OBAJA 1
1
1 Gitio noyo ragu inala' ri Obaja. Nampasaboi io ra ragu ru Tuhan Raja' intor ra ulun ru Idom.
Mangukum Tuhan ra Idom
Nangator Tuhan ra ulun sinusub Nano mongoi ra bansa'-bansa',
am norongog takau noyo tanou Nano,
“Tampos kano!
Ibok kano mangayou takau ra Idom!”
2Indagu Tuhan ra ulun ru Idom,
“Pasaukon Takamin ra malawo;
ngaangai' bansa' magasab ramuyun.
3Rinuung kau ru limbau mino.
Pusor bandar min noyo kubu ru batu ondo' mapiot;
intok ayanan min giu' ra tampak ru gunung ondo' masawat.
Ginio sabap ra akau mangkara',
‘Osoi kia ondo' masaga' mamparatu' ramon?’
4Kabalu' pana mambaal kau ra baloi
giu' ra intok masawat koson ra bunsut ru susuit kanui,
ilain koson soroi ra intok ru butitin-butitin,
ratuin Takamin.
5Paat ra ulun mantakou matong paat ra rondom,
mangalap ilo ayuk ra atan ondo' kasagaan.
Paat ra ulun mangupu' ra kawa' ru anggur,
masalok ilo manatang kukula' ngaunor.
Kaa' pantula' mampaluus ramuyun ngaangai' ra malingon.
6Akau papag ri Isau,
rapu' min ginaau.
7Pagun paguum namparuung ramuyun;
pinagiru' nilo akau intor ra pagun min.
Raino kinala kau ru ulun ondo' ragili nobonsoi ramuyun.
Linandak kau ru ulun ondo' nangakan nababaya' ramuyun.
Mindagu ilo intor ramuyun,
‘Ati kia ngaangai' kapintaran nilo raino?’
8Paat ra orou Aku mangukum ra Idom,
pusoon Ku ulun no ondo' mapintar,
am liomon ngaangai' kapintaran nilo.
9Ulun tutumula' intor ra Timan malaa',
ngaangai' saujor giu' ra Idom potoyon.”
Sasaban ra ulun ru Idom ukumin
10“Nantakou kau am namatoi ra pabukat min, papag ri Jakub.
Ginio ra pusoon kau
am asabin ru ulun ra kolondo' pupus.
11Paat ra pantula' mampalunsai ra kulobon garabang ru Jirusalim am kuasaan bandar no,
kolondo' atan pana mabaal min.
Nogondo' laat min ra ulun bansa' ra bokon ondo' nagaut ra rapu' ru Jirusalim,
am tinayar-tayar ginio ra ilo galama'.
12Akau sotopot no kalo maansukan
sabap ra karaat ondo' nakalumpa' ra pabukat min giu' ra Jiuda.
Akau sotopot no kalo maansukan
paat ra orou ilo mapuso.
Akau sotopot no kalo makakurit risilo
paat ra ilo mapagon.
13Akau sotopot no kalo sumubol ra ralalom ru bandar ru ulun Kuno
koson maansukan sabap ra mamagun nano maimbolo',
am koson mampagaau ra rapu' nilo paat ilo malumpa' ru karaat.
14Akau kalo musiti' migor giu' ra lisangon ru ralan,
koson mongompong ra ulun ondo' tatanga' magiru'.
Akau kalo musiti' mampataak risilo ra pantula'
paat ra orou ilo malumpa' ru kapaganan.”
Mangakim i Aki Kapuuno' ra bansa'-bansa'
15“Mamaar noyo orou no, paat ra Aku, Tuhan mangakim ra ngaangai' bansa'.
Akau ulun ru Idom,
atan ondo' binaal min,
baalon niayuk ramuyun.
Balasin kau nontopot koson ra atan ondo' binaal min.
16Giu' ra rasawat ru bulur Kuno ondo' matulai, ulun Kuno nanginum noyo intor ra sangkir ru inumon mapait
ondo' tatandu' ru ukuman nilo.
Kaa' ngaangai' bansa' ra sambalayan
manginum intor ra sangkir ru inumon ondo' mapait poyo kaga'.
Musiti' nilo inumon ginio saboi makai',
am maluus ilo ra kolondo' babaya'.”
Kamanangan ru Israil
17“Kaa' giu' ra rasawat ru Bulur Sion,
mokoondo' kukula' ngaulun ondo' maayag,
am bulur no masauk ra intok ondo' matulai.
Papag ri Jakub momolonggom ra tana' tinungkus nilo.
18Papag ri Jakub am i Jusup koson ra apui,
pusoon nilo papag ri Isau
koson ra apui monolob ra rami.
Kolondo' sangulun pana intor ra papag ri Isau maayag.
Aku, Tuhan nakaindagu noyo.
19Ulun intor ra tampilon rabugus ru Jiuda mayan ra pagun ru Idom;
ulun intor ra gana' ru bulur giu' ra tampilon kalasaan manguasa' ra wilayah ru Palistin.
Ulun ru Israil momolonggom ra wilayah Ipraim am Samaria;
bansa' ru Binjamin manguasa' ra libung Giliad.
20Pulalai ru ulun pinatiran intor ra tampilon ralayo sumaguli',
am manguasa' ra Pinisia saboi ra Jarpat giu' ra ralayo.
Ulun intor ra Jirusalim ondo' pinatiran giu' ra Sardis,
sumaguli' am manalingaau ra bandar-bandar giu' ra tampilon rabugus ru Jiuda.
21Ulun ru Jirusalim ondo' nakasugut
mamulunsar ra Idom am kuasaan no ginio.
Tuhan galama' mamarinta koson ra raja'.”
Currently Selected:
OBAJA 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.