JOSUA 1
1
Nanusub i Aki Kapuuno' ri Josua mampagaau ra Kanaan
1Pakapatoi i Musa ulipon ru Tuhan no, minindagu Tuhan ri Josua anak ru Nun, mangindangan ri Musa. 2Indagu Tuhan, “Minatoi noyo ulipon Kuno i Musa. Moonsoi tumampos kau, okou am ngaangai' ulun ru Israil. Laup noyo ra Sungoi Jordan am ongoi noyo ra tana' ondo' taakin Kuno risilo. 3 Nambala' Aku ri Musa ra ngaangai' tana' ondo' kirawin min pataakin Kuno rirun am ra ngaangai' ulun Kuno. 4Balitan ru wilayah min tumalimpuun intor ra tana' kaagisan tampilon ra rabugus saboi ra Kagunungan Libanon tampilon ra ralayo; intor ra sungoi ondo' maayo, iono Sungoi Iprat tampilon ra sirangon am titikop pagun ru ulun ru Git, saboi ra Raat Tanga' tampilon ra kalasaan. 5 Okou Josua, kolondo' sangulun pana makapangala rirun buoi ra okou maayag. Mabaya' Aku rirun koson Aku nabaya' ri Musa. Magail Aku mabaya' rirun, am kalo toojo mangiruan rirun. 6 Musiti' kou mangintopot am baani, sabap masauk kou ra tingganai ru ulun ragitio paat ra ilo mampagaau ra tana' ondo' binantu' Kuno ra kinamatuaan nilo. 7Musiti' kou mangintopot am baani, am tutuno' noyo maa' raginio gumagaya' kou ra ngaangai' Ukum ondo' tinaakan rirun ru ulipon Kuno, i Musa. Pai' liliani' ati-ati tayar ru Ukum no, maa' raginio makasugut kou ra ati pana angayan muno. 8Tutuno' noyo maa' raginio magail Kitab ru Ukum basaan ra ulun Kuno paat akau sumambayang. Igila' noyo ra kitab no ra matawang am rondom; tutuno' noyo maa' raginio gumagaya' kou ra ngaangai' ondo' tinulisan ra ralalom no. Koson raginio noyo okou langkaya' am makasugut. 9Karaa' noyo susuban Kuno rirun maa' raginio mangintopot am baani kou! Pai' kalaa' kapoam mapalo guang, sabap Aku Tuhan i Aki Kapuuno' muno, mabaya' rirun ra ati ayuk angayan muno.”
Nanaak i Josua susuban ra ulun ru Israil
10Kopongo raginio nanusub i Josua ra tingganai-tingganai ru Israil maa' raginio 11lumiput ra titikop pangkiman am mambala' ra ulun raginio, “Pongoo' noyo akanon sabap talu ngoorou poyo lumaup kau ra Sungoi Jordan koson mampagaau ra tana' ondo' pataakon ru Tuhan i Aki Kapuuno' min ramuyun.”
12 Indagu i Josua ra bansa' ru Rubin, Gad am sampiruo intor ra bansa' ru Manasi, 13“Karaa' noyo! I Musa, ulipon ru Tuhan no nambala' noyo ramuyun ra Tuhan i Aki Kapuuno' min manaak ra tana' tampilon ra sirangon ru Sungoi Jordan koson masauk ra ayanan min. 14Andu' am anak min am niayuk bibiag tinambiag min musiti' mayan ragiti, kaa' saujor-saujor mino musiti' tumampos koson mangayou. Musiti' ilo lumaup galing ra sungoi intor ra ulun ru Israil koson mangindangan ra gino ngai' bansa' min, 15saboi magaau nilo tana' tampilon ra kalasaan ru Sungoi Jordan, ondo' pataakon ru Tuhan i Aki Kapuuno' min risilo. Makapangani' Io ra kamiaan ra ngaangai' bansa' ru Israil, bagu no makasaguli' kau am lumayun ra tana' min galama', tana' tampilon ra sirangon ru Sungoi Jordan ondo' pataakon ri Musa, ulipon ru Tuhan no ramuyun.”
16Indagu ilo ri Josua, “Baalon mai ngaangai' ondo' rinagu muno, am mongoi ra ati ayuk panusuban muno ramon mongoi. 17Gumagaya' akai rirun koson ra akai magail giminagaya' ri Musa. Gama' ru Tuhan i Aki Kapuuno' muno mabaya' rirun koson Io nabaya' ri Musa! 18Moonong ulun ondo' marara' kumuku' ra kuasa' muno kapoam kalo gumagaya' rondo' ra susuban muno ukumin ra matoi. Musiti' kou mangintopot am baani!”
Currently Selected:
JOSUA 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.