2 Timoti 4

Gotɨyare yagaalya nebwina wɨjɨwaakyabwinesɨ.

1Kɨraazɨtɨyai Jizaazai a'mwe yuyaraavɨ, gaala mwaaihasaraavɨjɨ bainɨkeraavɨjɨ maryawɨbwaradelyɨ. Yɨ sahwalyɨ Gotɨyalyɨ saraaryaba yagaala dɨragɨnna dara gɨzalɨkurakɨvanɨge. Kɨraazɨtɨyai Jizaazai a'mwe yuyaraavɨre tɨnnyarɨ yɨma'naabozɨ Kingɨya yuyagaa' yuyagaa' maremwaaladelyɨ. 2Sarevɨdaa'nyɨ gɨmɨ dazahɨrɨ'na yawɨ'dɨ gamɨre yagaalya' duzɨwaakya! A'mwera yagaalya' kadɨka wɨ'nya'na yɨlaaya yɨpɨjahaasɨ yɨlaaya mipɨjahaasɨ yuyagaa' yawɨralɨmwagarya'neigɨ dɨragɨnna ja! Kumɨre yɨwetawakya'na maanga duthana! Kumɨre sɨmunyarɨ wɨdɨhaa'bwata ja! Gotɨyarebwi mɨdɨbɨ'de'na kumɨre sɨmunyavɨ yɨvaimwagawɨmwaaihɨna ja! Sare'na ya'ne yuyagaa' gɨmɨ kwaamu'na yadɨ sahwaraavɨ nayaa jɨwɨrideigɨnyɨ. 3Sare' darevɨnyɨ. Dɨvi sagaa' a'mwera yagaala maamɨdarya mamaari yɨpɨ'dere. Aawa. Yune kumɨre yawɨta kayaa'nanya saburɨna mɨdɨdɨvɨ' kumɨre wɨjɨwɨrya ya'ne kwalaalyaraavɨ maramadakɨpɨ'dere. Sarevɨ wɨjɨwaakyara kumɨre kadɨkikaavɨ sɨka mwagi'nadɨvɨ' yagaala pɨnɨ kumɨnyɨ tewaanya wɨvu'najanna maapɨ'dere. 4Yɨ sare' pɨrɨ' daresɨ. Yagaala nebulya' kadɨka wɨ'nya'nevɨna gɨnyɨra'na yɨpɨ'desɨ. Pɨrɨ' daresɨ. Yagaala yaasɨwaka genna wajɨngyagaala dala pɨnɨnna kadɨki' wakamaremwaaibɨ'dere. 5Kɨrɨ' gɨmɨ saigɨ yuyagaa' yuyangɨ sɨmunya nayaa pada'gaina jawɨka! Naangerɨna taanginya dɨmaaka! A'mweraavɨ yagaala tewaanya' wɨjɨwaakya'ne wawɨnya nayaa ja! A'mweraavɨ wɨdaaya'na, gaimwange'na wawɨnya' kɨnɨnnake'neigɨnyɨ. Wawɨnya daza' gɨmɨ nayaa yunebanna pada'gala ya ja! 6Sare' darevɨnyɨ. A'mwera kwaraanyaba Gotɨyarɨne waainɨya dɨngadɨvɨtabaaibɨ' tamakya'neinyɨ nɨmɨre tawe' mena dɨma'nade'nanyɨ. Nɨmɨregaa' mena kɨbawa yɨwawode'na yɨwakegaakɨ. 7Mala nawɨ'nyavɨ Naangerɨna gaidaa'mweinyɨ. Naangerɨne wawɨnya'na gavamarasɨ'nyɨkaanya kaanyave'na mena nayaa wɨweinyɨ. Dahaa' aayawɨnyavɨna mena yɨ'maveneinyɨ. Dɨragɨnna lɨmwagasabwi mena dɨragɨnna lɨmwamweinyɨ. 8Nabaai dahaa' a'mwe gavamarasɨ'nyɨkaanya' wavɨla'dɨvɨsaraavɨne tɨvɨkɨsa' yemwaala nyɨ' nɨmɨnyɨna. Tɨvɨkɨta daza' dare'na. Yɨrɨka Naanga dazarɨkɨ Naangei nɨmɨnyɨ “Yɨda'maraangebwi yadɨnyaigɨnyɨra,” nyɨdathesɨ. Naangei sahwai yawɨbwata'ne yɨda'maraangelyɨ. Yɨ naangegaa' tɨvɨkɨta daza' nyɨjaavadelyɨ. Nabaai kɨrɨ' nɨmɨnyɨna gaveinyɨna nyɨjaavadeinyɨ mɨ'. Aawa. A'mwe gamɨnyɨ ku'maayabanna kima'naabozɨ tɨnna wanganya'na mena wɨvu'naderaavɨ yuya sahwaraavɨ wɨjaavadelyɨ.

Polɨmyawɨnna Timoti wɨya'nesɨ.

9Gɨmɨ yɨme'nya'bɨ' ya'gɨzɨ maalɨkegaa' nɨmɨnyawɨnna yarai dɨvadeigɨnyɨ. 10Sare' darevɨnyɨ. Dimaazai dahaasa sabwina tewaanya wɨvu'nade', nɨmɨnyɨ mena nyagalya'mavaka Anga Tezalonaaikana wɨwakerɨna. Nabaai Kɨrezanɨ Pɨrovijɨ Galezɨyana wɨwa'. Taaitazai Pɨrovijɨ Dalɨmezɨyana wɨwa'. 11Lukɨyai gave sahwainanyai nɨmɨjɨ nye'mwannamwaalɨ'. Gɨmɨ Maakɨyarɨ maara'gɨzɨ dɨmakadelyɨra. Sare' dare'nesɨ. Sai nɨmɨre wawɨnyavɨ gaimwange'na tewaanya nyadelyɨ. Sare'na dɨmakadelyɨ. 12Nabaai Tɨkikaazarɨ Anga Epazaazɨna mena maryaasɨwa. Sarenna yarai dɨvadeigɨnyɨ. 13Gɨmɨ “Wɨma!” da'gɨzɨyagaa' nɨmɨre yɨvɨta yɨrɨlyagaa'ne saamɨnya daza' dɨnyɨmaa'deigɨnyɨ. Yɨvɨta sa' anga Tɨrawaazɨ A'mwe Kaapazare angevɨ wakesɨ. Nabaai bukuya kɨnɨjɨ maara'gɨzɨ nabaai navɨka nyɨwɨdɨ'de'na sipɨzipɨyangɨre kɨlaakengɨ yavɨkarinɨkejɨ dɨnyɨmaa'deigɨnyɨ.

14Alekɨzaadai, kwaari'mata bɨraazɨya yavɨkaryadei, sai nɨmɨnyɨ wana kayaa'na nyɨgalakelyɨ. Sara nyake sarɨ dɨvi yɨnɨga gamɨ yake sabwina Naangei kayaa'nanya wɨrɨvɨkɨradelyɨ. 15Nabaai gɨmɨ kwaigɨ a'mwe dazarɨna nayaa mala jɨwannadeigɨnyɨ. Sare' darevɨnyɨ. Dazahwai nemɨre yagaalya marulawakya neyɨbainadelyɨ.

Yagaala pɨnɨnnesɨ.

16Aaya mudɨ'nanyagaa' kotɨyavɨ yagaalya wɨdadaari nɨmɨjɨ nyɨgaidaavaka nyɨgaimwagakei a'mwe pwai kwai mɨ'. Aawa. A'mwe yuyara yagalya'makuna nyesare. Sare'na nabaai nɨmɨ Gotɨyarɨ yɨdaangadɨnyainyɨ “Kumɨre kayaa'nanya yɨvanɨgata sanna myawɨ'dɨnnera!” 17Sare' kɨrɨ' Naangei nɨmɨnyɨ yuyagaa' nyangada gamɨre dɨragɨnya' nyɨjaavakelyɨ. Sarevɨ “Nɨmɨ yagaala tewaanya' yɨnɨga wi'nanya' wɨjɨwaakɨma! Sara wɨjɨwakadaa'muri ajɨmya yuyangɨyara yagaala sa' kadɨka wɨ'nɨpɨka!” dena sara wɨde. Nabaai Gotɨyai kavɨjɨlɨkere (laayonɨyare) maangevɨ nyurakasamaarakelyɨ. 18Yuya kayaa'nanya sabura nɨmɨnyɨna “Kayaaka yaana!” dadɨvɨ' nyadaapi Naangei nayaa nyurakasamaaradelyɨ. Sare'na nabaai gamɨre maremwaaide naangevɨ Sɨgunyavɨna nyɨmakwia'neinyɨ nyɨvadaihasamaaradelyɨ. Sahwarɨna “Byaannakelyɨ,” dadaa gamɨnne yaya' yuyagaa' yuyagaa' nemɨ munya ke'ba makɨlaana! Naanga nebulyasɨ.

Pɨkarɨyɨkwiavɨya aaya yagaalya'nesɨ.

19Nɨmɨnyɨna Pɨrɨzɨlavɨjɨ Aakwilaamɨjɨ Wonezɨporaazare angevɨyaraavɨjɨ duthana! “Polɨ yɨhɨthɨvanɨ' ‘Nya'mweihi!’ ” 20Anga Koridɨ Erazɨtaazai kuna mwaalɨ'. Nabaai Tɨropimaazai nalaavɨnakei mwaalakevɨ anga Maalitaazɨ saba kuna mwaalya'nerɨ wɨmwaaihena yagalya'mave. 21Gɨmɨ yɨme'nya'bɨ' ya'gɨzɨ dɨvadeigɨnyɨ. Yɨhuta kayaa'nanya pɨgaa'na nyemwaaidɨka! Yuvyulaazalyɨ Pyuthenɨzalyɨ Laainazalyɨ Kɨlothɨyaasɨ neya'mwe yuya pwarajɨ gɨmɨnyɨna “Neya'mweigɨ!” gyasɨwaabaa'. 22Naangei gɨmɨre kuryalyɨ gye'mwannemwaalana! Gamɨre yanga gaimwange' sarɨmɨjɨ yɨhye'mwannarana!

Polɨ

Currently Selected:

2 Timoti 4: byr

Highlight

Copy

Compare