JUANIS 4
4
I Jisus am ruandu' Samaria
1Nakaining noyo ulun-ulun ru Parisi ra masuang poyo ulun minaya' am pakiriu' ri Jisus ka i Juanis. ( 2Sotopot no sala' ka i Jisus galama' ondo' nampariu' ra ulun, kaa' maamaya' Nano ayuk.) 3Kapandayi' ri Jisus ginio, iruani' No boo Judia am saguli' ra libung ru Galilia. 4Mangkiralan mongoi ra giu', musiti' Io mansail ra libung ru Samaria.
5 Pakasuku' Io ra pekan Sikar, giu' ra libung ru Samaria, mamaar ra sampila' tana' ondo' pinataakan ri Jakub ra anak nali i Jusup ra galing i. 6-8Giu' i makatulubong ondo' binaal ri Jakub ra galing i. Paat ra tanga' ru orou, panturung i Jisus ra kiing ru tulubong i sabap ra naagui Io ra pangkiralanan. Maamaya' Nano minongoi pambali ra akanon giu' ra pekan. Ratong boo sangulun ruandu' Samaria mongoi sagou am indagu i Jisus riso, “Anii' Aku ra inumon.”
9 Kaa' taamo' Io ru ruandu' no, “Okou ulun ru Jaudi am aku ulun ru Samaria; kua pakitaak Kou raki' ra inumon?” (Ulun ru Jaudi kalo lumatok ra ulun ru Samaria.)
10Taam i Jisus, “Amon ru nakapandai kou ra taak ri Aki Kapuuno' am osoi makitaak rirun ra inumon, maaru' makitaak kou po Riso am mangani' Io rirun ra timug ondo' mampakaayag.”
11Indagu ruandu' i Riso, “Tuan, tulubong ti malandom kaga' am kolondo' susuuk Muno. Ati kaalapan Muno ra timug mampakaayag no? 12Kinamatuaan maili, i Jakub, nangani' ramon ra tulubong ti am io, anak am niayuk bibiag nano nanginum ra timug ragitio. Maatang Kou po kia intor ri Jakub?”
13Taam i Jisus, “Osoi ayuk manginum ra timug ragitio, paason poyo, 14kaa' osoi ayuk manginum ra timug ondo' taakin Kuno, ulun no kalo igondo' boo paason. Sabap ra timug ondo' taakin Kuno koson ra taur bubuluak ondo' mangani' ra kaayagan motopot am mantilayun.”
15Indagu ruandu' i, “Tuan, anii' aku ra timug no am kalo boo paason aku, am kalo pana boo mansagou aku ragiti.”
16Taam i Jisus, “Ongoyo' piawo' ralaki muno am saguli' ragiti.”
17“Kolondo' ralaki ku,” kon ru ruandu' i.
Indagu i Jisus, “Motopot ragu muni ra kolondo' ralaki muno. 18Sabap ra inlimo kono inuot am ungkuyon pasimpung muno raino ti sala' ka ralaki muno. Motopot rinagu muni.”
19Indagu ruandu' i, “Tuan, makapandai aku ra Okou ti sangulun nabi. 20Kinamatuaan maili siminamba ri Aki Kapuuno' ra bulur ti, kaa' akau ulun ru Jaudi mindagu ra giu' ra bandar Jirusalim ayuk intok sumamba ri Aki Kapuuno'.”
21Indagu i Jisus ra ruandu' no, “Pangintopot no Raki', ra sangarawan kalo boo sambaan i Ama' ra bulur ti kapoam giu' ra Jirusalim. 22Akau ulun ru Samaria sotopot no kalo makatutun osoi sambaan min; kaa' akai ulun ru Jaudi nakatutun osoi sambaan mai, sabap ra pamayagan matong intor ra bansa' ru Jaudi. 23Raino ti nasuku' noyo paat no, mansail ra indangan ru Ambiluo ri Aki Kapuuno' ulun sumamba ri Ama', ioginio i Aki Kapuuno' ondo' motopot, sabap raginio noyo kasagaan ri Ama'. 24I Aki Kapuuno' no Ambiluo am ra indangan ayuk ru Ambiluo ri Aki Kapuuno' no ulun makasamba ri Aki Kapuuno' ondo' motopot.”
25Indagu ruandu' i ri Jisus, “Napandayan ku noyo matong Mamamayag ondo' sinusub ri Aki Kapuuno', ondo' niayuk sabiton ri Kristus. Paat ra Io matong, mambala' Io ritakau ra ngaangai' no.”
26Taam i Jisus, “Aku no kon muni, ondo' makimansunur rirun ti.”
27Paat ragili maamaya' ri Jisus siminaguli'. Nangimuag ilo nakakito ri Jisus nakimansunur ra sangulun ruandu'. Kaa' kolondo' sangulun pana intor risilo nangkuot ra ruandu' i ra, “Atan kia kasaga' muno?” kapoam nangkuot ri Jisus ra, “Kua pakimansunur Kou riso?”
28Kopongo ragili, tatango' ru ruandu' i rarapu' nali am saguli' ra pekan pambala' ra ulun ru giu' i, kono, 29“Ibok, ongoi takau ilai' sangulun ungkuyon ondo' nambala' raki' ra ngaangai' ondo' binaal kuli. Io no kinua' Mamamayag ondo' sinusub ri Aki Kapuuno' i?” 30Ginio ra ingkual ulun-ulun intor ra pekan minongoi tuum ri Jisus.
31Liliwa' ragili kimaiti' Io ru maamaya' Nano, “Mangingila', pangakan!”
32Kaa' taam i Jisus, “Makaakanon Aku ondo' kalo natutunan min.”
33Ginio boo ra maamaya' Nano pasakuot ra rondo' am bokon, “Mokoondo' kinua' nagibit Riso ra akanon?”
34Indagu i Jisus, “Akanon Kuno gumagaya' ra kasagaan ru Io ondo' nanusub Raki' am momongo ra kandoi ondo' pinataak Nano Raki'. 35Kon ru ulun, ‘Apat poyo ngambulan am mangkumos noyo.’ Kaa' pulolowo' min noyo umo ra nangalia' no, sama' noyo kumoson. 36Raino ulun mangkumos no nokoowot ra ampos am ampos raginio magibit ra kaayagan motopot am mantilayun. Ginio ra ulun ondo' manias am ondo' mangkumos no mabaya' boo maansukan. 37Motopot ragu ru ulun, ‘Bokon no manias, kaa' bokon no mangkumos.’ 38Manusub Aku ramuyun mangkumos giu' ra umo ondo' kalo tiniasan min; ulun ra bokon nangandoi am akau mangumung ra ampos ru kandoi nilo.”
39Masuang ulun ru Samaria intor ra pekan raginio nangintopot ri Jisus, sabap ra bala' ru ruandu' i, kono, “Nambala' Io raki' ra ngaangai' ondo' binaal kuli.” 40Pakatuum ayuk ulun-ulun ru Samaria ri Jisus, kimaiti' nilo Io mayan risilo. I Jisus pana naruaan boo ra giu' i.
41Siminuang poyo ulun nangintopot ri Jisus sabap ra pangilaan Nano. 42Indagu ilo ra ruandu' i, “Raino mangintopot akai, kaa' sala' ka sabap ra bala' muli ayuk, kaa' akai galama' noyo nangkirongog Riso. Am mangintopot akai ra Io no totopot Mamamayag ra ulun ru tana' ti.”
Namabas i Jisus ra anak ru sangulun pagawai istana
43Kopongo naruaan giu' ra pamagunan Sikar, ongoi boo i Jisus ra libung ru Galilia, 44 kabalu' pana nakaindagu Io, “Sangulun nabi kalo urumaton ra intok nano galama'.” 45 Kaa' pakasuku' Io ra Galilia, inuma' Io ru namagun ra giu' i, sabap ra ilo pana minaya' ra Pangiantakan ra Paska ra Jirusalim am nakakito niayuk ra ngaangai' ondo' binaal ri Jisus i.
46 Saguli' boo i Jisus ra pamagunan Kana, libung ru Galilia, intok nampasaukan Nano ra wain intor ra timug. Giu' ra pekan Kapirnaum, mokoondo' niayuk sangulun pagawai istana ondo' anak nano marualan. 47Pakaining io ra minongoi i Jisus ra libung ru Galilia intor ra Judia, ongoi io uma' ri Jisus am pangkimait Riso mongoi ra Kapirnaum mamabas ra anak nano ondo' mamaar noyo matoi. 48Kaa' indagu i Jisus riso, “Kalo mangintopot kau amon ru kalo makakito kau ra tatandu' am kaimuagan.” 49Taam ru pagawai i, “Tuan, ibok no ra kalo poyo matoi anak kuno.”
50Indagu i Jisus riso, “Uli' no, napali' noyo anak muno.”
Nangintopot ulun i ra rinagu ri Jisus ni am uli' io boo. 51Tatanga' io nangkiralan muli', inuma' io ru ulipon nano ondo' nagibit riso ra tanou, “Napali' noyo anak muno!”
52Pangkuot io, “Jam kakula' anak kuno napali'?” Taam ilo, “Jam kasaa' tanga' ru orou ra mai' i nairu' salom nali.” 53Kakara' no jam ragili niayuk inindaguan ri Jisus riso ra, “Napali' noyo anak muno.” Nangintopot boo ilo sambaloi ri Jisus.
54Ginio noyo kaimuagan karuo ondo' binaal ri Jisus giu' ra libung ru Galilia ra Io minuli' intor ra Judia.
Currently Selected:
JUANIS 4: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.