An tì kə te ko, Hɛlɔ̀d, tɔɔŋ ghùw wəla ù fə̀ lo tuw ko am bà kə enaʼ kə̀ li ko am mbùʼ è Galèlîi n zuw tsughu zwɔ̂ŋ u Yɛso, ù n dzɛ̀ â kɔ̀ɔ ŋ wə̄n mò enyəa, “Wə̄n lǒ Dzɔ̌n Fùghùu mùghù ŋ Kə̀zə̀ ù zòo nughù kɔʼ alo evʉ̄; zən lǒ e ghee ù ki dwaʼa wo alefwàʼ ghəa ghəla u fwàʼa â ghè ghò.”
À n lo êzə̀ mo Hɛlɔ̀d mafə̄ tsəghàsò lâŋ kò enyəa ghe kûm Dzɔ̌n alo tətsāʼ, ghe tum an ndùghùtsāʼ enyəa a so à lò ghəa e wìzən ù lì ghe fə̀ tɔɔŋ tsəgha enyəa à lǒ Hɛ̀lodìa. Wìzən wən fə̀ niī tsəgha Felèp, wàatsele ù Hɛlɔ̀d, Hɛlɔ̀d m bùghò tsʉ̀ʉn nì nùghù è kɔʼ. Hɛlɔ̀d fə̀ ghəa ghən ghəŋlo a zəŋò Dzɔ̌n, bòʼ Dzɔ̌n màʼà mgbɛɛ̄ kpoʼō zeē ko â wə̄n enyəa, “À tɔ̀ʼ lǒ ghəa è biigh zo â ghù aletsʉ̀ʉn nî wi ù wàatsùghò.” Hɛlɔ̀d fə̀ mgbaŋa kii ləghaa ko nû alewi Dzɔ̌n, ù ŋ kuuwn tsəŋo ghaʼa àghì, ghe màʼâ fə̀ kwo Dzɔ̌n tǒ ghùwshʉ̀ghà.
A m bughò ghuw ghə edzə̄ a Hɛlɔ̀d à tsəghà kpe wo, wɛ fə Hɛ̀lodìas fə̀ zən fə m bən laaŋ tsughu a fughu an sə kə aghì enyə, bǐibǐi tə ŋ kɔʼ Hɛlɔ̀d, ù n to tsughu kətō, kɛ̀ tsughu enyəa abugho wɛ ù te bvʉ ko kwò kò, e fughuu nù.
Zə̂ n tsʉ̀ tsùghu wɛ fə te fo enyəa fə bvʉ̂a ndûw tuw Dzɔ̌n fùghùu mùghù ŋ Kə̀zə̀, fə dzɛ̀ â Hɛlɔ̀d enyəa, “Êzəŋo aŋghəa a ti fɛ, bùghò mugho â tuw kə Dzɔ̌n Fùghùu mùghù ŋ Kə̀zə̀ ko aŋ kwônɛ̀lɛ.”
Ghue wə m kpuw lɔŋe tsughu dəŋ chi ko enyə̄, ù n tsə̀ghàsò tsùghù kəlâŋ enyəa e doʼò ko aŋghəa zən fə tə bvʉ wo, ù màʼâ fə̀ lo mò ù ŋ kɛ̀ bòʼnlo an sə kə aghì a dzə̀m. Ù n tum tsughu aghî, ghe n ndûw gbò wò tuw kə Dzɔ̌n an ndùghùtsāʼ. Ghe m bòʼò wò sùghò â tuw kə te ko aŋ kwònɛ̀lɛ, bùghò fughu wò â wɛ̂ɛzən vʉ̀, wɛ vʉ ndùw fùghù ndùw â zə̀. Tsə̀təndə̄ghā tə Dzɔ̌n tə n daŋso bùghò bòʼò tsə̀la tsughu gwən e wə̄n; ghe n ndùw dzɛ̀ ndùw ghəa a te gho â Yɛso.


A m bùghò Yɛso n zuw tsughu ghəa a te gho, ù n daŋso nì kɔʼ kəkwə̀n ndùw sàŋe dòʼò ndùw wə̄n à nəŋ ko. Ndə̀mà tə aghì tə̀ n zuw tsughu enyəa ù a fughu, ghe n zəghàan tsùghû nàʼà ŋ ghee, səa kwuu ndùw ko dzì alo kəghùw, ghe dzûum nduw wə̄n. A m bùghò ù sə tsughu alo kəkwə̀n, ù ŋ kòʼ saʼ kə aghì kə te ko, se zə ŋ kwu wə̄n a zəŋò ghee, ù m baaŋ tsughu ghəla ghe fə̀ dzaŋā a te.
A m bùghò tsuʼ u nyəŋo nyəghàan wo, tsə̀təndə̄ghā tə̀ m bùghò dzɛ̀ â wə̄n enyəa, “Tsuʼ wə ndùw, a fɛ lo sugho an saŋe kə kəlùʼù, dzɛ̀ enyəa ghî à nughù nyəā ndûw an nàʼà mən ghe ndûw zuū kɔʼ fəgha kə̀ zəa ko aŋ ghùe e ghee.”
Yɛso n dzɛ̀ â ghee enyəa, “Ghe ki yo alendòʼò nughù; fughu tsughu nlǒ ghee â fəgha to ghe zə.”
Ghe n dzɛ̀ â wə̄n enyəa, “Ghàʼ fɛ lɛɛn ki ko ghoo tə ugbɛ tə tɛ̀ àsùghò tsəghaa to tə bə̀gha”
Ù n daŋso dzɛ̀ enyəa, “Bùghò nlò â ghè wò fɛ a vʉ̀a mùghò.” Ù daŋso dzɛ̀ tsughu enyəa ghî à tsughuu doʼò tsughu an zwǐi. Ù n nì kɔʼ ghoo tə ugbɛ ti to tə̀ tɛ̀ àsùghò tsəgha ti to tə bə̀ghà, ù n lɛɛn kɔ̀ʼ ndùw kəwālā, fùghù ndùw kəzɔ̀ŋlò â Zə̀ kò, boʼn fughu tsughu gbɛ vʉ̀ â tsə̀təndə̄ghā tə wə̄n, ghe n nì dzùghùu ndùw â ghì yì. Ghe a dzə̀m mo è zə, zə̀ è kuw. Tsə̀təndə̄ghā tə̀ n zùuŋ kǎaŋ wo bòʼò mə̀ m bàa mìa n səa tsughu àsùghò sugho tə te to, dzə̀n tsùghù alo ukʉ̌aa, kʉ̌aa wə n lue kɔʼ eghə̄m à ghè wò u bʉ̀ghà. Abugho a bâʼ naŋā kɔʼ wɛghêtùghu gho ghèe ghê yìzən gho, à mò lo nû to kam tə ayìnû tə tɛ̀ ghe mò zə fʉghàzə u te wo.


Yɛso n daŋso ghəəŋ tsughu enyəa tsə̀təndə̄ghā tə̀ wə̄n nyəā kɔʼ alo kəkwə̀n ghe nughù ndûw èsə â daŋ zò, to e kuūwn ghəə̄ŋ tsughu enyəa ghî â sɛ̂ɛ tsughu. Ghəa ù ghəə̄ŋ tsughu ghî à sɛ̂ɛ tsughu, ù ŋ kɔ̀ʼ kàʼ ndùw ègɔ̀ŋlò aŋ ukwàʼ wə̄n â nəŋ ko. Tsuʼ wə m bùghò nyəghàan kwǔun tsughu wə̄n â nəŋ ko a fughu. À n lo êzə̄ŋ mò kwə̀n kə̀ n lɔʼso nyə kəŋo ndùw alo enyʉ̀, tùŋutùŋu kə n tûuŋ kǎaŋ tsə̀ghà; nu kǔɛɛ kə mò təə̄m tsəghàa wo an sə kə ghee.
Ù n ndùw bùghò â lə̌əmlə̌əm tə utsuʼ to, mò ù bwìi kə̌əŋ wò an tuw kə mmùghu. A m bùghò tsə̀təndə̄ghā tə wə̄n tə kôʼ nduw aŋghəa ù bwìi kəə̄ŋ wo a te an tuw kə mmùghu, fə̂ŋ tə̀ n sə ghee, ghe n dzɛ̀ enyəa, “À lò zəŋso kə ghûw ù kpǔuw.” Ghe ŋ kàʼ ndùw a alebuʼn səa kɔʼɔ bɔ̀ŋ mò mo alo etsə̄ŋ.
Ù n daŋso mbà kə̀a sə ndùw ghee â ghəa gho enyəa, “Kɔlɔ tsughu nlò fə̂ŋ tò, à lò mugho; kà nlò tsəŋ.”
Pìtà n daŋso bɛ̀lɛ̀ ndùw wə̄n enyəa, “Mughùbe, abugho à kùum lô ghû, dzǎa tsughù tò M̀ bwîi kəŋo wò a vʉ̀a ghù am tuw kə mmùghu kən.”
Yɛso n dzɛ̀ tsùghù enyəa, “Bùghò.” Pità fi sə kɔʼ nû alo kəkwə̀n, kàʼ ndùw an tuw kə mmùghu alebwìi, kəəŋ ndùw a vʉ̀a Yɛso. A m bughò Pità kǒʼ kùɛɛ kə̀ ŋgeē tsəghaa, fə̀ŋ n sə tsughu wə̄n, ù ŋ kàʼ ndùw aleməən nyəa tsughuu ndùw an dzughù. Ù fi nughù dì sə kɔʼ nû enyəa, “Mughubè, bəghasə̄ mugho.”
Yɛso n lùum dàan ndùw kə̀ghu, kwù ndùw wə̄n, dzɛ̀ â wə̄n enyəa, “À lǒ kwò ghù tàʼkè tɔʼɔ̀ boō fughu â mùghò a? À lo kwò tuw kə mô kpuūw ghû enyəa Ǹ yo aleghəŋlo enyəa ghù bwii kəŋo wo an tuw kə mmùghu a?”
Aŋghəa ghe daŋso nyə kɔʼ alo kəkwə̀n, kùɛɛ kə te kə m bùghù è doʼo. Tsə̀təndə̄ghā tia tə mô kuūwn lô alo kəkwə̀n m fughu wə̄n â koʼ so mò, ghe n dzâa tsùghu enyəa, “Kùmkùm, ghù lǒ Wɛ ù Kə̀zə̀.”


A m bùghò ghe dâŋ sə nduw, ghe ndùw sə tsughu an nāʼ e Dzɛ̀nɛ̀salɛ̀t. A m bùghò hî ghə enaʼ a te a kôʼkɛlɛ̄ kɔʼ wə̄n, ghe n tum nàʼà ndùw enyəa ghe nîi wô ghì à dzaŋā gho am mbùʼ è te e dzə̀m to bughò kôʼ Yɛso, ghe buʼu ndûw kəghu enyəa to ghe mô mɔ̀ɔ tsùghuu kô dzughu e təndzʉ̄ e wə̄n; ghuw wəla ù mò mɔ̂m dzə, ù mò è tughu.

শুনুন Matìo 14