Vagla - 1977 Edition (Drama - NT)

Denii Yeesu izi de di gi Galilii muuzeŋ la banna yir Tibɛrias la. Nɛkpila maa ra hiŋuu. Uŋ ɔɔ ra ɛɛ wizenaa, di ra chaa wiila hina wiarɛ a nɛkpila ra hiŋuu. Yeesu tinni giŋgimii bɛl nyuu di ga so de, u ni u hiŋra. A saŋa ge, di Jus hina Hɔpizizenaa la banna yir Gillikaali la ra dugli.
Baŋ soge de la, Yeesu binni, di na nɛkpila maa n na ba u be. U pɛɛzi u hiŋri bɛl banna yir Filip, “Ɛrɛɛ ya ɛɛ di wer na diwee tɛɛ nɛkpila naa bá dei?” Uŋ pɛɛzuu gunla, u ŋɔ ú ɛɛubuu na, ka u himmaa teŋ zum gunla un niŋ ɛɛ.
Filip ŋɔ, “Di yaa haŋ wer na siidizi werge maa paanuu gba, ka a wàá hel baa, bá maa wer na tama tama di di gba.”
U hiŋri la bɛl sɔnnɛ Andru. Pitta niweere. U ŋɔ Yeesu be, “Na! Bie bɛl du ɛŋ di dɔɔ paanuuzi anue ni nyinni anɛɛ. Ka a ge du aŋmɛnɛbuuwɛi? Nɛra la kpillɔɔ werge.”
Yeesu ŋɔ, “Ií gil a nɛra so.” Kooriitaaraa werge ge faa du de. Ba maa so a ni. Ba baala bɛŋ faa hel kagboŋa anue. Denii Yeesu kpa paanuuzi la, di suŋŋi wiizi du a ni, ka lawaa mɔnni di bɔnni nɛra la maa n soge de la maa. Gunnɛ u kaa ɛɛ nyinni la ge gba. Ba maa di di piŋ.
Baŋ wa diwee tuŋ, Yeesu ŋɔ u hiŋra la be, “Ií ga paagi anla baŋ diwee ka ka la, á gilɛɛ ta.” Ba ga paagaa. Paanuuzi anuere u faa mɔnni bɔnni baa la, ka baŋ wa paagi a bɔr la baŋ diwee ka ka la tuŋ, a su kɛɛgɔzi fidaanɛɛ.
A nɛra n wa na wizeŋ la Yeesu n ɛɛwɛ la, ba jaa ra ŋɔ dɔŋa be, “Baal naa nii ɛɛ Kɔraawiizi dɔgtɛɛ la uŋ faa ŋɔ u daŋ ba labuu, wibii maa.” Ba jaa ra nyiŋŋi bá lawuu fɔŋŋa ni, ú ɛɛ ba koori. Yeesu n wa zum guŋ, u gil baa, ka kaa la giŋgimee bɔr, u bɛŋ.


Bɔr n wa duanɛɛ, u hiŋra tuu la muuzeŋ la, di ga zuu muugbera bɛl bá gi muuzeŋ la baŋgia bɛl banna yir Kapɛniɔm la. Bɔr n wa biree, di Yeesu haa waa ba be ballɛ. Pezeŋ bɛl jaa izi lau nii la maa ra birgi. Ba saa muugbera la guŋŋ lugɔ kilomitazi anue gɛɛ anumbɛl. Denii ba ga na Yeesu, di u vol nii la nyuu di ra ba ba be. Ɔnsii lau baa werge maa. Yeesu ŋɔ ba be, “Minuu. Ií gilɛɛ ra ɔm!” Ba jaa gil u zuu ba be muugbera la biini, kakpaŋ, di ba teŋ hel bɔr la baŋ faa ra la la.
Hɔɔŋ wa pizɛɛ, nɛra la n haa du a muuzeŋ keŋkere la ra nyiŋŋi Yeesu bɔr. Ba faa nawɔɔ lugɔ muugberkpannɛ faa du de. U genii Yeesu hiŋra faa zuu ba bɛŋ, di kaali la. Yeesu faa waa ba be duwɛɛ. Denii baŋhina ni ba muugbessi lii Tibɛrias di ba bɔr la nɛra la n faa soge, Yeesu suŋŋi wiizi di du paanuuzi ni, ka kpa tɛɛ baa ba hee la. Baŋ wa zummɛ lugɔ Yeesu waa hore de, u hiŋra ge gba waa hore la, ba ge gba zuu a muugbessi di ra la Kapɛniɔm, bá ga nyiŋŋi Yeesu de.

Baŋ wa gi muuzeŋ la, ba na Yeesu de, di ba wa pɛɛzuu, “Yaa Nabɔma, saŋa bɛɛ i ba ɛnnɛi?”
Yeesu ŋɔ ba be, “Ií gil n ŋɔ wibii maa tɛɛ ia. N wizenaa wia lɛi ii ra nyiŋŋi n bɔr keŋ. Diwee wiarɛ ii ra nyiŋŋi n bɔr. Ii dɛɛ hee paanuu labuu di piŋ. Awiarɛ ii jaa ra nyiŋŋi n bɔr. Ii gilɛɛ ra kuuh dikuu diwee naa n na tuŋ, ka lɔzi kaa ra kpu ia naa wia. Ií ra kuuh dikuu diwee aŋhina n wàá tuŋ, di kaa dɔɔ miibɔɔ la n waa tunaa dɔɔwɛ la wia. Mìŋ́ Newee Biibaallɛ niŋ tɛɛ ia a diwee dee, dikuubɛɛwiai, minuu yaa Mɛɛ Kɔraawiizi gil n dɔɔ u fɔŋŋa la.”
Ba jaa pɛɛzuu, “Ɛrɛɛ ya ɛɛ di wer hum Kɔraawiizi humai?”
U ŋɔ, “Kɔraawiizi kipar humaa keŋ. Ií yardi unla uŋ hummɛ la.”
Ba pɛɛzuu, “Beedee wizenne í ɛɛ di bagli yaa, yá na di jaa yardiinɛi? Bɛɛ í ɛɛ di bagli yaai?” Saŋa la yaa naabaala n faa haa ra vol hɛribɔduma biini la, ba faa di maanaa. Kɔraawiizi Hɔŋ biinii ba sɛbi guŋ, di ŋɔ, “U tɛɛ baabuu paanuu aŋhina n lii chiŋ ba hee.”
Yeesu ŋɔ ba be, “Ií gil n ŋɔ wibii maa tɛɛ ia. Paanuuzi la n lii chiŋ la ɛɛ paanuu dizi anɛɛrɛ. Moosis lɛi tɛɛ ia u himmaa. N mɛɛrɛ tɛɛ ia u himmaa. U ge paanuu dee lii chinne di ra tɛɛ nɛra miibɔɔ.”
Ba ŋɔ u be, “Yaa Dɔɔri, tɛɛ yaa paanuu naa dee ya ra hee saŋa maa.”
Yeesu ŋɔ, “Minuu paanuu la n na tɛɛ miibɔɔ la. Nɛr la maa n ba n be, wàá ka zum lɔzi wia. Di u yardiŋ, niinyɔgzi gba wàá ka kpuu maa. Miŋ faa ŋɔ lugɔ ii nambuu ka ii waŋ yardɛɛ la, gunnɛ la. Banla maa n Mɛɛ Kɔraawiizi n tɛŋ la daŋ ba n be. Nɛr la maa n niŋ ba n be, màá sɛɛ duŋŋuu ha maa, dikuubɛɛwiai, n himmaa kipar wia lɛi n lii chiŋ ba. Unla n humiŋ la kipar wiarɛ n ba. N Mɛɛ Kɔraawiizi n humiŋ la kipattɛ keŋ, lugɔ banla maa un lizɛɛ tɛŋ la, bɛ́l maa gilɛɛ waa leu, ka ń wer lɛɛ baa di lalli baa siu biini, hɔpizaa tuna hiŋ la. N Mɛɛ ra nyiŋŋuu ú kpa u miibɔɔ la n waa tunaa dɔɔwɛ labuu tɛɛ banla maa n naŋ, di yardiŋ, ka ń lalli baa siu biini, hɔpizaa tuna hiŋ la.”
Denii Jus hina la jaa ra nuumi u wiŋɔzi la wia alugɔ waabuu paanuu la n lii chiŋ di ba hɛri la. A waa baa pattɛ. Ba ŋɔ, “Yeesu naa, Joosɛf biibaal lɛiyaa? Yaa zum u mɛɛrɛ, di zum u maa gba. Ka ɛrɛɛ wiarɛ u kaa ŋɔ lugɔ u lii chinne banɛi?”
Yeesu ŋɔ ba be, “Ií gilɛɛ ra nuumi n wiŋɔzi hiŋ wia guŋ. Nɛr maa wàá wer ba n be, di n Mɛɛ la n humiŋ la lɛi tɛrguu di ba n be. Ka di u wa ba n be, n daŋ lalluu siu biini hɔpizaa tuna hiŋ la. Ba sɛbɔɔrɛ Kɔraawiizi dɔgtɛɛzi hɔna biine, di ŋɔ, ‘Ba maa daŋ helli wia Kɔraawiizi be.’ Awia, nɛr la maa n na helli Kɔraawiizi wia, di nuu ra tɛu, u daŋ ba n be. Maa ŋɔwɛɛ lugɔ nɛr maa na Kɔraawiizii siwii ni. Unla n lii u be la, u bɛnnɛ nau siwii ni. Ií gil n ŋɔ wibii maa tɛɛ ia. Di nɛr maa yardiŋ, u daŋ na Kɔraawiizi miibɔɔ la n waa tunaa dɔɔwɛ la. Minuu paanuu la n dɔɔ miibɔɔ la. Ii naabaala n faa du hɛribɔduma biini la, ba faa hee paanuu la n lii chiŋ labuu. Ka ba maanii siuzɛɛ. Paanuu naa ge minna ŋɔ u wia naa, u ge gba lii chinne. Di nɛr la maa hee paanuu naa dee, wàá siu. Minuu paanuu la dee n lii chiŋ di dɔɔ miibɔɔ la. Di nɛr la maa wa hee paanuu naa, u miibɔɔ wàá tuŋ. N bɔrahɔŋ naa min niŋ kuu durnya maa wia chɔgi, bá wer na miibɔɔ naa, waabuu a paanuu.”
Jus hina jaa ra di dɔŋa hɔɔzi, di ra ŋɔ, “Ɛrɛɛ báal naa ɛɛ, di tɛɛ yaa u bɔrahɔŋ ya hee naanɛi?”
Yeesu bir ŋɔ ba be, “Ií gil n ŋɔ wibii maa tɛɛ ia. Di ii waa Mìŋ́ Newee Biibaal bɔrahɔŋ heewe, di ii waa kaa nyɔɔ n chal ge, ii waa miibɔɔ dɔɔwɛ. Nɛr la maa n na hee n bɔrahɔŋ naa, di ra nyɔɔ n chal naa, u dɔɔ Kɔraawiizi miibɔɔ la n waa tunaa dɔɔwɛ labuu. N daŋ lalli a hiŋ siu biini, hɔpizaa tuna hiŋ la. N bɔrahɔŋ ɛɛ diweere ba ra di. N chal ge ɛɛ nii ba ra nyɔɔ. Nɛr la maa n na hee n bɔrahɔŋ, di ra nyɔɔ n chal la, u du n benii, n ge du u be. N Mɛɛ la n dɔɔ miibɔɔ la humimbuu, n ge gba dɔɔ a miibɔɔ dikuu u wia. Gunnɛ nɛr la maa n na hee n bɔrahɔŋ naa, u ge daŋ na miibɔɔ dikuu n wia. Paanuu la n lii chiŋ himmaanii keŋ. Anla ii naabaala n heewe la faa waa miibɔɔ dɔɔwɛ. Ba maa faa siuzi. Ka banla maa n na hee paanuu naa, ba miibɔɔ wàá tuŋ maa.” Kapɛniɔm jaamaa dia biinii Yeesu faa du di ra bagli wia naa.

U hiŋra n wa nuu u baglaa la, bakpila maa ŋɔ, “U baglaa naa kpollo yaa be werge. Yaa wàá wer sɛɛ guŋ.” Yeesu teŋ zum lugɔ u wiŋɔzi labuu waa baa pattɛ wiarɛ ba ra ŋɔ a wia guŋ. U pɛɛzi baa, “N wiŋɔzi naa tir iabuu gɛɛ? Ka di ii ŋmɛnɛ wa na Mìŋ́ Newee Biibaal, n tinnɛɛ ra la bɔr la miŋ faa liwɛɛ ba la, ɛrɛɛ ií jaa ŋɔi? Ka ií zum lugɔ Kɔraawiizi Dumnanii benii miibɔɔ lii. Bɔrahɔŋ waa kummaa ɛɛwɛ. Wia la miŋ ŋɔwɛɛ ii be la, a ɛɛ duma wiarɛ, di kaa dɔɔ miibɔɔ. Ka ii baŋhina wan yardɛɛ.” Saŋa maanii Yeesu ɔɔ zum banla n wɔɔ yardɛɛ, di kaa zum nɛr la n niŋ wa ɛɛu sɔsɔgɔ la. U ŋɔ, “Awiarɛ n ŋɔ ii be lugɔ nɛr maa wàá wer ba n be, di n Mɛɛ Kɔraawiizi lɛi tɛrguu ba n be la.”
Denii banla n faa ra hiŋ Yeesu la, bakpila maa jaa bir har. Ba waa kaa ra hiŋuu. Yeesu pɛɛzi u hiŋra fidibanɛɛ la, “Ii ge gba daŋ giliŋ gɛɛ?”
Saimɔn Pitta ŋɔ, “N Dɔɔri, anɛɛ benii ya kaa la ga duɛi? I bɛnnɛ dɔɔ wiŋɔzi la n dɔɔ miibɔɔ la n waa tunaa dɔɔwɛ. Yaabuu sɛɛ i wiarɛ, di zum lugɔ hinuu Kɔraawiizi Biinaniinanii la.”
Yeesu ŋɔ ba be, “Ii nɛra fidibanɛɛ naa, minuu lizi ia ii ɛɛ n hiŋra. Ka ii bɛl ɛɛ Sitaanii.” Uŋ ŋɔ Sitaani hiŋ naa wia la, Saimɔn Iskariɔt biibaal Judas wiarɛ u ŋɔ gunla. A Judas faa ɛɛ Yeesu hiŋra fidibanɛɛ la bɛllɛ, ka waabuu niŋ ŋmɛnɛ wa ɛɛu sɔsɔgɔ la.

Listen to Jɔɔn 6