2 Timoti 2

1Sarevɨdaa'nyɨ, nɨmɨre kaimɨraayaigɨ, gɨmɨ saigɨnyɨ Kɨraazɨtɨyai Jizaazai yanga gaimwanga gyakevɨ Gotɨyai dɨragɨnya givaimwagatheigɨnyɨ. Dɨragɨnya sa' dɨmaaka! 2Nabaai yagaala gɨmɨ kadɨka wɨ'nadɨnya sa a'mwe jalɨkurakya'ne kwalaalyaraayaba nɨmɨ wɨjɨwakadaari yɨ daza a'mwe pwara nayaa maremwaaibɨ'deraavɨ nayaa jawɨrawɨjaama! Yɨ sahwara dɨragɨnna lɨmwaga'dɨvɨsara dɨvi a'mwe pwaraavɨjɨ nayaa wɨjɨwɨripɨnerera.

3Kɨraazɨtɨyai Jizaazare aawɨlata tewaanyaigɨ kwaamu' mwaala'gɨzɨ taanginya nemɨ aawɨlata pwainaavɨ ma'daanyabaaibɨ' wawɨnya yɨja dazavɨna taanginya dɨnye'mwannamaaka! 4Sare' daresɨ. Aawɨlata aane pwai kwai wawɨnya dala nabinabinya pɨnɨjɨ lɨmwagathei mɨ'. Sai “Aawɨlasaraavɨ maremwaalyarɨ nɨmɨnyɨ nyɨdahɨlakakerɨ nɨmɨre wawɨnya yɨwɨjanna tewaanya wigalɨma!” dozɨ yune aawɨlasaraavɨre tewaanya sabwina lɨmwagaradelyɨ. 5Nabaai ke'ba'nanya pɨrɨ' daresɨ. A'mwei gavamarasɨ'nyɨya yada dazabwina kɨwɨnya dɨnɨke' mamɨdɨnyɨ yaja' yɨ sai gamɨdaasɨ wavɨlavajare' mamaari yadelyɨ. Aawa. Kɨwɨnya dɨnɨke' nayaa mɨdɨnajai yɨ sai maaradelyɨ. 6Nabaai ke'ba'nanya aaya' daresɨ. A'mwei wawɨnya yagɨyagɨ yada wia burɨdehaa' maremwaalajai wawɨnya yaja sangɨ aayagaa' gamɨdaasɨ tɨka munne yabwaryagaa' sɨnnawɨ maarana! 7Nɨmɨ yagaala dɨwe dazavɨna gɨmɨ sɨmunya' nayaa jawɨka! Sare' darevɨnyɨ. Naangei gɨmɨre yawɨsavɨ giwɨryadelyɨra. Sarevɨ nabaai gɨmɨ yagaala yuyangɨya aaya kaavɨlya' jawɨrangadeigɨnyɨra.

8Jizaazai Kɨraazɨtɨyarɨna sɨmunya nayaa jawɨka! Sai balakerɨ yɨdɨkaavakerɨna, sare sai Kingɨya Devitɨmɨre yɨsavaakɨdaasarɨna nɨmɨ yagaala tewaanya' dadɨnyarɨnera. Nayaa yawɨ'dɨ dɨragɨnna kuna dɨthaaka! 9Nɨmɨ yagaala tewaanya daza' wɨjɨwaake'na yune dazahɨrɨvɨna a'mwera kayaa'nanyabwi yaderɨna taanginya wɨjaavadɨvɨtabaaibɨ' taanginya dala pɨnɨnna pɨnɨnnanya nyɨjaavadɨvɨsare. Yo, kalavuza kɨrɨvɨjɨ wɨla nyɨrakesare. Kɨrɨ' Gotɨyare yagaalya' kalavuza yɨ'narade' mɨka! Sa' yuneba kaanya kuna yamaryadesɨ. 10Sarevɨdaa'nyɨ nɨmɨre sɨmunyabwi dɨragɨnya yɨvaimwannadɨ taanginya yuya daza maa'manɨgeinyɨ. “Gotɨyai yune gamɨnne dahɨlakɨnɨkeraavɨna gaimwagɨma!” dadɨ yɨvanɨge. Nɨmɨ yawɨ'dɨ “Kɨraazɨtɨyai Jizaazai yuna wɨvadaihasamaata sa' gannya gaalyabwi sahwara kwarajɨ maapɨka! Sara yɨpɨjara yuyagaa' yuyagaa'ne byaanna dɨragɨnyavɨ nawɨ'nyavɨ mwaaibɨka!” yawɨ'dɨ dɨragɨnna daa'manɨge. 11Nabaai dɨragɨnna dɨthaaka! Sare' darevɨnyɨ. Yagaala datha' dɨragɨnna nebwina lɨmwaga'daanya'nanyɨ. Yɨ dara dɨnɨ'

“Nemɨ gamɨjɨ ye'mwannabaloina mwalaaja'

Nabaai sahwalyɨ gaala ye'mwannamwalaadeinera.

12Taanginya yuya sabwi maarya'na

Nemɨ dɨragɨnna mwaaihoina mwalaaja'

Nabaai sahwalyɨ kingɨya ye'mwannemwalaadeinera.

Kɨrɨ' ‘Gamɨreina mɨ',’ daatheina mwalaaja'

Nabaai nemɨnyɨna ‘Nɨmɨrera mɨ',’ dathelyɨra.

13Gamɨnyɨ dɨragɨnna kuna malɨmwagaryaaja'

Sahwai gannya yagaalya lɨmwaga'dei mwaaladelyɨ.

Darevɨnyɨ. Gamɨ sarɨne ayɨna yawɨradannei mɨ'.”

Gotɨyare wawɨnya yaderɨna Gotɨyai “Tewaanyalyɨra,” dake'nesɨ.

14Yuyagaa' gɨmɨre a'mweraavɨre sɨmunyangɨna yagaala dazangɨ yɨdɨkavɨmwaaihya ja! Gotɨyare tɨnnyarɨ yagaala dala pɨnɨnna pɨnɨnnanyanna mala jɨhurayɨ'nya nyɨpɨdɨ'de'na yagaala dɨragɨnna dɨzalɨkurakɨdeigɨnyɨ. Sasare sabwi a'mwe aane pwai kwarɨ yɨnɨga wi'na gaimwagathe' mɨ'. A'mwera yagaala sasarengɨ kadɨka wɨ'nɨpɨjaraavɨ sɨmunyangɨ yuna kayaaka yɨgalakɨna yadesɨ. 15“Wawɨnya wɨdaayadɨnya nebulyainyɨ Gotɨyarɨna wɨjaavɨnɨma!” yawɨ'dɨ dɨragɨnna nayaa ja! Sara kya'gɨzɨ Gotɨyai gɨmɨre wawɨnya yɨjaigɨnyɨna tewaanya wɨvu'nadelyɨ. Sarevɨ yagaala nebulya'na nayaa yɨda'nanya'na duzɨwaakya! Sarevɨdaa'nyɨ “Gotɨyaryaba wagɨla mamaari yɨvanɨgeinyɨra. Sabwina yɨlaaya nyadelyɨra,” jawɨ'deigɨnyɨ.

16Yagaala waramarina yanne dala pɨnɨnnanyajɨ madɨnna! Gotɨyarebwi maayanna madɨnna! Sare' darevɨnyɨ. Yagaala sasare sa Gotɨyarɨ bule'na wɨjaaya'ne tuta sarɨkɨ a'mwera sara dadɨvɨsaraavɨ kuna makwodengɨ. 17Sarevɨ nabaai kumɨre yagaalya wa'waaya bwia bu'de tɨka da'de kɨlaakejɨ' kayaaka yɨgaide sabɨsangɨ. Sara yada naanga yɨma'nadengɨ. Sara kayaa'na dadɨvɨta yɨta savaakɨdaasaraai yɨ Aaimenaayazalyɨ Paailitazalyɨ saraalyɨra. 18Sahwaraai sɨkwa yɨrawakɨwaai. Yagaala nebulyavɨ yɨwetawakya yɨwaalyaraalyɨ. Saraai kwaasɨ dara dadisaraalyɨ “Gotɨyai bainɨkeinaavɨ kuryaraavɨ mena neyɨdɨkaa'mwakesɨ. Dɨvi kɨlaaka mudɨkejɨsɨ madɨkaayɨ yaadeinera.” Yagaala sasare dazavɨ a'mwe pwaraavɨre yawɨta Kɨraazɨtɨyarɨnevɨ kayaaka yɨgaimanɨgɨlyaraalyɨ. 19Sare' kɨrɨ' Gotɨyai sɨmya dɨragɨnya naangerɨ mena wɨdaakwakabaaibɨ' gamɨre a'mweraavɨ wivaimwadelyɨ. Sara wɨdaakwakei dɨragɨnna daavɨ'. Sɨmya dazarɨ yavɨkwajɨke'bɨ' pɨkarya' dara dɨnɨkesɨ. Naangei gannya yune a'mweraavɨ nayaa yawɨrangamanɨkelyɨ. Nabaai pɨkarya pɨrɨ' daresɨ. A'mwe yuya gazarazara “Naangerɨneinyɨ,” dadɨvɨsara kayaa'nanyabwi yɨda'maraanga mya sabwina bule'na wɨjaavɨpɨka!

20Anga naangevɨ maa'gula pɨnɨ golɨyajɨ sɨlɨvaayajɨ wana nawɨ'nya yavɨkarinɨke kɨnɨnnake gave daaka! Aawa. Pɨnɨ yɨsangɨ yavɨkaryadɨvɨsajɨ pɨnɨ kwaakengɨ yavɨkaryadɨvɨsajɨ warɨkengɨ. Yɨ pɨnɨ wawɨnya nawɨ'nya ya'ne, pɨnɨ wawɨnya waryaanya dala nabinabinya ya'ne. 21Sarevɨdaa'nyɨ a'mwe pwai gamɨ sarɨ sasare kayaa'nanya sabwi duimwagasɨ'nɨnojɨ nawɨ'nya gɨrɨ'maayai mwaalajai wawɨnya nawɨ'nya ya'nei mwaaladelyɨ. Nabaai sai gamɨre Naangerɨ yɨnɨga wi'na gaimwagannelyɨ. Yuya wawɨnya tewaanya sanna yavutavemwaala yannelyɨ. 22Sare'na gɨmɨ yuya kayaa'nanya yawɨta sabwi mɨgɨnyaraavɨre sɨmunyangɨ yɨma'nade dɨragɨnya sabwina lɨkaanya jenadakwona! Sara yadɨ yɨda'maraangebulyɨ dɨragɨnna lɨmwangebulyɨ pwaraavɨna gɨvu'nyabulyɨ kwaamu'nanyabulyɨ dɨmɨjamakwona! A'mwera sɨmunya yɨda'maraangebwi kɨnɨnnakera Naangerɨ jaka wɨdadɨvɨsarajɨ sabwi dɨmɨjamakwona!

23Yaasɨwaka yagaala dala pɨnɨnna pɨnɨnnanya a'mwe navɨ'navɨka sɨmunya muwarikerajɨ gavamarasɨ'nyɨyagaalyangɨna “Aala!” dɨthana! Gɨmɨ mena yawɨ'manɨgɨ. Sasare yagaala sa' malyabwi marima'naabadesɨ. 24Kɨrɨ' Naangere yaasɨwa'wawɨnyai mala tamamarya'nei mɨ'. Aawa. Sai a'mwe yuyaraavɨ bwiwanna mwaalana! Sai wɨjɨwaakya'nei nawɨ'nyai mwaalana! Sɨnna tɨka daya sabwi myada a'mwera gamɨnyɨ kayaa'na wigaidaapi baihana'na wiana! 25Yɨ sai kwaamu'nanyabwi nayaa yada a'mwe yagaala galazekɨvaidɨvɨsaraavɨre sɨmunyangɨ yavada'galana! Sai sasara yaja' Gotɨyai sahwaraavɨ sɨmunya mudɨkebwi yawɨramaasabwi wɨjaavadera dɨngaka? Yɨ sara yapɨjɨ yagaala nebulya' nayaa yawɨrangabɨ'derera. 26Sɨnnawɨ Kayaa'nanyare naanyavɨ gamɨre yagaalya' mɨdɨnya'neraavɨ wɨla yɨrakakere. Nabaai gɨmɨ kave wɨjɨwaakya'ne sahwara yagaala nebulya' yawɨrangabɨza' naanyavɨ yagalya'mapɨ'devaaibɨ' kumɨre sɨmunyai ayɨna nayaa yawɨpɨ'dere.

Currently Selected:

2 Timoti 2: byr

Highlight

Copy

Compare