1 Timoti 6

Yaasɨwa'wawɨnya yadɨvɨsaraavɨnebwinesɨ.

1Yaasɨwa'wawɨnya yadɨvɨsara nɨgwia mamaarya'nera pwaraavɨre wawɨnya yaasɨwa'na yadɨvɨsaraavɨna. Sahwara Naangerɨ lɨmwadɨvɨta yuyara dara yawɨpɨka! “Nɨmɨre maremwaalyai sai a'mwe naangelyɨ. Sare'na gamɨnne yaya' makɨlɨma!” Sara myawɨri yɨpɨjaraavɨ pwara tɨnna wanganna yadɨvɨ' dara nyawɨpɨdɨka! “Gotɨyarɨ lɨmwadɨvɨsabwi ‘Yaasɨwa'wawɨnyara sana sana yɨpɨka!’ maja'na daaka! Kumɨre Gotɨyai kayaa'nanyalyɨ. Gotɨyarebwina yaasɨwa'wawɨnyara yabwi wɨjɨwaakɨvanɨke' daaka!” Sara nyawɨpɨdɨka! 2Yaasɨwa'wawɨnya pwara kumɨre maremwaalyara Naangerɨ lɨmwadɨvɨsara mwaaihasa'na yaasɨwa'wawɨnyara dara nyawɨpɨdɨka! “Sai neya'mwelyɨra. Sarevɨdaa'nyɨ sahwarɨ galazekɨvalɨdeinyɨ. Malɨmwagyaderɨ mɨdɨmujavaaibɨ' sara mi yɨdeinyɨ.” Sara nyawɨpɨka! Aawa. Sahwara nayaa dara yawɨpɨka! “Nyɨmaremwaaidei Naangerɨ lɨmwadelyɨ. Sarerɨna tewaanya nyɨma'nɨvanɨka. Nabaai sahwarɨna wɨdaayɨvanɨge'na gɨlyɨvɨta tewaanya maarade'nanyɨ. Sa' tewaanyasɨ.” Sɨmunya sasarebwi nayaa yawɨrapɨjɨ wawɨnya nebulyabwi yɨpɨka!

Pwaraavɨnejɨ pɨmɨlɨkaavɨnejɨ yuyangɨnebwi yɨpɨ'de'na yuyagaa' a'mweraavɨ duzɨwaakya! Yɨ nabaai sara yɨpɨ'de'na dɨhaa'bwata jɨtheigɨnyɨ.

Kwaasɨ yagaala wɨjɨwaakya'nera sɨdu'maayaraavɨnesɨ.

3Kwaasɨya ge sabwina wɨjɨwaakajai pwai kwai sɨdu'maayalyɨ. Sasarei nemɨre Naangei Jizaazai Kɨraazɨtɨyare yagaala maamɨdarya nemwaaihannejɨ Gotɨyare sabwine wɨjɨwaakya tewaanyasɨ daza mujɨwaakyadelyɨ. 4Sahwai “A'mwe tewaanyainyɨ nɨmɨnyɨra,” dadei gannya yaya' makinadelyɨ. Gotɨyarebwina waryaabaasalyɨ. Sabwine aane pɨrɨ' kɨrɨ' sɨdu'maayalyɨ. Aawa. Sɨmunyavɨ nabalɨnakelyɨ. Sai yagaala ge ge yaasɨwa'na maanga wɨdada maihurɨ'nyɨyagaala javwinajɨ nawɨ'nyɨna wɨvu'nadelyɨ. Sare'na sɨmunyavɨ nabalɨnakelyɨ. Yagaala sasarebwi da'darebwi yɨma'nadengɨ. Tɨganaarya yɨna, pwaraavɨna munyɨ' kayaa'na yɨna, maanga dɨnyɨna, bɨraiyagaala dɨna, kwaasɨ yawɨ'na “Sai kayaa'na yɨwakelyɨ,” 5yuyagaa' yaasɨwa' maiyagaala bathɨwɨna. Sasarebwi yɨma'nadengɨ. Kwaasɨya wɨjɨwaakadɨvɨta sahwaraavɨre sɨmunya kayaa'nanya yɨma'nakera yagaala nebulya' lɨmwagesa' yɨpalamaa'nɨkere. Sahwara kwaasɨ yawɨ'na “Gotɨyare sabwi mɨdɨnaajaina gɨlyɨvɨta maarya'nebulyɨ.”

6Nebulyasɨ. A'mwei Gotɨyare sabwi mɨdɨnajai tewaanaanga kɨnɨnnakelyɨ. Gotɨyarebwi kɨnɨnnakelyɨ. Gannya kuryai yawɨ'na “Naangerɨna yuya maa'mweinyɨ. Nɨmɨ yɨnɨga wikɨra.” 7Sare' dare'nesɨ. Nenaange kanemaa'nɨ' sagaa' gɨlyɨvɨta aane pɨrɨ' kɨrɨ' mamakabyo. Nabaai dɨvi Kwaakevakɨ yagalya'mavawaajɨ dazagaa' gɨlyɨvɨta aane pɨrɨ' kɨrɨ' makwawaadeina mɨ'. Sarevɨdaa'nyɨ gɨlyɨvɨsanna yawɨrɨbainyɨna myaannera! 8Aawa. Nemɨ wapaayajɨ baazɨ'ma'nyajɨ kɨnɨnnakeina dara daana! Sa nɨmɨnyɨ yɨnɨga nyadengɨra. 9Pwara gɨlyɨvɨta kwalaalya maarya'na yawɨ'dɨvɨsare. Sahwara yɨkurɨyaawia wapetɨrɨnya' mwagi'namaa'da naanyavɨ lɨvapadevaaibɨ' gɨlyɨvɨsa maarya'nebwi mwagi'namaa'da kayaa'nanya kwalaalya navɨ'navɨka galawiada kayaa'nanyabwi munyɨkɨdaa'nyɨ yɨdɨkaavaderera. Aalya' mihaasadevaaibɨ' sasarebwi sahwaraavɨ kayaaka kigalojɨ yuna yɨwɨpɨ'derera. 10Sare' dare'nesɨ. Nɨgwianna tewaanya wɨvu'nya sabwi yuya kayaa'nanya saburɨne kaavɨlyavɨnyɨra. Pwara nɨgwianna tewaanna wɨvu'nadera sasare sabwi wɨmwagi'nadaa'nyɨ Naangerɨ lɨmwangebwi yagalya'ma'dɨvɨ' kumɨre sɨmunyangɨ yuneba daanga naanga yɨbwakɨdɨvɨsare.

Timoti yuyagaa'ne mwaalyabwi dɨragɨnna lɨmwange'na dɨnɨke'nesɨ.

11Kɨrɨ' gɨmɨ Gotɨyare a'mweigɨ yuya dazangɨna bule'na wɨjaava'gɨzɨ lɨkaanya jenada'makwona! Sara ya'gɨzɨ yɨda'maraangebwina mɨjamakuna ja! Nabaai Gotɨyare sabulyɨ Naangerɨ lɨmwangebulyɨ kale yabulyɨ taanginya gyadaa'nyɨ dɨragɨnna kuna daayabulyɨ kwaamu'nanyabulyɨ sabwina mɨjamakuna ja! 12Naangerɨ lɨmwangebwine mala tewaanya' dɨragɨnna tamarɨvaatawakɨna ja! Yuyagaa' yuyagaa'ne gaalyabwi maarya'neigɨnyɨ Gotɨyai jaka gɨzɨvwaramaarakebulyɨ. Sɨnnawɨ a'mwe kwalaalya yawɨranganyaraayaba “Naangerɨ lɨmwamweinyɨ. Gamɨre yuyagaa' yuyagaa'ne gaalyabwi maa'mweinyɨ,” nayaa jalɨkurakagɨnyabulyɨ. Sarevɨdaa'nyɨ sasarebwi kuna nayaa dɨlɨmwagaka!

13Dɨragɨnna gɨthɨma! Gotɨyai yuyangɨne gaalyaburɨ aaya kaavɨlyaryabajɨ Kɨraazɨtɨyai Jizaazai kotɨyagaa' Podɨyaazai Paailatɨmyaba gamɨnyɨna tewaanna jalɨkurakɨnakeryabajɨ dɨragɨnna gɨthɨma! 14Gotɨyare yagaalyavɨ yunebanna nayaa maremwaaidɨ daza' nayaa dɨmɨdɨna! Galazekɨvaidɨzaigɨ gɨrɨkita'nanyaigɨ nyɨma'nɨdɨka! Nayaa yɨja' a'mwera yagaala savɨna kayaakyagaala dɨpɨ'dera mɨka. Nayaa dara maremwaaida'gɨzɨ yunegaa' ku'maayaba nemɨre Naangei Jizaazai Kɨraazɨtɨyai yɨma'naabathehaa'nanyɨ. 15Sagaa'ne Gotɨyai mena dahɨlakake dazahɨgaa' Kɨraazɨtɨyarɨ ku'maayaba marima'naabathelyɨ. Gotɨyai sahwai yɨlaaya ya'ne aaya kaavɨlyalyɨ. Yuya dɨragɨnya kɨnɨnnakei gave sahwalyɨ. Kingɨyaraavɨne Kingɨyalyɨ. Naangeraavɨne Naangelyɨ. 16Mabalyɨ ya'ne aaya kaavɨlyai gavelyɨ. Sahwai baaka naangeba mwaalɨ'. Baaka sayaba nemɨ aya kɨba mwɨyɨ yaannesɨ. Sahwarɨ wangadei a'mwe aane pwai kwai mɨ'. Sahwarɨ wanganadei a'mwe aane pwai kwai mɨ'. Sahwarɨna yɨlaaya wiaana! Gamɨre yaya' munyaba makɨlaana! “Yuyagaa' yuyagaa'ne dɨragɨnya' kɨnɨnnakelyɨ,” wɨdaana! Naanga nebulyasɨ.

A'mwe gɨlyɨvɨta naangejɨyaraavɨnesɨ.

17Kwaaka davakɨya gɨlyɨvɨta naangejɨyaraavɨ dɨragɨnna dara duthana! “ ‘Nɨmɨ naangeinyɨra. Sɨdu'nakeinyɨra,’ nyawɨ'dɨka! Pihadɨka nyɨdɨka! Gɨlyɨvɨta kayaaka yɨme'nya'bɨ' yɨma'nade yuya sanna gɨmɨre sɨmunyavɨ dɨragɨnna nyawɨra'nɨdɨka! Aawa. Gotɨyarɨna nayaa dɨragɨnna dɨlɨmwana! Gamɨ sai gɨlyɨvɨta kwalaalya nawɨ'nya nemɨnyɨne wabahɨlaaka'na naanga nejaavadelyɨ. 18Nabaai tewaanna ja! Yuya tewaanya yɨnne naanga kɨnɨnnakeigɨ dɨmwaala! Yanga yarai duzaama! Gɨlyɨvɨsa wapaaya jaapaidɨ duhaimwana!” Sara duthana! 19Nabaai sara yɨpɨja', Gotɨyarɨna gɨlyɨvɨta kwalaalya mari'bwarakɨpɨ'dere. Sa aaya kaavɨlya' wɨgaimwagathesɨ. “Gaala nebulyabwi yɨnɨga ma'daa nawɨ'nyaba tewaanya mwalaana!” dapɨjɨ sarenna mari'bwarakɨpɨ'dera.

Timoti wawɨnya'na nayaa maremwaalya'nesɨ.

20Timotigɨ Gotɨyare yagaalya' maremwaaidɨnnevɨna dameigɨ dɨthaaka! Yagaala yaasɨwakengɨ bule'na duzaama! Yagaala sa Gotɨyarebwine mɨ'. Nabaai yagaalya kwaasɨ dara dadɨvɨkɨ “Sɨmunya yawɨsa'nesɨ.” Sasare yagaala daza Gotɨyare yagaalyavɨne'na yɨkamaangengɨ. 21A'mwe pwara yagaala yaasɨwakengɨna kwaasɨ dɨna “Nemɨ sɨdu'nakeinera.” Sara yadɨvɨ' Naangerɨ lɨmwanga nebulyavɨna menyaba sɨkwa yɨ'mwamwaasarera. Naangerɨ lɨmwangebwi yagalya'ma'mwaasarera.

Gotɨyare yanga naange' wɨgaimwangebwi sarɨmɨjɨ yɨhye'mwannamwaalana!

Polɨ

Currently Selected:

1 Timoti 6: byr

Highlight

Copy

Compare