2 Timoti 3

Yɨrɨka aaya'negaa' kayaa'nanya kwalaalyabura yɨma'naabathe'nesɨ.

1Kɨrɨ' gɨmɨ nayaa dara jawɨka! Yɨrɨka aaya'nerɨkaavɨ taanginya kwalaalya kayaa'nanya yɨma'nadengɨ. 2Sare' darevɨnyɨ. Sagaa' a'mwera yune kumɨ saraavɨna wɨvu'nadere. Nɨgwianna tewaanya wɨvu'nadere. Yune kumɨnyɨne yayanna makidɨvɨsare. Pihadɨka yadɨvɨsara yaasɨwa' yamarina, Gotɨyarɨnajɨ bɨraiyagaala wɨdɨna. Kuvɨnɨmaangeyuraavɨre yagaalya galazekɨvaina. “Su! Su!” mujadɨvɨsara. Yuya tewaanya nawɨ'nyabwi maayara. 3Kumɨre avaaitaweraavɨna nayaa muvu'nyadera. Mayagaala javwi makwasakɨpɨ'dera mɨ'. Pwaraavɨ kwaasɨ dɨragɨnna jɨda'dɨvɨtara. Kwaamu'nanyabwi maayara sɨmunyabwi nayaa mamaremwaainyadɨvɨtara. A'mweraavɨ yaasɨwa' kayaaka yɨgalamarina. Tewaanya yuya saburɨna sɨmɨlɨka wimwaaidera. 4Kumɨre kwɨya'mwera yɨkamaangeraavɨre asɨrɨ marɨmwangɨna. Kumɨre sɨmunya yuya kayaa'nanya sabwi yɨme'nya'bɨ' mɨdɨnna. Pihadɨkebwi yadɨvɨ' “Nemɨ a'mwe naangeine,” yawɨ'na. Gotɨyarɨna “Aala!’ dadɨvɨ' muvu'nyaderera. Aawa. Wabahɨlaakeburɨna wɨvu'nadera. 5Gotɨyarɨ kwaasɨ yune kɨlaakejɨkɨna mɨdɨdɨvɨ' kɨrɨ' Gotɨyare saburɨya dɨragɨnya sabwina bule'na wɨjaavadɨvɨ'. A'mwe sasare saraavɨ yagalya'ma'na ja! 6Sare' darevɨnyɨ. A'mwe sasare saraavɨdaa'nya pwara “A'mwe sangɨ kwaasɨ kave wabwiwayagaala wɨdaana!” dadɨvɨ' sɨmunya nawɨ'nya myawɨryadɨvɨta sangɨre angengɨ kave widɨvɨ' kumɨre sɨmunya wɨla galyɨrakɨdɨvɨsangɨ. A'mwe sasare kayaa'nanya yɨngakɨnɨke kɨnɨnnake kumɨre sɨmunyavɨ taanginya wa'demɨlɨke. Kayaa'nanya dala pɨnɨnnanyanna mwagi'namarya'na kumɨre sɨmunya' dɨkaa'demɨlɨke. 7A'mwe daza yuyagaa' yagaalya maa'dɨvɨta kɨnɨ kɨrɨ' yagaala nebulya' yawɨrangadɨvɨta mɨka. Yɨ sahɨnɨngɨre angengɨ bwidɨvɨ' kayaa'na wɨjɨwaakadɨvɨsare. 8Kɨgaa' Jaanɨzalyɨ Jaabɨrɨzalyɨ saraai Ne Mozɨzarɨna yɨkamaanga yɨma'nagɨla yelyabaaibɨ' a'mwe dazara kwaasɨ dɨvanɨgasara yagaala nebulyavɨ yɨkamaange' yɨvanɨga'. Kumɨre sɨmunyabwi Saataanɨ sɨmunya kayaa'nanyarɨ mena wakakera kayaa'na yawɨ'dɨvɨsara. Sarevɨ sahwaraavɨna Kɨraazɨtɨyarɨ lɨmwangebwi kwaasɨyabwi yɨma'nakesɨ. Gotɨyai sahwaraavɨna yaamɨjɨ yɨdakwasanganaka gamɨre bule'na wɨjaavɨna. “Aala!” dɨna. 9Kɨrɨ' kumɨre dazabwi naanga yɨma'nadevwi mɨ'. Sare' darevɨnyɨ. Sɨnnawɨ kɨgaa' a'mwera Jaanɨzalyɨ Jaabɨrɨzalyɨ saraare navɨ'navɨkebwi tɨnna wanganyaatabaaibɨ' a'mwe yuyara kumɨre navɨ'navɨka sabwi tɨnna nayaa wangabɨ'dere.

Gotɨyare yagaalya' nayaa pada'galalɨmwangebwinesɨ.

10Kɨrɨ' gɨmɨ saigɨ nɨmɨjɨ nye'mwannayamaryadɨ gɨmɨ nɨmɨrebwi mena yawɨrangadɨnyaigɨnyɨ. Yɨ nɨmɨre wɨjɨwɨryabulyɨ, nɨmɨre mwaalyabulyɨ, nɨmɨre yuya saburɨ aaya kaavɨlyajɨ, Gotɨyarɨ dɨragɨnna lɨmwagasabulyɨ, kwaamu'nanyabulyɨ, a'mweraavɨna wɨvu'nyabulyɨ, taanginya maa'dɨ dɨragɨnna mwaalyabulyɨ. Yuya sa nyawɨrangadɨnyaigɨnyɨ. 11Kayaa'nanya yuya sa a'mwera nyadaapi nabaai yuya daanga sa maa'dɨnyainyɨ Anga Aadɨyokɨjɨ Anga Aaikonɨyamɨjɨ Anga Lɨzɨtɨraajɨ mena nyawɨranganagɨnyaigɨnyɨ. Yɨ kayaa'nanyajɨ daangejɨ sa nyɨjavadaapi dɨragɨnna daa'dɨ maa'dɨnyainyɨ. Nabaai sara kayaa'na nyadaapi Naangei taanginya yuya dazangɨ nyɨvadaihasamaarakeinyɨ. 12Yo, a'mwe yuyara Kɨraazɨtɨyai Jizaazarɨ wɨlamwaaidɨvɨsa'na “Gotɨyarebwi mɨdɨnaana!” dapi yɨpɨjaraavɨ yɨkamaangera kayaa'na wigaibɨ'dere. 13A'mwe kayaa'nanyarajɨ kwaasɨyarajɨ kumɨrebwi kayaa'nanya naanga yɨma'nadesɨ. A'mweraavɨ kwaasɨyabwina kwaasɨ wɨjɨwaakɨpɨ'dere. Nabaai sahwaraavɨ kumɨ kwaraavɨ Saataanɨ Kayaa'nanyai kwaasɨyabwina wɨjɨwaakadelyɨ. 14Kɨrɨ' gɨmɨ saigɨ maaragɨnya yagaala dazasɨ mena lɨmwagahɨnya dazasɨ nayaa kuna dɨlɨmwagaka! Nemɨ a'mwe yagaala dazavɨna gɨzɨwakadaanyainaavɨna nemɨre tewaanyabulyɨyainaavɨna nayaa neyawɨrangadɨnya'na dɨragɨnna kuna dɨlɨmwagaka! 15Nabaai datha' kɨrɨsɨ yawɨrangadɨnyaigɨnyɨ. Sɨnnawɨ gɨmɨ kaimɨraaya maalɨkeigɨ kuna mwaalagɨna Bukuya Tewaanyavɨ sɨmunya gaai yawɨramaaragɨnyaigɨnyɨ. Bukuya dazi sɨmunya tewaanya' yɨnɨga wi'na gɨzaavannilyɨ. Sara kagyozɨ Gotɨyai gɨvadaihasamaarya'neigɨ Kɨraazɨtɨyai Jizaazarɨ lɨmwadɨnneigɨnyɨ. 16Gotɨyare Kuryai Bukuyavɨya yagaala yuya marima'naabakelyɨ. Nabaai yagaala daza' nemɨnyɨ sɨmunya wɨjaaya'ne tewaanaangesɨ. Sara yada nemɨre kayaa'nanya yadaanya sabwina neyɨbwarɨdaakwada maanga nedade'nanyɨ. Nabaai nemɨre mwaalyaburɨ neyavada'gaide'nanyɨ. Sara neyada yɨda'maraangebwina neyɨwɨryade'nanyɨ. 17Sarevɨdaa'nyɨ a'mwe Gotɨyarerɨ wɨmwaaihada dɨragɨnya yunebanna yɨnɨga wi'nanyarɨ. Sare'na wawɨnya yuya tewaanya sa ya'na yemwaala yɨvanɨkelyɨra.

Currently Selected:

2 Timoti 3: byr

Highlight

Copy

Compare