JUANIS 19
19
1Palapasi' boo ri Pilatus i Jisus. 2Saujor-saujor pana nambaal ra karaun intor ra bulisang ra makaruui am pasampako' ra ulu Nali. Pinambayang nilo poyo Io ra sukub ra matanggilung. 3Nampapalit ilo boo mongoi inggaar Riso am indagu, “Tabi', raja' ru ulun ru Jaudi.” Mopongo ragili lapison nilo pingas Nali.
4Igondo' poyo miningkual i Pilatus am indagu ra ulun masuang no, “Ilai'! Paingkualon ku Io ramuyun, maa' raginio makapandai kau ra kolondo' rondo' pana sala natuum kuno ra ulun ti.” 5Ingkual boo i Jisus, pinangkaraun ra bulisang makaruui am pinambayang ra sukub matanggilung. Indagu i Pilatus risilo, “Ilai' noyo ulun ti!”
6Kakito Io ayuk ru tingganai imam Jaudi am pulis-pulis ru Baloi Tuhan no, golok ilo, “Salipo' Io, salipo' Io!”
Indagu i Pilatus risilo, “Alapo' min noyo Io am akau galama' ayuk manalip Riso, sabap ra kalo natuum ku rondo' pana sala nati.”
7Taam ulun-ulun ru Jaudi no, “Sumugut ra ukum mai, Io ti musiti' ukumin ra potoyon sabap ra rokoon Nano ra Anak Io ri Aki Kapuuno'.”
8Korongog ri Pilatus ragu nilai ni, nalaa' io boo kaga'. 9Subol io boo saguli' ra istana i am pangkuot ri Jisus, “Ati intor Mu?”
Kaa' nongkoror ayuk i Jisus. 10Kon poyo ri Pilatus, “Kalo kia tumaam Kou raki'? Karaa', makakuasa' aku mampalabus kapoam manalip Rirun.”
11Taam i Jisus, “Kolondo' kuasa' muno Raki' amon ru kalo aniin kou ri Aki Kapuuno'. Ginio boo ra ulun nampataak Raki' i rirun, maayo poyo tula nano ka okou.”
12Korongog ri Pilatus ragu raginii, gumogot io mampalabus ri Jisus. Kaa' golok ulun masuang no, “Amon ru palabuson mu Io, sala' ka rangan kou ru Kaisar. Osoi ayuk migiangku ra raja', manggal io niayuk ri Kaisar.”
13Korongog ri Pilatus ragu raginio, ibito' no i Jisus miningkual am panturung io giu' ra intok pamisaraan ininggalanan ra “Sulig Batu”. (Ralalom ragu ru Ibrani, inggalan no “Gabata”.) 14Paat ragili maar noyo tanga' ru orou ra orou Tampasan ra Pangiantakan ra Paska noyo. Indagu i Pilatus ra ulun masuang no, “Ilai', gitio noyo raja' min.”
15Ginio ra golok ilo, “Potoyo' Io! Potoyo' Io! Salipo' Io!”
Pangkuot poyo i Pilatus, “Salipon ku kia raja' min ti?”
Taam tingganai imam Jaudi no, “Rorondo' ayuk raja' mai, i Kaisar.”
16Pupus i, pataaki' boo ri Pilatus i Jisus risilo koson salipon.
I Jisus sinalip
(Mat. 27:32-44; Mrk. 15:21-32; Luk. 23:26-43)
Ginio ra ibito' ru saujor-saujor no i Jisus am ugar. 17Ingkual Io boo nansaan ra salip Nano mongoi ra intok ondo' sabiton ra “Intok kuapak”. (Ralalom ragu ru Ibrani “Golgota”.) 18Giu' i noyo nanalipan nilo Riso. Mokoondo' ruo ngaulun poyo sinalip nabaya' Riso; sangulun tampilon ra kait am sangulun tampilon ra pamiris, am pinaayan-tanga' Io risilo. 19Nanusub i Pilatus mamaku' ra rondo' papan rasawat ru salip Nano, ondo' tinulisan ra; “I Jisus, ulun ru Nasarit, raja' ru ulun ru Jaudi”. 20Masuang ulun ru Jaudi nakabasa' ra tinulisan i sabap ra intok napasalipan Riso i kalo maalur intor ra bandar. Pambalaan ti tinulisan ra talu ragu; ragu ru Ibrani, Latin am Junani. 21Ginio ra indagu tingganai imam Jaudi no ri Pilatus, “Pai' tulisi' ra ‘Raja' ru ulun ru Jaudi’, kaa' tulisi' ra ‘Kon ru ulun ti, Aku no Raja' ru Ulun ru Jaudi.’ ”
22Kaa' taam i Pilatus, “Ondo' tinulisan ku noyo, malayun ayuk.”
23Kopongo Io sinalip ru saujor-saujor no, alapo' nilo bayang Nali am tinayar nilo ra apat ngantayaran; santayar sangulun. Sukub Nali niayuk inalap nilo, kaa' mapila' toojo konoon i am kolondo' pipikit. 24 Pagindagu ilo ra sangulun am bokon, “Pai' takau rilako' sukub ti. Moonsoi magugundi' takau koson mangaru' osoi makaalap.” Gitio masauk koson nasugut ondo' tinulisan ra Buuk Kitab;
“Bayang Kuno tatayaron nilo,
am magugundi' ilo mangalap ra sukub Kuno.”
Ginio totopot binaal ru saujor-saujor no koson raginio.
25Mamaar ra salip ri Jisus i minigor ina' Nano, pinongkotob ru ina' Nano, i Maria andu' ri Klopas am niayuk i Maria Magdalina. 26Nakito ri Jisus ina' Nano nabaya' ra maamaya' tagamin Nano minigor ra giu' i. Ginio ra indagu Io ra ina' Nano, “Ina', pinakaanak mu ayuk io.”
27Indagu Io boo ra maamaya' no, “Rangan, pinakaina' mu ayuk io.” Intor ragili, ibito' ru maamaya' no ina' ri Jisus minayan ra baloi nano galama'.
Pinatayan ri Jisus
(Mat. 27:45-56; Mrk. 15:33-41; Luk. 23:44-49)
28 Napandayan ri Jisus ra raino ngaangai' nopongo noyo, am maa' raginio masugut ondo' tinulisan ra Buuk Kitab, indagu Io, “Pinaason Aku.”
29Giu' i mokoondo' mangkuk makasuang ra wain mataris. Pososopo' nilo busak ru karang ondo' malami' ra wain i, am pasusuko' ra rondo' tataun Isop am patumaa' ra kabang ri Jisus. 30Kainum ri Jisus wain i, indagu Io, “Nopongo noyo!”
Kuku' Io boo am kairui' Io ra painawo.
I Jisus tinura'
31Orou ragili orou kalimo, orou Tampasan ra Pangiantakan ra Paska. Tingganai ru ulun ru Jaudi no marara' mompoloso ra baangkai nilai ra salip paat ra orou Sabat, sabap ra minggu' ragili orou Sabat i maatang kaga'. Ginio ra nakitaak ilo ri Pilatus ra kalayam ru ulun-ulun sinalip no pandakon, am baangkai nilai patuunon intor ra salip. 32Ginio ra ongoyo' galing pandako' ru saujor-saujor no kalayam ru ruo ngaulun sinalip nabaya' ri Jisus i. 33Kaa' pakasuku' ilo Riso, ilai' nilo minatoi Io noyo. Ginio ra kalo pinandak nilo kalayam Nano. 34Kaa' turaa' ru sangulun saujor tiagang Nano; am paat ragili niayuk antis boo raraa' am timug. (35Io ondo' nakakito ra nasauk ti noyo mampatanou ragitio koson akau pana mangintopot. Kaintutunan nati motopot am nakapandai io ra rinagu nati motopot.) 36 Baal ragitio pana nasauk koson nasugut ondo' tinulisan ra Buuk Kitab, “Kolondo' rondo' pana bungul Nano pandakon.” 37 Mokoondo' poyo tinulisan ra Buuk Kitab, “Ulun-ulun monontong Riso ondo' tinura' nilai.”
Nampalabangan ri Jisus
(Mat. 27:57-61; Mrk. 15:42-47; Luk. 23:50-56)
38Kopongo ragili, i Jusup, intor ra bandar Arimatia, nakitaak ra baangkai ri Jisus intor ri Pilatus. (I Jusup sangulun maamaya' ri Jisus, kaa' ginio kalo napandayan ru ulun sabap ra nalaa' io ra tingganai ru ulun ru Jaudi.) Iniou ri Pilatus kitaakon nali, am ongoyo' no boo alapo' baangkai i. 39 I Nikodimus pana minaya' ri Jusup, io no ondo' ragili igondo' minuma' ri Jisus paat ra iorondom. I Nikodimus ti nagibit ra apa' pampagamis ra owou ondo' pinaratok ra mur am gaharu, ondo' bagat ringai' ti talu ngoopor ngakilo. 40Alapo' nilo baangkai i, kulumputo' ra konoon mapulak ondo' moonsoi am anii' ra apa' pampagamis ra owou i sumugut ra kaulayan ru ulun ru Jaudi mompolobong. 41Intok nanalipan Riso i mokoondo' rondo' taman, am giu' i mokoondo' rondo' lobong ondo' kinali ra bulur batu, ondo' kalo poyo igondo' labangi'. 42Sabap ra kalabangan i mamaar, am orou Sabat pana maar noyo tumalimpuun, ginio ra pabantaa' nilo ayuk baangkai Nali ra giu' i.
Currently Selected:
JUANIS 19: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.