड़ी केढतां तैसेरी ठैरी मास भरू। ते यहोवा परमेशरे तै दल्‍लोड़ी ज़ै तैने आदमे मरां कढोरी थी, तैसारी अक कौन्श बनाई; ते तै आदमे कां आनी। तैखन आदमे ज़ोवं, “हुनी ई मेरी हेड्डन मरां हड्डी ते मेरे मासे मरां मासे; एल्हेरेलेइ इसेरू नवं नारी भोल्हु, किजोकि ऐह नरे मरां निस्सोरीए।” एल्हेरेलेइ मड़द अपने अम्मा-बाजी करां अलग भोइतां अपनि कौन्शी सेइं मिलोरो रालो ते तैना दूईये अक जान भोल्हां। आदम ते तैसेरी कौन्श दूईये नग्गां थियां, पन शरमातां न थियां।

Listen to उत्पत्ति 2