LUKAS 24
TMT
24
I Jisus naayag saguli'
(Mat. 28:1-10; Mrk. 16:1-8; Jua. 20:1-10)
1Ginio ra nokorondom ra orou minggu' ongoi ruandu'-ruandu' ra kalabangan i am pagibit ra tatapis maamis owou ondo' pinongo nilai. 2Pakasuku' ilo, kakito nilo ra naluir boo batu pinaangob ra subalan ru kalabangan i. 3Umpos ilo ra ralalom i, kaa' kolondo' natuum nilo ra baangkai ru Tuhan Jisus. 4Liliwa' ilo minigor ra giu' i am nangimuag mampaguang raginio, pulusat ru ruo ngaulun ungkuyon nambayang ra mapulak manguliat mininggaar risilo. 5Sabap ra nangalaa' toojo kubu ruandu'-ruandu' ra tana'. Kaa' indagu boo ruo ngaulun i risilo, konilo, “Kua guat uyumo' min ulun ondo' maayag ra intok ru ulun minatoi? 6#Mat. 16:21; 17:22-23; 20:18-19; Mrk. 8:31; 9:31; 10:33-34; Luk. 9:22; 18:31-33Kalio Io ragiti,” konilo, “Binayag Io saguli'! Kalo kia nakara' min atan ondo' rinagu Nali paat ra Io soroi ramuyun giu' ra Galilia. 7Kon Nano, ‘Anak ru Ulun pataakon ra kuasa' ru ulun makatula, salipon am malupus kataluan maayag Io saguli'.’ ”
8Kakara' boo ru ruandu'-ruandu' no ondo' rinagu ri Jisus i. 9Ginio ra uli' ilo intor ra kalabangan i am pambala' ilo ra ngaangai' ondo' nasauk i ra mopor am rondo' ngaulun maamaya' ri Jisus am ngaangai' ulun ra bokon i. 10Ruandu'-ruandu' raginio ondo' nantunung ra ngaangai' ti ra rasul-rasul no, iono i Maria Magdalina, i Juana am i Maria ina' ri Jakub, am poyo ruandu' ra bokon ondo' minaya' risilo. 11Kaa' pangkaraan ru rasul-rasul no raragu ayuk ginio ru ruandu'-ruandu' no am kalo nangintopot ilo. 12Kaa' ingkakat i Pitrus am nagindibok minongoi ra kalabangan i. Lilig io am konoon pinangulumput i ayuk nakito no. Uli' io boo ra baloi am nampaguang io toojo ra atan ondo' nasauk i.#Kukula' naskhah kolondo' ra ragu 12.
Pangkiralanan mongoi ra Imaus
(Mrk. 16:12-13)
13Orou ragili niayuk, mokoondo' ruo ngaulun maamaya' ri Jisus nangkiralan mongoi ra pamagunan Imaus. Intok ti olo'-olo' mopor am rondo' kilomito galur no intor ra Jirusalim. 14Liliwa' nangkiralan, nansusunur ilo intor ra ngaangai' ondo' nasauk ri Jisus ra raitii' ni. 15Tatanga' ilo mansunur, ratong i Jisus galama' mininggaar am sumbaya' risilo minugar. 16Nakito nilo i Jisus, kaa' nakulau boo panantangan nilai saboi kalo nakaulig ilo Riso. 17Indagu i Jisus risilo, “Atan sunuron min?”
Uog am pongkoror ilo ra bulos patilaut. 18Sangulun i makainggalan ri Kliopas nangkuot ri Jisus, “Okou rorondo' ayuk kia minongoi ra Jirusalim am kalo naala' ondo' nasauk ra giu' i ra babagu ti!”
19Pangkuot i Jisus, “Atan guat nasauk i?”
Taam ilo, “Ondo' nasauk ri Jisus ulun ru Nasarit i. Io tupo sangulun nabi. Ngaangai' ragu am baalon Nali kinuasa' ri Aki Kapuuno' am ngaangai' mamagun nangiou Riso. 20Kaa' tingganai imam Jaudi am tingganai ru bansa' takau nampataak Riso ra pantula' Nano saboi inukuman Io ra potoyon am sinalip nilo io! 21Nalansan akai ragili ra Io noyo mampalabus ritakau, bansa' ru Israil! Kaa' atan poyo, nataluan noyo raginio nasauk. 22Mokoondo' niayuk kukula' ngaulun rangan mai ra ruandu' nampaimuag ramon. Nokorondom ilo minongoi ra lobong Nali, 23kaa' kalio natuum nilo baangkai Nali. Ilo pana naruli' am pambala' ra nakakito ilo ra malaikat-malaikat ru Tuhan ondo' nambala' ra naayag Io. 24Mokoondo' kukula' ngaulun rangan mai poyo ra bokon minongoi ra kalabangan i am ilai' nilo motopot ragu ru ruandu'-ruandu' no; kaa' kalio nakito nilo Io ra giu' i.”
25Indagu boo i Jisus risilo, “Sasambungon kau toojo! Mumpara' boo buoi min mangintopot ra ngaangai' rinagu ru nabi-nabi! 26Sala' ka kia Mamamayag ondo' sinusub ri Aki Kapuuno' i maaru' maimbolo' galing ra Io kalo poyo katulayon?” 27Pambala' boo i Jisus risilo ra atan ondo' tinulisan intor Riso ralalom ru ngaangai' ru Buuk Kitab, tumalimpuun intor ra tayar ru kitab ri Musa am niayuk ngaangai' nabi.
28Maar ilo no sumuku' ra pamagunan angayan nilai, ugar ayuk i Jisus koson boo ilain manunggul Io ra pangkiralanan Nali. 29Kaa' ingai' nilo Io, konilo, “Pombolong ayuk ragiti sabap ra mamai' noyo nai am lumondom galing noyo.” Ginio ra apit i Jisus am umpos ra intok nilai. 30Panturung Io gulung risilo, alapo' No ruti' i am paringkuanang Io ri Aki Kapuuno', am pipilango' No, am tatayaro' No risilo. 31Pakaulig ilo boo Riso, kaa' liot kon no ayuk ra pagilangan nilai. 32Pagigindagu ilo, “Ka kia mabunduk guang to ra Io minindagu rito ra pangkiralanan tani, am nambala' rito ra tinulisan ra Buuk Kitab?”
33Ingkakat am saguli' ilo ra Jirusalim. Giu' i natuum nilo mopor am rondo' ngaulun maamaya' ri Jisus ondo' natitimung mabaya' ra rangan nilai. 34Indagu ilo ra karuruo ngaulun i, “Totopot naayag noyo saguli' Tuhan i! I Simon nakakito Riso!”
35Tunungo' boo ru ruo ngaulun i atan ondo' nasauk ralalom pangkiralanan nilai am ati kulaan ilo nakaulig ra Tuhan ra Io namilang ra ruti' i.
Minintalang i Jisus ra maamaya' Nano
(Mat. 28:16-20; Mrk. 16:14-18; Jua. 20:19-23; Rin. 1:6-8)
36Liliwa' ruo ngaulun i lakat ayuk poyo mantunung, pulusat ri Jisus minigor ra tatanga' nilai am indagu, “Kaansayan ramuyun!”#Kukula' naskhah ra bokon kolondo' ra ragu: am indagu, “Kaansayan ramuyun!”
37Naliangan am nalaa' ilo kaga', sabap ra guang nilai nangambiluo io. 38Kaa' pangkuot Io risilo, “Kua guat kalaa' am kaimamang kau? 39Ilai' min palar ru kalindu' am kalayam Kutu, am ilai' min Aku galama' gitio! Kombongo' min Aku am ilai', sabap ra ambiluo kolondo' kual am bungul, kaa' Aku mokoondo'.”
40Karagu ri Jisus kon raginio am patalango' No boo palar ru kalindu' am kalayam Nano risilo.#Kukula' naskhah ra bokon kolondo' ra ragu 40. 41Kalo poyo nangintopot ilo sabap ra naansukan ilo toojo am nangimuag! Pangkuot boo i Jisus risilo, “Mokoondo' kau kia ra akanon ragiti?” 42Anii' nilo Io ra saputul papait tinunuan. 43Alapo' ri Jisus papait i am akano' No ra saang nilai.
44Kopongo ragili indagu Io risilo, “Gitio noyo rinagu Kuli ramuyun paat ra Aku lakat ayuk poyo soroi ramuyun i; ra moonong baal ondo' tinulisan intor Raki' ralalom Ukum ri Musa, kitab ru Nabi-Nabi am kitab Mazmur, gitio musiti' ukopon.”
45Kopongo ragili, nampaintutun Io risilo ra atan kon ru Buuk Kitab, 46indagu Io, “Natulisan noyo ra Buuk Kitab ra Mamamayag ondo' sinusub ri Aki Kapuuno' i musiti' maimbolo' galing am bagu maayag saguli' malupus kataluan. 47Am poyo, Tanou Moonsoi ti musiti' potonowon ra ngaangai' bansa' ru tana' ti, tumalimpuun intor ra Jirusalim. Maa' raginio ralalom inggalan Kuno tumalikur ilo intor ra tula nilono bagu ampunon ilo ri Aki Kapuuno'. 48Akau noyo sasi' ondo' mampaintutun risilo ra ngaangai' ti. 49#Rin. 1:4Aku galama' mangator ramuyun ondo' binantu' ri Ama' i. Kaa' musiti' kau maginaa galing ra bandar ragitio saboi mokoowot kau ra kuasa' ti intor ri Aki Kapuuno', bagu mongoi kau pampatanou.”
I Jisus kinayang ra suruga'
(Mrk. 16:19-20; Rin. 1:9-11)
50 # Rin. 1:9-11 Kopongo ragili ibito' ilo ri Jisus mongoi ra lisar ru bandar mamaar sumaboi ra pamagunan Bitania. Pakasuku' ra giu' i, kakato' No kalindu' Nali am pambarakat risilo. 51Liliwa' nambarakat Io risilo, kakayang Io ra suruga'#Kukula' naskhah ra bokon kolondo' ra ragu: kakayang Io ra suruga'. mangiruan risilo. 52Siminamba ilo Riso am siminaguli' boo ra Jirusalim nabaya' ra kaansukan nilo toojo. 53Ginio ra masalok ilo mongoi ra Baloi Tuhan koson mongompor ri Aki Kapuuno'.

Hakcipta © Bible Society of Malaysia 2013 Copyright © Bible Society of Malaysia 2013

Learn More About Tanou Moonsoi Timugon