1 Timoti 5

Naangere gera geraavɨna maremwaalya'nebwinesɨ.

1A'mwe nera kayaa'na yɨpɨjaraavɨ mayagaala mudɨnna! Aawa. Gɨnnya gɨmaamaangerɨ yavada'gaidɨnyabaaibɨ' dɨhaa'bwasa'na kave duthana! Nabaai gɨnnya ja'mweraavɨ yavada'gaidɨnyabaaibɨ' mɨgɨnyaraavɨ kumɨre yɨpɨjavwi kave duthana! 2Nabaai nemɨlɨkaavɨ gwaange'bɨsamɨlɨkaavɨ yavada'gaina ja! Yɨ mɨgɨnyangɨ gɨnnya ja'mwebɨsangɨna yɨda'maraangebwina yawɨ'dɨ kave yavada'gaina ja!

A'mwe sɨgɨraaya yaanyɨwaakemɨlɨkaavɨnebwinesɨ.

3Yaanyɨwaaka nemɨlɨ' mwaalɨke'na “A'mwe naangesɨ,” dɨnneigɨ nayaa dɨmaremwaala! Nayaa duhaimwana!

4Yaanyɨwaaka pɨrɨ' gannya kaimɨraayajɨ gyakaangejɨ gyakwalaangerajɨ kɨnɨnnake' mwaalajavɨna sahɨnɨ nayaa dara yawɨpɨka! “Nemɨre neyorɨ wɨmaremwalaana! Kɨgaa' maalɨkennaavɨ wapaaya saza yanga nejaavagɨlyayolyɨ. Sare'na wɨrɨvɨkɨraana!” Sara yawɨrapɨjɨ sara yadɨvɨ' kumɨre jɨlɨkaimɨraayamɨlɨkaavɨna Gotɨyarebwi yawɨramaapɨ'de'nanyɨ. Sare' dare'nesɨ. Sara yɨpɨ'de sabwina Gotɨyai yawɨrangamanɨ' “Tewaanyasɨ.” 5Nabaai yaanyɨwaaka nemɨlɨ' kaimɨraavɨmaaya' gyakaangejɨ gyakwalaangerajɨ sa maaya' yuna gave' mwaalaka yɨ a'mwe daza' dara yɨvanɨkesɨ. Gotɨyarɨna dɨragɨnna lɨmwada sahwarɨ nayaa yemwaaida yuyagaa' yɨrɨkevɨjɨ sawɨsavɨjɨ Gotɨyarɨ wɨgainya'ne kuna yɨdaangada kuna wɨdɨvanɨkesɨ. 6Sare' kɨrɨ' yaanyɨwaaka pɨrɨ' wabahɨlaaka sabwi mɨdɨda mena bainɨkesɨ. Kuna mwaalɨka kɨrɨ' Gotɨyarɨna gannya kuryai mena bainɨkesɨ. 7Yagaala daza' mɨdɨnya'na a'mwemɨlɨkaavɨ dɨthɨhaa'bwaka! “Nayaa yɨda'na kamwaalapɨjɨ pwara tɨnna wangadɨvɨ' ‘Samɨlɨka kayaa'na yadɨvɨsamɨlɨke.’ nadɨpɨdɨka!” da'gɨzɨ dɨthɨhaa'bwaka! 8A'mwe pwai kwai Naangerei gannyamɨlɨkaavɨ nayaa mamaremwaalyɨ yajai, yɨ nabaai gɨthɨdei gannya jɨlɨkaimɨraayamɨlɨkaavɨ nayaa mamaremwaalyɨ yajai Naangerɨ lɨmwangebwina gɨnyɨra'mwakelyɨ. A'mwe malɨmwagyadei gannya neyorɨ wɨgaimwagaza' yɨ sasarebwi Naangerɨ lɨmwadei sara mugaimwagyɨvanɨka kayaa'nanyai malɨmwagyaderɨ wavɨlavɨkelyɨ.

9Bukuyavɨ yaanyɨwaaka nemɨlɨkaavɨna Naangerera wɨgaimwange'na nɨgwia wɨjaaya'nemɨlɨkaavɨre yaya pɨkarya yɨda'na ja! Yaanyɨwaaka da'daremɨlɨkaavɨre yaya yɨda'na ja! Yaanyɨwaakemɨlɨkɨ kwarame 60 (a'mwe daraai dalyaraavɨre sɨvɨlatɨraalya) mena wavɨla'nɨke', a'mwe gave pware' mwaainɨkesɨ. 10A'mwemɨlɨka samɨlɨkɨna jalɨkurakadɨvɨ' “Tewaanya yadesɨ,” yɨ gannya kaimɨraayangɨ tewaanya maremwaalakesɨ. Yɨ anga pɨbadaa'nyaraavɨna tɨka wapaaya yanga wɨjaavakesɨ. Wɨdaaya'ne' Naangerɨ lɨmwadɨvɨta tewaanyaraavɨre sɨvɨla aalya yaka dazabwina yakesɨ. Yɨ a'mwemɨlɨkaavɨ taanga wiadaa'nyɨ nawɨ'nya wɨgaimwagakesɨ. Sasare' yuya tewaanya saza yakevɨre yaya' yɨda'na ja!

11Yaanyɨwaaka a'mwe mɨgɨnyangɨna yaya' mida'dɨnnera! Sare' dare'nesɨ. Kumɨre munyɨ' kwala maa'nya'na ayɨna kwima'nojɨ Kɨraazɨtɨyarɨ gɨnyɨrapɨ'dengɨra. 12Sahɨnɨ sɨnnawɨ Kɨraazɨtɨyarɨ dɨragɨnna wɨdesa' yesɨmapɨ'de'na yɨwetawakya kɨnɨnnakengɨra. 13Nabaai sasare pɨbulyɨ yadɨvɨsangɨ. Sahɨnɨngɨ maa'na widaasɨ anga yuyangɨ yamaryadɨvɨsa'na aangaa'na yɨbainyɨna yadɨvɨsangɨ. Nabaai a'mwe maa'na widengɨna mɨ'. Aawa. Pwaraavɨre yagaalya kadɨka wɨ'nadɨvɨ' yaasɨwa' wɨdamarya yadɨvɨ' pwaraavɨre wawɨnyanna yaasɨwa'na jɨwɨryadɨvɨ' yagaala madɨpɨne wɨdadɨvɨsangɨ. 14Sarevɨdaa'nyɨ gɨthɨwɨja' nayaa kadɨka dɨnyu'nana! A'mwe mɨgɨnya kwala ayahi maa'napi kaimɨraaya maa'dɨvɨ' kunnya angengɨ mwaaidɨvɨsamɨlɨkaavɨ nayaa maremwaaibɨ'dengɨra. Nabaai sara kyapɨjɨ yɨkamaanga kwai tɨnna nenganojɨ nemɨre kayaa'nanyabwina bɨraiyagaala mujɨ neyade'nanyɨ. 15Sare' dare'nesɨ. Yaanyɨwaaka pɨnɨ Kɨraazɨtɨyarɨ mena mamɨdɨnyeva Saataanɨmɨ mɨdɨdɨvɨsa'na sara gɨthɨwe'nanyɨ.

16Nabaai a'mwe Naangerɨ lɨmwade pɨrɨ' kɨrɨvɨre angevɨ mwaaidɨvɨta yaanyɨwaakengɨ gamɨre jɨlɨkaimɨraayajɨ kwalaangere jɨlɨkaimɨraayajɨ sangɨ wɨgaimwagana! “Naangere kusɨlaanyavɨyara yaanyɨwaaka yune gave mwaaibɨza samɨlɨkaavɨ yɨnɨga wi'na maremwaaibɨka!” dozɨ maremwaaladesɨ. Yɨ kusɨlaanyavɨyara yaasɨwa'na namaremwaaibɨthɨka!

Naangereraavɨ maremwaalya'neraavɨna dɨnɨkebwinesɨ.

17Naangereraavɨne a'mwe naangera wawɨnya nawɨ'nya'na maremwaaidapiyaraavɨre yaya makidɨvɨ' nɨgwia tewaanya'na duzaayɨla! Sahwara maarya'nera Gotɨyare yagaalya' yagɨyagɨ nayaa wɨdadɨvɨ' yagɨyagɨ nayaa wɨjɨwaakadɨvɨsaraavɨna naanga duzaayɨla!

18Sare' dare'nesɨ. Gotɨyare bukuya' dara dɨnɨ' “Bulɨmakaawoyai witɨya lɨlɨvainadaaya'nerɨ maangevɨ majɨbwɨyɨnnera! (Sai nana!)” Nabaai dara dɨnɨ' “Gɨmɨre aawawɨnya yakei gannya nɨgwia wɨrɨvɨkɨrya'nei yɨnɨga wi'na maarana!” (Sara dɨnɨke'na sabaaibɨ' a'mwe naangeraavɨre yaya makidaapɨjɨ nɨgwia maapɨka!)

19Nabaai a'mwe gave pwai wɨdɨna “Nɨmɨre naanga dazai kayaa'na yɨwakelyɨ.” Gavei wɨdɨna yajare yagaala daza' mu'nɨnnera! Pwaraai daraai dala kwara kagɨzalɨkurakapɨjɨ yagaala daza' kadɨka du'nadeigɨnyɨra. 20A'mwe naanga pwara kayaa'nanyabwi kuna kyapɨjɨ yuyaraayaba maanga duthatheigɨnyɨ. “A'mwe naanga pwarajɨ kayaa'nanyabwina lɨka yɨpɨka!” da'gɨzɨ ku'maaya maanga sara duthatheigɨnyɨ. 21Gotɨyalyɨ Kɨraazɨtɨyai Jizaazalyɨ Gotɨyare mamaayara ejelɨyaraavɨ dahɨlakɨnɨkerajɨ saraayaba dɨragɨnna gɨthɨma! Yagaala dazangɨ nayaa pada'galamaremwaala jɨtheigɨnyɨ. “Sɨmunyavɨ a'mwe naangerɨna yarai madɨwɨna! ‘Nebulyasɨ. Sai kayaa'nanya' yɨwakelyɨ.’ Nabaai yarai madɨwɨna! ‘Aawa, sai kayaa'nanya' mi yaja'na,’ ” da'gɨzɨ pada'galamaremwaaina ja! Aaya kaavɨlya' bɨramaa'na ya'gɨzɨ nayaa jawɨbwaka! Aane pwai kwarɨ maanga yarai wɨdadɨ aane pwai kwarɨ wabwiwayagaala yarai wɨdadɨnyabwina minna! Yuyaraavɨ nayaa avaaina jawɨbwaka!

22A'mwe pwai kwarɨ maara'gɨzɨ “Naangereraavɨna maremwaaladela!” da'gɨzɨ yarai madahɨlakɨnna! Yɨme'nya'bɨ' ata madathɨwadɨnna! Sara yɨjaigɨ sahwai kayaa'nanyabwi kyojɨ taanga naginaradɨka! Pwarebwina nayaa yɨwa'dɨnneigɨ ata dakɨdeigɨnyɨ. Sara yadɨ yɨda'maraangeigɨ kuna dɨmwaaideigɨnyɨ. 23Gɨmɨre munyɨkɨ daanga gɨvɨmanɨke' ayabaaibɨ' aalya gavesɨ manɨnna! Aawa. Waainɨya maalɨkemɨlɨsɨ dɨnana! Sara kya'gɨzɨ gaimwanga gyathe' nalaaya yuyagaa' gima'nade gɨmarasɨ'nadesɨ. 24A'mwe naangeraavɨ wɨmwaaihya'ne yagaala gɨthɨwe'na gɨthɨma! A'mwe pwaraavɨre kayaa'nanya ku'maayaba wa'dengɨ. Sara kayaa'na yadɨvɨ' yɨme'nya'bɨ' maryawɨbwa'daanyangɨ. Pwara kumɨre kayaa'nanya lɨka yulya'dengɨ. Sareraavɨre kayaa'nanya dɨvidaa'nyɨ ku'maayaba yɨma'naabathengɨ. Sare'na nayaa jɨwa'deigɨnyɨ. 25Kayaa'nanya sara yɨvanɨgatabaaibɨ' pwara tewaanya yɨvanɨgasare. Pwaraavɨre tewaanya ku'maayaba wa'dengɨ. Tewaanna sara yadɨvɨ' yɨme'nya'bɨ' yawɨrangadaanyangɨ. Pwara kumɨre tewaanya lɨka yulya'dengɨ. Sareraavɨre tewaanya dɨvidaa'nyɨ ku'maayaba yɨma'naabathengɨ.

Currently Selected:

1 Timoti 5: byr

Highlight

Copy

Compare