1 Timoti 4

Wɨjɨwaakya kwaasɨyaraavɨnesɨ.

1Kurya Tewaanyai dara jalɨkurakɨvanɨ' “Dɨvi sagaa' aayagasana pwara dɨragɨnna lɨmwangeburɨne yagaala yagalya'mapɨ'derera. Sahwara aa'neraavɨ kwaasɨyaraavɨ wɨ'nɨpɨ'dere. Yɨmakera wɨjɨwaakadɨvɨsaraavɨre yagaalya mɨdɨbɨ'dere.” 2Kwaasɨ yagaala sa a'mwe kwaasɨ yadɨvɨsara maarapɨjɨ sahwaraavɨ wɨjɨwaakɨpɨ'dera. Dɨke' kɨlaakejɨkɨ kayaaka wigaidevaaibɨ' a'mwe kwaasɨ wɨjɨwaakya'neraavɨre sɨmunya tewaanyai padaihɨrakyai kayaaka yɨgainɨkere. Wagɨlyabwina yɨbwakɨdɨvɨtara mɨ'. 3A'mwe dazara kwala maaryabwina kɨmaakɨya dakadɨvɨ' a'mweraavɨne tɨka wapaayangɨna kɨmaakɨya dakɨpɨ'derera. Kɨrɨ' Gotɨyai wakaka daza a'mweina dɨragɨnna lɨmwadaa nebulya'na yawɨrangadaanyaina Gotɨyarɨ “Su! Su!” wɨdadaa sa dapaade'nanyɨ. 4Gotɨyai yuya wakyaake tewaanyannanyangɨ. Sarevɨdaa'nyɨ yuya maraadengɨra. Sangɨna dɨmaaryidehaa' Gotɨyarɨ “Su!” wɨdɨpɨja aane pɨrɨ' kɨrɨ' nalɨvarabɨthɨka! 5Sare' dare'nesɨ. Gotɨyai yagaala “Nawɨ'nyasɨ,” dɨnɨke'najɨ “Da' Gotɨyai nemɨnyɨna wɨjaavɨnɨkesɨ. Tewaanyasɨ,” yawɨ'dɨvɨ' Gotɨyarɨ “Su!” duzide'najɨ nawɨ'nyaange' dɨmaaryidesɨra.

Timoti nayaa yada yagaala nebulya'na wɨjɨwaakaderɨnebwinesɨ.

6Yagaala daza' nehɨrya'mwera Kɨraazɨtɨyareraavɨ duzɨwaakya! Sara wɨjɨwaakɨjaigɨ Kɨraazɨtɨyai Jizaazare wɨdaayadɨnya tewaanyaigɨ dɨmwaaideigɨnyɨ. A'mwei wapaaya nada gamɨre kɨlaakejɨ' dɨragɨnyajɨ' wa'devaaibɨ' yagaala Naangerɨ lɨmwangebulyɨyangɨjɨ wɨjɨwaakya tewaanyabwi mɨdɨmanɨgɨnyavɨjɨ yawɨrangadɨ gɨmɨre kuryai dɨragɨnyai gɨmwaaladeigɨnyɨ. Sareigɨ duzɨwaakya! 7Wajɨngyagaala navɨ'navɨkyagaala myawɨ'dɨnna! Yagaala sa Gotɨyarɨna yawɨramaarya'ne mɨka. Aawa. Gotɨyare saburɨ nayaa kuna yawɨramaa'dɨ Gotɨyarɨ dɨragɨnna dɨmɨdɨdeigɨnyɨ. 8Sare' dare'nesɨ. A'mwei Kwaaka davakɨ mwaaidehaa' wawɨnya yade'na yagɨnya kɨlaaka dɨragɨnya yɨma'nadevwi tewaanyabulyɨ. Gotɨyarɨna yawɨramaa'de'na kuryai dɨragɨnya yɨma'nadevwi tewaanaangebulyɨ. Kwaakevakɨ mwaaiho dahaa' Gotɨyarebwi negaimwagathevulyɨ. Nabaai Gotɨyaryaba kuna mwalaaja dɨvi kɨgaa' sahɨbwi kuna negaimwagathevulyɨ. Sahɨburɨdaa'nyɨ tewaanaangebulyɨ. 9Yagaala daza' naanga nebulyasɨ. Daza' a'mwe yuyara yɨnɨga wɨ'napɨjɨ yunebanna dɨragɨnna lɨmwabɨ'de'nesɨ. 10Sare' dare'nesɨ. Gotɨyare wawɨnya yagɨyagɨ mɨraagɨkɨ'manɨgo'nanyɨ. “Gotɨyai nemɨre kayaa'nanyabwi marasɨ'naka nayaa nemaremwaalɨkelyɨ,” yawɨ'daa sahwarɨ yemwaidaa mɨraagɨkɨ'manɨgo'nanyɨ. Gotɨyai sahwai yuyagaa' mwaaidelyɨ. A'mwe yuyaraavɨ padaihasamaa'delyɨ. Yɨ nabaai Naangerɨ lɨmwagaanneinaavɨ nebulya'na nevadaihasamaa'mwakelyɨ. 11Yagaala daza' a'mweraavɨ dɨragɨnna duthana! Nayaa mɨdɨbɨ'de'na duzɨwaakya!

12Aane pwai kwai gɨmɨnyɨ tɨnna wanganna gyada mɨgɨnyaigɨnyɨ kɨrɨ' “Maalɨkelyɨ,” nyawɨradɨka! Aawa. Tewaanyabwi nayaa yɨnnebaaibɨ' Naangerɨna lɨmwadɨvɨsara gwanganapɨjɨ sara yɨpɨneigɨ dɨmwaaideigɨnyɨ. Yagaala nawɨ'nya dɨnneigɨnyɨ. Nawɨ'nyanna yɨnneigɨnyɨ. Kale gyada nayaa wɨgaimwadɨnneigɨnyɨ. Naangerɨna dɨragɨnna lɨmwadɨnneigɨnyɨ. Yɨda'maraangebwina yawɨ'dɨ yɨnneigɨnyɨ. Sara ya'gɨzɨ gɨmɨnyɨna “Maalɨkelyɨ,” myawɨri yɨpɨ'de'nanyɨ. 13Dazagaa' kuna nyemwaaidɨ a'mweraayaba Gotɨyai dɨnɨke' nayaa wangadɨ duthatheigɨnyɨ. Kumɨre yɨpɨjavwi dɨhaa'bwata jɨtheigɨnyɨ. Nayaa duzɨwaakɨdeigɨnyɨ. 14Sare' Gotɨyare dɨragɨnya' sɨhumalevɨna navɨka nagyathɨka! Kɨgaa' Gotɨyai kuda' pwara gɨmɨnyɨna “Gotɨyare wawɨnya yannelyɨra,” wɨdesagaa' Naangereraavɨ maremwaaidɨvɨsara asa yɨlagwakadaapi Gotɨyai gannya wawɨnya'ne dɨragɨnya' gɨzaava'. Dɨragɨnya' gɨzaavake' ayɨna yawɨralɨmwadɨ dɨragɨnyasɨ kuna jɨtheigɨnyɨ. 15Sana dɨragɨnna yɨya yadɨ yuya dazangɨ nayaa dɨmaremwaaideigɨnyɨ. “A'mwe yuyara nɨmɨnyɨna ‘O, yuyagaa' gamɨ naangei, tewaanyai kuna yɨma'naabɨvanɨkei daaka!’ yawɨpɨka!” da'gɨzɨ nayaa sara jɨtheigɨnyɨ.

16Nabaai mwaaimanɨgɨnya saburɨjɨ a'mweraavɨ wɨjɨwaakɨvanɨgɨnya saburɨjɨ nayaa dɨmaremwaala! Yuyagaa' dazahɨrɨvɨna kuna dɨragɨnna jɨtheigɨnyɨ. Sare' dare'nesɨ. Sara yɨja' nayaa yavada'gaina gyathesɨ. Nabaai a'mwe kadɨka gu'nɨpɨjaraavɨjɨ yava'da'gaina wiadesɨ. Sagaa' tewaanyaihi dɨmwaalyideihɨlyɨra. Dɨvadaihasamaa'nyideihɨlyɨ.

Currently Selected:

1 Timoti 4: byr

Highlight

Copy

Compare