NAGUM 1
1
1 Gitio noyo tanou intor ri Aki Kapuuno' intor ra bandar Niniwi. Tanou ti pinabala' ralalom pinaintalang ri Nagum, sangulun nabi intor ra Ilkos.
Sangit ru Tuhan ra Niniwi
2 Tuhan i Aki Kapuuno' kalo masaga' ra mokoondo' pagilou,
ulun ondo' manggal Riso maaru' makaalap ra ukuman.
Ra sumangit kaga',
mansuli' Io ra pantula' Nano.
3 Tuhan kalo mataki' sumangit,
kaa' Io makakuasa',
am kalo igondo' Io nampalabus
ra ulun ondo' nambaal ra kasalaan intor ra ukuman.
Giu' ra intok ugaran ru Tuhan,
sumalula' puting beliung am taupan;
gaun iono kaau intor ra kalayam Nano.
4Ra susuban Nano, raat malasak;
sungoi pana lasakin.
Padang-padang giu' ra Basan mapua',
Gunung Karmil pana mapua',
am lumonot boo bunga'-bunga' giu' ra Libanon.
5Gunung-gunung muyog giu' ra saang ru Tuhan;
bulur-bulur lumuu' ra saang Nano.
Tana' ti mogonggon paat ra Tuhan matong;
tana' ti am ngaangai' ru mamagun nano monontol.
6Osoi kia tumaan paat ra Tuhan sumangit?
Kolondo' osoi pana makalabus intor ra sangit Nano.
Paabuson No sangit Nano ondo' bibilak,
saboi batu maumok am masauk ra kaau giu' ra saang Nano.
7 Tuhan no moonsoi;
manindung Io ra ulun Nano paat ra ilo mapagon,
magalung Io ra ulun ondo' sumindung Riso.
8Pusoon No ngaangai' pantula' Nano,
Io koson ra liur maayo ondo' nakalumpa' risilo.
Binutus No painawo ru ulun ondo' manggal ra kasagaan Nano.
9Kalaatan ra atan kia ondo' inatang min ra Tuhan?
Mamuso Io ramuyun ngaangai'.
Io kalo pana mansuli'
saboi induo ra pantula' Nano.
10Akau magauk solobon koson ra rami ondo' mapua',
koson ra bulungkut makaruui ondo' nanririlit.
11Intor rirun, okou Niniwi, siminalula' noyo sangulun ondo' nototop ra inatangan malaat. Nangatang io koson manggal ra Tuhan. 12Gitio noyo ragu ru Tuhan ra ulun Nano, “Kabalu' pana ulun ru Asyur maikang am masuang, pusoon ilo am lumiot. Akau ulun Kuno, kabalu' pana nangkinibit Aku noyo ramuyun naimbolo', kalo boo baalon Ku ginio. 13Raino pupusin Ku kuasa' ru Asyur ramuyun, am ukaton Ku rantai ondo' nakabangkil ramuyun.”
14Gitio noyo ondo' inaru' ru Tuhan intor ra Asyur, “Kolondo' ilo ra papag koson mamparayus ra bansa' nilo. Tutukon Ku sinungkalalaing ondo' giu' ralalom ru kuil-kuil ru dewa nilo. Tatanga' Ku baalon kalalair lobong ra tayar ru ulun ru Asyur, kalo maaya' ilo maayag!”
15 Ilai', sangulun sinusub matong mansail ra gunung-gunung koson mampasaboi ra tanou moonsoi. Matong io koson mampatanou ra kamanangan! Mamagun kau ngai' ru Jiuda, pangiantak kano ra pangiantakan min am suguto' noyo nazar ondo' binantu' min ri Aki Kapuuno'. Ulun malaat totopot kalo boo mamulunsar ra pagun min. Pinuso ilo noyo ra malingon.
Currently Selected:
NAGUM 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.