Taaitazai 2

Ge geraavɨne wɨjɨwɨrya nawɨ'nyaburɨnesɨ.

1Kɨrɨ' gɨmɨ saigɨ gɨmɨre wɨjɨwaakya maamɨdarya sasɨ yɨnɨga wi'na yadevwina a'mweraavɨ nayaa duthana! 2Yɨ neraavɨ nayaa dara duthana! “A'mwe neihi waainɨya nadɨvɨ' yɨmaka muibɨnera!” Sahwara tewaanya yɨda'maraangebwina sɨmunya nayaa yawɨ'dɨvɨ' kumɨre sɨmunya nayaa maremwaaibɨka! Kɨraazɨtɨyarɨ dɨragɨnna lɨmwangeburɨ maamɨdaryara pada'galemwaaibɨka! Pwaraavɨna tewaanya wɨvu'nyaburɨjɨ taanginya yuyangɨne'na dɨragɨnna daayaburɨjɨ tewaanya pada'galemwaaibɨka! 3Sabaaibɨ' a'mwe ne kɨmɨlɨkajɨ tewaanna nawɨ'nya pada'gainyɨna yamaripɨka! Bulayagaalyajɨ nadɨpɨdɨka! Kumɨre sɨmunyangɨ aalya waainɨya dɨragɨnya' numaremwaaladɨka! Tewaanyabura wɨjɨwɨripɨka! 4“A'mwe mɨgɨnyɨkɨbawemɨlɨkaavɨ tewaanyabwina yɨbwarɨdaakupɨka!” dena gɨthɨwa. Dare yabwina nayaa wɨjɨwɨripɨ'demɨlɨke. Kunnya a'mweraavɨna kunnya kaimɨraaya kɨnɨngɨnajɨ tewaanya wɨvu'nyɨna wiade'na. 5Nabaai kunnya sɨmunyarɨjɨ nayaa maremwaainyɨna yadɨvɨ' gɨrɨka maaya nebwina mwaaibɨ'demɨlɨke. Sara yadɨvɨ' nabaai kunnya angengɨjɨ tewaanna maremwaaina yɨpɨ'demɨlɨke. Sara yapi a'mweraavɨjɨ kunnya kaimɨraayangɨjɨ nayaa pada'galagaimwanna yɨpɨ'demɨlɨke. Saremɨlɨka kunnya a'mweraavɨ dalaangewɨ mwaaibɨ'demɨlɨke. “Nemɨrebwina a'mwera Gotɨyare yagaalya'na bɨraiyagaala nadɨpɨdɨka!” dadɨvɨ' a'mwe tewaanyamɨlɨka sara mwaaibɨ'demɨlɨke.

6Sasare'bɨ' a'mwe mɨgɨnyɨkɨbaweraavɨ dɨhaa'bwata jɨtheigɨnyɨ. Nabaai sare kwarajɨ kumɨre sɨmunya nayaa maremwaainɨpɨ'dere. 7Gɨmɨ tewaanya yɨja yuya sabwi gɨmɨ saigɨ ke'ba'nanyaigɨ dɨmwaaideigɨnyɨ. A'mwera gɨmɨ tewaanya yɨjaigɨnyɨ gɨmɨdɨdɨvɨ' dala pɨbwinanya tewaanyabwina yɨpɨ'dere. A'mweraavɨ wɨjɨwɨrya sabwina nɨgwia mwagi'nya'na myawɨ'dɨnna! Nawɨ'nyabwi yawɨ'dɨ nayaa ja! Yuyagaa' nayaa pada'galayawɨ'dɨ nebulyabwina jɨwɨrya! 8Yagaala maamɨdarya yavada'galya'ne' a'mwera yɨwetawakya majɨdaya'ne' nayaa duthatheigɨnyɨ. “Nemɨre yɨkamaangera nemɨnyɨ kayaakyagaala aane pɨrɨ' kɨrɨ' nedɨpɨnevɨna ‘O, yɨwetawakya aane pɨrɨ' kɨrɨ' mwari'. We'! Sɨmunya' neyekɨ'mwaka!’ yawɨpɨka!” dadɨ sara duthatheigɨnyɨ.

9Kɨraazɨtɨyarera yaasɨwa'wawɨnyaraavɨ wɨdaayadɨvɨsaraavɨ gɨmɨ nayaa dara duthana! Yuyangɨne'na kunnya maremwaalyaraavɨ dalaangewɨ mwaaibɨka! Sahwara kunnya maremwaalyaraavɨna tewaanya wɨvu'nɨvanɨke wawɨnya dala pɨnɨnnanya tewaanya nayaa yɨpɨka! Yagaala kayaa'nanya kunnya maremwaalyaraavɨ ayɨna naja'nawɨdɨpɨka! 10Sahwaraavɨre gɨlyɨvɨta pɨmɨlɨ' kɨmɨlɨ' yuina numaapɨka! Aawa. Kumɨre yagaalya lɨmwaga'dɨvɨ' kunnya yɨda'nanyabwi wibwarɨdaakupɨka! “A'mwera yɨwaala yɨwannadɨvɨtabaaibɨ' nemɨre wawɨnyavɨna Gotɨyai nevadaihasamaa'derɨne yagaala wɨjɨwɨrinɨke' savɨne yaya naange' a'mwera munyaba makibɨka!” dapɨri nayaa sara yɨpɨka!

11Sare' dare'nesɨ. Gotɨyare yanga gaimwange' a'mwe yuyaraavɨ yɨnɨga wi'na padaihasamaaranne' ku'maayabanna mena neyɨma'naabakesɨ. Yɨ Kɨraazɨtɨyai baka nawɨ'nyɨna yakesɨ. 12Gotɨyare yanga daza' Gotɨyarɨna bule'na wɨjaaya saburɨjɨ Kwaakevakɨya yuya sɨmunya kayaa'nanya saburɨjɨ makwasakaade'na wɨjɨwɨrya neyɨvanɨ'. “Dahaasavɨ nemɨ sɨmunya nayaa yawɨ'na yadaa yɨda'maraangeburɨ nayaa yamaryadaa Gotɨyarɨna nayaa yavada'galayawɨ'na yadaa mwalaana!” dawaajɨ wɨjɨwɨrya sa' mɨdɨnaade'nanyɨ. 13Nemɨ sara mwaidaa yɨlaaya yadaa tewaanaanga yɨnɨke' dɨragɨnna lɨmwadaa yemwaaimanɨgo. Yɨ, Gotɨya Naangei nemɨre nevadaihasamaa'dei Kɨraazɨtɨyai Jizaazarɨna yemwaidaa “Sahwai Sɨgunyavɨya byaanna dɨragɨnyasɨ ku'maayabanna yɨma'naabathelyɨ,” yawɨ'daa yemwaaiholyɨra. 14Sahwai nemɨnyɨ gamɨre gaalyabwi yagalya'mavakelyɨ. Nemɨnyɨna “Ayahi mubya yamaarya'neinyɨ kɨwɨnya dɨnɨka galazekɨvala yuya sangɨna wɨvadaihasamaarɨma! Aalya ya'mujɨ gɨrɨka duimwagasɨ'na'mujɨ nɨmɨnyɨne'na nɨmɨre tewaanyara wɨmwaaihɨwɨjara nɨmɨre yunera mwaaibɨka!” daka gamɨre gaalyabwi yagalya'ma'na. Sare' wawɨnya dɨragɨnna yadɨvɨ' yuya tewaanyabwina yɨpɨka!

15Yuyagaa' yagaala daza a'mweraavɨ duzɨwaakya! Yagaala daza mɨdɨbɨ'de'na gɨmɨ dɨhaa'bwata ja! Sara yadɨ gɨmɨ maanga dɨragɨnna wɨdadɨ Naangere dɨragɨnya' maara'gɨzɨ mamɨdɨnyadɨvɨsaraavɨrebwi dɨrɨvɨpalasɨka! A'mwe aane pwai kwai gɨmɨnyɨna “A'mwe yaasɨwakelyɨra,” nagyawɨradɨka! Aawa. Naangere dɨragɨnyavɨ kuna ja!

Currently Selected:

Taaitazai 2: byr

Highlight

Copy

Compare