JON 1
1
Chethe Alam
1Arnam Sining-pirthe pinchongche ako Lam dolo, Lam Arnam along dolo, lapen Lam Arnam lo. 2Kechengsi ahut penta Lam Arnam along dolo. 3Alangli pen ajoksi Arnam kadokave pinchong-lo; alangli penpepin ke isinatta pinchongchedet-lo. 4Kepinchongtang an Lam pensi chethe long-lo, lapen labangso achethe ke monit atum akethe-ang-lo. 5kethe-ang kangting angbong turdang-lo, lapen kangting laphan kaita hai un-edet-lo.
6Jon pu Arnam nangketoi amonit inut nangklang-lo.#Mat 3.1; Mar 1.4; Luk 3.1-2 7Kadokave amonit atum kethe-ang alamjir arjulongsi kekroiji aphansi alangli kethe-ang alamjir kethanjisi vang-lo. 8Alangli amethang amat ke kethe-ang kalilo, bonta kethe-ang alamjir kethanjisi alangli vang-lo. 9Lake kethe-ang binong-lo, atheke lake pirthe athak vangsi kadokave amonit athak ketur-angbom akethe-ang-lo.
10Lam pirthe athak dolo, lapen alangli pen ajoksi Arnam pirthe pinchong-lo, bonta pirthe alangliphan chininedet-lo. 11Alangli amethang ahemsi chevang-lo, bonta amethang amonit atum alangliphan chakchedet-lo. 12Bonta alangliphan kechak atum an, atheke alangliphan kekroi atum an aphan alangli Arnam asomar keplangji ajakong pilo. 13Halatum ke monit atum amahang kethek ason amahang theksi Arnam asomar plang-lo, lapu kali; atheke monit apo pen ajok amahang theksi Arnam asomar plang-lo, lapu kali, Arnam amethangsi halatum a-Polo.
14Lam monit nangcheplang-lo, lapen alangli kanghon kangjinso lapen ahok pen plengsetsi ilitum angbong nangdolo. Ilitum alangli dak-atur thek-long-lo. Labangso adak-atur ke Sopo po epumpet abang amethang a-Po pen kelong adak-atur asonthot-lo.
15Jon alangli lamjir thanlo. Alangli ase kethe pen hangsi pulo, “‘Alangli neliphi vangji, bonta alangli neli par themu, pima neli mahang thekthe ako penta alangli dolo,’ pu neli kepudam abang alangli helo.”
16Alangli ilitum aphan e-jinso-o apotsi isi pen aphi isi ahirjume episi ilitum kadokave aphan hirjume epitang-lo. 17Arnam Moses pen ajoksi Aron pilo, bonta kangjinso lapen ahok ke Jisu Khristo pen ajoksi vang-lo. 18Baduta Arnam aphan thek-longlepin-lang. Sopo po epumpet abang, atheke Arnam pen isipet lapen Po adung kedo abangsi Arnam paklang-lo.
Jon Baptist Kethan-Kepachethang Alam
19Jon Baptist aphan, “Nangli koma-tma?” pu keparjudamjisi Jerusalem kedo a-Jihudi atum angbong keja atum hala kurusar lapen Levi atum aphan Jon Baptist along nangtoilo.
20Jon thakdun momedet-lo, lapen halatum aphan than-pachinidaksi pulo, “Neli ke Khristo kali.”
21Latum alangliphan arjulo, “Tangte nangli komat-lo? Nanglike Elijahma?”
Jon thakdunsi pulo, “Kali, neli ke Elijah kali.”
Latum alangliphan arjuthulo, “Nanglike Arnam amontrima?”
Alangli thakdunsi pulo, “Kali.”#Keth 18.15,18; Mala 4.5
22Ansi latum alangliphan pulo, “Tangte nangli komatma, nelitum aphan nethantha. Nanglitum labangso alam nelitum aphan ladak nangketoi atum aphan thandamthu nangji. Nangli komatma, nangli methang kopisi chepuma?”
23Arnam amontri, Isaiah kepu alam phurdamsi Jon thakdunlo, “ ‘Hemphu aphan isi kekenglep atovar selampinon,’ pu komane abang kejejangtang ajo kehangkong ase neli helo.”#Isa 40.3
24Ansi hala Pharisi atum nangketoi atum, 25Jon aphan arjulo, “Nangli jongsi Khristo kali, Elijahta kali, lapen Arnam amontrita kali tangte, nangli kopisi baptisom piloma?”
26Jon thakdunsi pulo, “Neli ke lang pensi baptisom pilo. Bonta nanglitum kechinine abang nanglitum angbong inut do. 27Neliphi kevangji abang alangli helo. Neli ke alangli keng-op arri kephriji anta ne-ot ave.”
28Jordan parai nihang anat kedo, Bethani arongsopi alongsi la kadokave alam plang-lo. Hadak Jon baptisom pibomlo.
Arnam Abiresak Aso
29Puthot arni Jisu Jon anat kevang thek-longsi Jon pulo, “Jo langtha, Arnam a-Biresak a-So, pirthe apap kevardam abang! 30‘Neliphi inut amonit vangji, alangli ke neli par themulo, pima neli mahang thekthe ako penta alangli dolo,’ pu neli kepudam abang alangli helo. 31Alangli komatma, lake neli chininedet-lo, bonta Israel atum alangliphan kechiniji aphansi neli lang pen baptisom pibomlo.”
32Jon haki pisi pulo, “Vothung ason Karjong nanghirsi alangli phuthak kanghu neli thek-long-lo. 33Tebonta halabangso abang alangli helo puke neli chininedet-lo, bonta lang pen baptisom kepiji aphan neliphan neketoi a-Arnam neliphan pulo, ‘Karjong nanghirsi inut amonit aphuthak kanghu nangli thek-longji: Karjong Kangthir pen baptisom kepiji abang alangli helo.’ 34Neli la thek-longtang-lo, lapen alangli ke Arnam a-Sopolo pusi neli haki pibomlo.”
Jisu Aphrangsi Asangho Atum
35Puthot arni Jon amethang asangho banghini atum pen karjapphrong ahut 36alangli Jisu aphan tovar kedam thek-longsi pulo, “Jaho langtha, Arnam a-Biresak a-So!”
37Sangho banghini atum la alangli kepu alam arjulongsi Jisu aphi aphi dunlo. 38Jisu chetevarsi latum aphan alangli phi phi kedun thek-long-lo. Ansi alangli latum aphan arjulo, “Nanglitum kopisi kenangji?”
Latum thakdunsi pulo, “Nangli konatsi kedoma, Rabbi?” (La Rabbi pu alam atheke kuru mate kethan abang aphan)
39Alangli thakdunsi pulo, “Vang-ra nanglangtha.” (Halabangso ahut arni kangsam baji phli anbak dolo.) Lasi halatum alangli long dunsi alangli kedo adim thek-long-lo, lapen halabangso arni alangli longsi dokok-lo.
40Latum angbong inut abang ke Simon Pitor akorte Andriulo. 41Alangli halabangso ahut mamat lengphitsi akorte Simon aphan ridamlo lapen longdamsi alangliphan pulo. “Netum Messiah aphan thek-long-lo.” (Messiah pu alam atheke, “Khristo” puhelo.) 42Ansi alangli Simon aphan Jisu adung ponlo.
Jisu alangliphan langdingsi pulo, “Nang ke Jon asopo Simonlo, kalima? Bonta nangphan Kephas pusi nangpupo.” (Labangso amen ke Pitor pu amen pen isipet-lo, lapen labangso alam atheke “Arlong” puhelo.)
Philip Lapen Nathaniel Aphan Jisu Kepha
43Puthot arni Jisu Galili adet kedam-jisi pathik-lo. Alangli Philip aphan longsi pulo, “Nelong nangdunnon!” 44Philip ke Andriu lapen Pitor arong asorlo, atheke Bethsaida arong asorlo. 45Philip Nathaniel aphan longdamsi alangliphan pulo, “Aron aloh along Moses ketokdam, lapen Arnam amontri atumta ketokdam abangphu aphan netum longtang-lo. Alangli ke Najareth arongsopi asor, Joseph asopo Jisu helo.”
46Nathaniel alangliphan arjusi pulo, “Najareth arongsopi pen kopine akeme nang-klangthekjima?”
Philip thakdunsi pulo, “Vang-ra nanglangtha.”
47Nathaniel Jisu adung kevang thek-longsi Jisu Nathaniel alamjir pusi pulo, “Jo, Israel binong abang! Alangli ning arlo thang akepachorei ave!”
48Nathaniel alangliphan arjulo, “Nangli neliphan kopusi chiniloma?”
Jisu thakdunsi pulo, “Philip nangli-phan nanghanghe ako, nangli thebo arong arum kedo ahut neli nangliphan nangthek-long-lo.”
49Nathaniel thakdunsi pulo, “Nang ke Arnam a-Sopolo, Kuru! Nang ke Israel atum arecholo!”
50Jisu pulo, “ Nang thebo arong arum kedo ahut ne nangphan nangthek-long-lo pu ne nangkepu apotsi nang nephan kekroima? Labangso apar akethemu akam hei heita nang thek-longjilang!” 51Ansi alangli halatum aphan pulo, “Neli ahok alamsi nangthanpo, sining kangpudang lapen Monit a-Sopo athak Arnam apherangke atum karlu lapen nangkehir nangtum thek-longji.”
Currently Selected:
JON 1: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.