SULABOI 1
1
Kaimbalaan ru Jirusalim
1Mapara' boo siluk ru Jirusalim, ondo' ragili nososok ra mamagun!
Ragili bandar no urumaton giu' ra titikop ru tana', kaa' raino koson ra ruandu' napuor.
Bandar ondo' matulai kaga' ra tana' ti nasauk noyo ra ulipon.
2Nosorondom io nantangi', lomou nano tumilisan ra pingas.
Kolondo' sangulun pana intor ra rangan nano masaga' mapabansuk riso.
Ngaangai' rangan nano liminaat am nantula' riso.
3Mamagun ru Jiuda sinauk ra ulipon ondo' kalo maikang,
jinajalan nangiruan ra kampung namagunan nilo.
Minayan ilo ra gino ngai' ru bansa'-bansa',
ra kolondo' intok ondo' mangani' ra kaansayan.
Inawangan ilo ru pantula' paat ra ilo naimbolo'.
4Raino kolondo' sangulun pana matong ra Baloi ru Tuhan paat ra orou pangiantakan.
Ralaa-ralaa ondo' marimbai ra giu' no maimbolo',
am imam-imam mampalaa.
Kulobon garabang ru bandar masiluk, am bandar Sion linibungan ru kangilukan.
5Pantula' nakasugut sabap nakapanguasa' ra Jirusalim;
Tuhan nambaal riso naimbolo' sabap ra masuang kaga' tula nano.
Mamagun nano rinakop am inibit ru pantula'.
6Kinoonsoi ru Jirusalim nairu' noyo.
Raino tingganai-tingganai nano koson ra tambang ondo' malawo am naitilan;
Kolondo' ikang nilo paat inilou ru pantula'.
7Nakakara' Jirusalim ra kinaayo nano paat ra galing i;
raino bandar no nalunsai am naimbolo' kaga'.
Kolondo' osoi pana ondo' mangindangan riso paat ilo kinala ru pantula';
ngaangai' panguasa' nakakurit ra naratuan nano.
8Kalio boo kaurumatan nano;
nagibabaang io am inasaban.
Nampalaa io am nampasibuni ra bulos sabap nauyu',
nampajamol Jirusalim ra inan ra tula ondo' maayo.
9Jamol nano nakito kaga' kaa' kalo lioon no.
Nalunsayan nano makalalaa', kolondo' osoi pana makabansuk ra guang nano.
Pantula' nano namanang am nantangi' io makimasi' intor ra Tuhan.
10Pantula' nano nampagaau ra ngaangai' kalangkayaan nano.
Nakakito Io risilo siminubol ra Baloi ru Tuhan,
intok kalo iowon subolon ru ulun ondo' sala' ka ulun ru Tuhan.
11Mamagun ru bandar no mampalaa liliwa' ilo maguyum ra akanon,
rapu' inaligan nilo ra akanon,
maa' raginio marayus ilo maayag am kalo matoi.
Golok bandar ru Jirusalim, “Ilai' aku no, iou Tuhan, am ilai' kaimbalaan kutu.”
12Golok io ra moonong ulun ondo' mansail ra giu', “Ilai' aku no.
Kalo kia igondo' osoi pana naimbolo' koson raki',
kaimbalaan ondo' pinaratong ru Tuhan raki' sabap ra sangit Nano.
13“Namparatu' Io ra apui intor ra limbowon, apui ondo' nonolob ra inan kuno.
Nampaatang Io ra landak raki' am namparatu' raki' ra tana'.
Io pana nompoloso boo raki' sangulun naimbolo' ra nonsongorou.
14“Inalap No ngaangai' tula kuno, am binangkos no nasauk rondo',
am pasisigoto' ra liog kuno, saboi bagat nano nampalawo raki'.
Pinataak aku ru Tuhan ra pantula' kuno, am kalo maikang aku gumula' risilo.
15“Kuritin ru Tuhan pantula'-pantula' kuno;
nangator Io ra saujor koson mamuso ra ungkuyon mamulok kuno.
Kininjangan No ulun kuno saboi natutuk, koson ra ulun mamaga' ra kawa' ru anggur.
16“Ginio sabap ra lomou kuno rumatu'.
Kolondo' osoi pana makabansuk ra guang kuno, kapoam makaikang ra guang kuno.
Pantula' nangala raki'; mamagun kuno natatakan ra ngaangai' no.
17“Pinatutui ku kalindu', kaa' kolondo' osoi pana mangindangan raki'.
Nangator Tuhan ra pantula' intor ra ngaangai' intok koson tumula' raki'.
Pamakuan nilo raki' koson ra ampangara'.
18“Kaa' Tuhan matimpok sabap ra inanggal ku susuban Nano.
Rongog kano raki', akau ngaangai' bansa', ilai' aku no ondo' marualan.
Kamulakan kuno ungkuyon am ruandu' rinakop am inibit minugar.
19“Nampiau aku ra rangan-rangan moonsoi kuno, kaa' marara' ilo mangindangan raki'.
Imam-imam am tingganai-tingganai matoi giu' ra ralan-ralan ru bandar,
paat maguyum ra akanon koson rumayus maayag.
20“Iou Tuhan, ilai' kaimbalaan kuno am kinapagon ru guang kuno.
Guang kuno natutuk sabap ra tula kuno ragili.
Pampatayan masauk giu' ra ralan maayo, kaa' niayuk giu' ra ralalom ru baloi pana mokoondo' patayan.
21“Rongog kano ra laa kuti; kolondo' osoi pana makabansuk ra guang kuno.
Pantula' kuno maansayan sabap namparatong Kou ra karaat ti raki'.
Porotongo' orou ondo' binantu' Muno, maa' raginio pantula' kuno maimbolo' koson raki'.
22“Sonsolo' ilo sabap ra ngaangai' kalaatan nilo.
Ukumi' ilo koson ra Okou nangukum raki' sabap ra tula kuno.
Mampalaa aku sabap ra mangiluk kaga' guang kuno.”
Currently Selected:
SULABOI 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.