JUANIS 20
20
Lobong ra kolondo' suang
(Mat. 28:1-8; Mrk. 16:1-8; Luk. 24:1-12)
1Io maar matawang ra orou minggu', ongoi i Maria Magdalina ra kalabangan i am kakito no batu pinaangob linuir boo intor ra luang ru lobong i. 2Ginio ra nagisimbul io mongoi ri Simon Pitrus am maamaya' ondo' tagamin ri Jisus am pambala' risilo, “Inalap boo Tuhan i intor ra lobong, am kalo nakapandai akai ati nampabantaan Riso.”
3Ginio ra i Pitrus nabaya' ra maamaya' ra bokon i narayus ongoi ra lobong i. 4Ilo karuruo nasimbul, kaa' naribok maamaya' ra bokon i intor ri Pitrus am nakasigulu io pakasuku' ra lobong i. 5Kuung io ayuk pampalilig ra lobong i am kakito no konoon mapulak paribanta' ra giu' i, kaa' kalo siminubol io. 6I Simon Pitrus pana nakasuku' am rayuso' no subolo' lobong i. Ilai' no konoon mapulak i paribanta' ayuk ra giu' i. 7Kaa' konoon pinabangkos ra ulu ri Jisus i nakasuai am napurun. 8Maamaya' ra bokon ondo' nakasigulu i siminubol niayuk ra lobong. Io pana nakakito am nangintopot boo. (9Sabap ra lakat poyo kalo nakarati' ilo ra ondo' tinulisan ra Buuk Kitab ra Io musiti' maayag saguli'.) 10Uli' boo karuruo maamaya' i.
Minintalang i Jisus ri Maria Magdalina
(Mat. 28:9-10; Mrk. 16:9-11)
11Minigor i Maria mamaar ra lobong i am nantangi'. Liliwa' nantangi', kuung io pampalilig ra lobong i. 12Ilai' no ruo ngaulun malaikat nambayang ra mapulak, nanturung ra nampabantaan ra baangkai ri Jisus i, rondo' tampilon ra ulu am rondo' tampilon ra tupakon. 13Pangkuot malaikat-malaikat no riso, “Kua pantangi' kou?”
Taam io, “Inalap boo baangkai ru Tuhan kuli, am kalo nakapandai aku ati nampabantaan Riso.”
14Karagu no ginio, pangkaili io am kakito no i Jisus minigor ra giu' i. Kaa' kalo nakaulig io ra Io noyo i Jisus. 15Pangkuot i Jisus riso, “Kua pantangi' kou? Osoi uyumon muno?”
Indos ri Maria Io ti magagalung ra taman am indagu io Riso, “Tuan, amon ru Okou napabanding Riso, balai' aku ati nampabantaan muli Riso, am moongoi ku boo kaalap.”
16Indagu i Jisus boo riso, “Maria!”
Ponontong i Maria ri Jisus am indagu, “Rabuni!” (Arati' no “Mangingila'”).
17Kaa' indagu i Jisus riso, “Pai' Aku guuto'! Sabap ra kalo poyo nokoongoi Aku ri Ama'. Kaa' ongoi no ra maamaya' Kuno am balai' ilo ra raino sumaguli' Aku ri Ama' Kuno am i Ama' min, ioginio i Aki Kapuuno' Kuno am i Aki Kapuuno' min.”
18Ginio ra ongoi balai' ri Maria maamaya' Nano ra nakakito io no ra Tuhan am atan rinagu Nali riso.
Minintalang i Jisus ra maamaya' Nano
(Mat. 28:16-20; Mrk. 16:14-18; Luk. 24:36-49)
19Orou minggu' ragili niayuk ra io palunggai', maamaya'-maamaya' ri Jisus timinimung ra rondo' baloi am nagaput ilo, sabap ra nangalaa' ilo ra tingganai ru ulun ru Jaudi. Pulusat boo ri Jisus, minigor ra tatanga' nilai am indagu, “Kaansayan ramuyun.” 20Karagu No ginio, patalango' No kalindu' am tiagang Nano risilo. Naansukan ilo kaga' nagilong ra Tuhan. 21Indagu poyo i Jisus risilo, “Kaansayan ramuyun. Koson ri Ama' nanusub Raki', Aku pana manusub ramuyun.” 22Sampuyo' No boo ilo am indagu, “Apuo' noyo Ambiluo ri Aki Kapuuno'. 23 Amon ru mangampun kau ra tula ru ulun, i Aki Kapuuno' pana mangampun ra ulun no. Kaa' amon ru kalo mangampun kau ra tula ru ulun, i Aki Kapuuno' pana kalo mangampun ru ulun no.”
I Jisus am i Tomas
24Sangulun intor ra mopor am ruo ngaulun maamaya' ri Jisus, i Tomas (sabiton niayuk “I Nagapir”), kalo nababaya' ra maamaya' ra bokon paat ri Jisus minintalang. 25Ginio ra pambala' ilo ri Tomas, “Nakakito akai no ra Tuhan.”
Kaa' taam i Tomas, “Kalo mangintopot aku amon ru kalo makito ku babaya' ru paku' ra kalindu' Nali am niayuk amon ru kalo makama' ku pilat ru kalindu' am tiagang Nali.”
26Saminggu' boo ragili, maamaya' ri Jisus timinimung poyo ra baloi i, am soroi niayuk i Tomas ra giu' i. Ngaangai' ru kulobon piniot ra kunsi', kaa' pulusat ri Jisus, minigor ra tatanga' nilai am indagu, “Kaansayan ramuyun.” 27Indagu Io boo ri Tomas, “Ilai' noyo kalindu' Kutu am kamaa'! Pakamaa' poyo kalindu' muno ra tiagang Kutu. Sala' ka pagantangan, kaa' pangintopot ayuk!”
28Indagu i Tomas ri Jisus, “Okou no Tuhan kuno am i Aki Kapuuno' kuno.”
29Indagu i Jisus riso, “Mangintopot kou sabap ra nakakito kou Raki'. Kaa' pakaansuk noyo ilo ondo' mangintopot kabalu' pana kalo igondo' pakakito.”
Arati' ru Tanou Moonsoi ti tinulisan
30Masuang poyo kaimuagan ondo' binaal ri Jisus ra saang ru maamaya' Nano kalo tinulisan ra kitab ti. 31Kaa' ngaangai' ti tinulisan noyo, maa' raginio mangintopot kau ri Jisus noyo Mamamayag ondo' sinusub ri Aki Kapuuno' i, ioginio Anak ri Aki Kapuuno'. Sabap ra pangintapatan mino Riso, mokoowot kau ra kaayagan motopot.
Currently Selected:
JUANIS 20: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.