Ayteke ig Kiyavwiye Jesus awna gitkis pahat iwit patuwesbuhka adahan ig ikene gawaygikis adahan igkis piriyepkaw takunipti, adahan igkis ka miniw ariw giviryepkawnikis. Ig awna:
— Minikwak pahavwi hiyaptigi misakwa avit paha paytwempu. Ig ka kiyata ariknawnema, ine hiyeg ine Uhokri. Hawata pahavu madankuno ayge avit ini paytwempu. Takunipti eg atere git ner hiyaptigi eg awna git: “Uya amnihun. Wadithebdih nuhawkan gikak nuvetunya.” Pitatye ig ka amnihgu. Heneme amaksemni ig awna ginaktin: “Henewa nah ka kiyata ariknawnema, ine hiyeg ine Uhokri. Heneme nor tino ka aynsima sigimwihpen. Nikwe nah wadithebdihte guhawkan marihwa eg ka ayta kiyimwihun takuniptima akiw.”
Ayteke ig Kiyavwiye Jesus awna gitkis gikannuhnivwi:
— Timapnay ku samah ner hiyaptigi ku pariye kane kibeynema ig ihe guwn nor ku pariye amnihswano git takunipti. Ku yis hiyap ig amnihpig, igkata Uhokri akiw ig ka amnih gihiyegavu ku pariye amnihswenevwi git takunipti? Mmah ig ayivwihwaki adahan ig amnihgikis? Kawa. Ig amnihgikis kibehtenwa. Heneme ku aysaw nah ku pariye wageswe awayg amadgaya inin, ku aysaw nah danuhnek atan akiw, ba nah utinek hiyeg amadga inin ku pariye gidukweneswa kamaxwnenes nuvitit?

Hawata akiw ig Kiyavwiye Jesus awna pahat iwit patuwesbuhka gidahankis hiyeg ku pariye ikewnevwi wadityevwi ku pariye ikawnamahkis kabayte giw pahavwi.
Ig awna:
— Piyana gikebikis awaykemni wagehe pareke ta arikut ini leglis kewye Uhokri Givin adahan igkis piriyepkewnes atere. Pahavwi farisew. Pahavwime ladwan kinisekevutne. Ig farisew tabire ayge giwtrikkis hiyeg ig piriyepkaw pahapo. Ig awna: “Kibeyne Uhokri, nah kabayhap ku samah nah ka keh mbayka kema nawenyevwi hiyegma. Nah ka amepyema, nah ka taraksevyema, nah kawnata powkemnivyema. Kibeyne, nah ka kema nerma ladwanma. Kibeyne nah maxhaw pimavut abet mpuse paka adahan nah pikiyetni. Nah kakanhaw pit. Nah wiwh paha ariwntak mpuse madikawku newkanbet adahan nah kakanhaw pit.” Henewatbaki giwn ig awna. Igme ner ladwan ig marenpi tabira giwtrikkis hiyeg, ig tabire piyawakte giwkis. Ig ka kiboka iveg han inut giwtrikut Uhokri adahan ig awna git. Ig misekwe akak giwakemni. Ig awna: “Kiyavwiye Uhokri, amnihnanuba, mmanawa nah taraksevye.” Ig ner awayg ignewa diyuhe givinekut ig wadit giwtrik Uhokri. Nerme farisew ka henema. Mmanawa ku pahavwi ikewkere kiyate mpiya pahavwi, igi Uhokri wiwhe gikiytani givititaknek. Heneme ku pahavwi ikewviye ke wotbe ig yumahbe gikiytanibe, igi Uhokri iki gikiytani givititnek.


Ayteke hiyeg danuh atere git Kiyavwiye Jesus. Igkis waxwe gikamkaykis git adahan ig sarayh giwak givititkis adahan ig kiyene Uhokri gidahankis. He igkis ewk bakimnayh nukuvesniye git. Ignesme gikannuhnivwi hiyapni hene, igkis awna gitkis adahan igkis ka ayta sigimwihgi.
Igme Kiyavwiye Jesus hiyapni hene, ig waxwase neras bakimnayh ayta gimkanit. Ig awna gitkis gikannuhnivwi:
— Isaksanabay bakimnayh igkiste aytnite numkanit. Ka yi muwaka mpithigkis. Mmanawa ku pariye hiyeg gihiyekemnikis kene bakimnibe ignesnewa ku pariye kawih Uhokri gikumadukan. Heneme ku pahavwi ka iha Uhokri gikumadukan kema pahavwi bakimnima, igi ka kawihti Uhokri gikumadukan. Ihanabay inakni nuwnuh. Henewatbaki in.


Ayteke pahavwi awayg kiyatye judeyene danuh atere git Kiyavwiye Jesus. Ig awna git:
— Kiyavwiye, pis kibeynewa. Uya akka nutuh. Pariye nah keh kuri adahan nah aymuhwa gimun Uhokri adahan avanenekwa?
Igme Kiyavwiye Jesus kaytwa giwn:
— Mmah pis kanumun ku nah kibeyne? Yuma pahavwinema hiyeg amadgaya inin kibeyne. Ignewa Uhokri kibeyne. Pis kuwis hiyak ku pariye amawka pis keh adahan pis aymuhwa gimun Uhokri adahan avanenekwa, mmanawa pis hiyak amekene Moís gikumadukan kuwis. Inakni gikumadukan awna: “Ka muwaka powkemnihwa. Ka muwaka umah hiyeg. Ka muwaka amevwi. Ka muwaka wasaymhaw. Kiyatha pig. Kiyatha pinag.”
Igme awayg awna git:
— Kiyavwiye, ku samah nah takwa nah iha madikte inakni iwit.
Igme Kiyavwiye Jesus timapni hene, ig awna git:
— Pehete muwak pit ku pariye pis kote ihpate. Amawka pis batek gikak Uhokri mpiy madikte pewkanbet. Ataknaba piyuk pewkanbet madikte. Ayteke nikwe pis iki akakuravig gitkis madiptavye. Ayge nikwe pis uti ka aynsima igiska aynte inuriknek. Ayteke pisenwa paviykan pewkanbet pis ayta wew nukakuh.
Ig awayg timapni hene, ig wakaymni ig barukiswe ka aynsima mmanawa ka aynsima igiska ay gimun. Ig avise ku nawenetke ig biyuk akak ini gewkanbet.
Ig Kiyavwiye Jesus hiyapni hene, ig iveg gimkat ig awna gitkis hiyeg:
— Ka aynsima mahiko adahan hiyeg igisavye kawih Uhokri gikumadukan. Ku yis hiyap ku mahiko adahan pahavwi puwikne “kamelu” parak maviya arikuw pahat kakus amiyokni, in pi mahikote akiw adahan pahavwi igisye parak ku kiney Uhokri gikumadukan.
Igkis hiyeg timapni hene, igkis awna:
— Ta wotuh ku pahavwi igisye, in arakak ku ig kibeyne giwtrik Uhokri mmanawa ig kabunuga gikak Uhokri. Ku mahiko hene adahan igisavye danuh git Uhokri, nikwe yuma hiyeg amadga wayk danuhne git Uhokri.
Igme Kiyavwiye Jesus awna gitkis:
— Madikte hiyeg ka hiya ignesma danuh git Uhokri ku ka igma Uhokri amnihgikis. Mmanawa ku pariye hiyeg amadgaya inin ka hiya akehka igme Uhokri hiya nikehka.


Igme Pedru awna git:
— Usuh kuwis ikise madikte wewkanbet adahan usuh wewne pikak.
Igme Kiyavwiye Jesus kaytwa giwn:
— Ku pahavwi ikiswiye givin gukak gihayo, gikebyuvwi, ginag, gig, gikamkayuvwi, ku ig ikise madikte aharit Uhokri gikumadukan, ig uti nikwe ka aynsima akiw. Ig uti aynewa amadga inin hawkri pi kibite gikebyuvwi akiw. Hawata akiw aysawnemenek aynte inurik ig aymuhwanek gimun Uhokri adahan avanenekwa. Ihanabay inakni nuwnuh. Henewatbaki ig utinek.


Ayteke ariwnteke ini ig Kiyavwiye Jesus pahadguhe giwatnivwi (12) ta git, ig awna gitkis:
— Wixwiy tivikwiye arimkanit Jerusalém. Ayge nah hiyap madikte mbayka danuh nutuhnek ku pariye Uhokri gawnevevu pitatyevwi ginetnikis numinuh nah ku pariye wageswe awayg amadgaya inin. Nah kamaykiswikanek ta gitkis hiyeg kane judeyenevwima. Igkisme arewhe nutuhnek. Avim ini igkis mahivwihpen, igkis tuvestevun. Igkis biptevun akak tigay. Pisenwa nikwe igkis umehpen. Heneme abet amamnampiye hawkrinek nah kannikaw akiw.
Igkis giwatnivwi timap inakni giwn hene, heneme igkis ka pukuhin. Gihiyekemnikis sab adahan igkis ka pukuhin. Igkis ka hiyak ku kamin ig kinetihwene.


Ayteke igkis kennesmin gidanhankis arimkanit paytwempu Jerikó. Avimnewa ini pahavwi motviye bat ayge ahinmu. Ig makehpene karukri ta gitkis hiyeg.
Pahaye adahan ig timap hiyeg kabaru mpiya. Ig awna:
— Mmahki igkis hiyeg mpiya kabaru hene?
Igkisme kaytwa giwn:
— Kiyavwiye Jesus Nazaréyene igi mpiyeviye.
Ig ner motviye timapni hene, ig kabiman git Kiyavwiye Jesus:
— Kiyavwiye Jesus, pis ukivara hawata ke amekene Davibe! Uya amnihun.
Neras hiyeg ku pariye gavitkiya Kiyavwiye Jesus igkis timapni hene, igkis himehpig. Igkis awna git:
— Ka muwaka kabiman hene.
Igme pi kabimenpiva akiw. Ig awna:
— Kiyavwiye, pis ukivara hawata ke amekene Davibe! Uya amnihun.
Ig Kiyavwiye Jesus timapni inakni gabiman hene, ig misekwe. Ig awna:
— Su yi iwavgi. Waxwanig atan nutuh.
Igkisme ihe giwn. Ig ner motviye danuh atere git, igme Kiyavwiye Jesus awna git:
— Pariye pimawkan nutuh?
Igme kaytwa giwn:
— Kiyavwiye, nah muwaka nah hiyap akiw.
Igme Kiyavwiye Jesus awna git:
— Kuri pis hiyap. Pikamaxwan nuvitit keh pis makniw.
Aynewa ig motviye hiyap. Ayteke ig tivik makekwevi gihavu, ig kibeyhene Uhokri ayge. Madikte neras hiyeg ayge igkis hiyapni hene, igkis kabayha Uhokri hawata akiw.

Listen to Lúkas 18