RINALATAN 21

Minongoi i Paulus ra Jirusalim

1Karagui' mai tingganai-tingganai ru ulun Kristian intor ra Ipisus ra tumoojo, narayus akai nasundoi ra pulu' Kos. Iosuabon nakasuku' akai ra pulu' Rodos. Intor ra giu' i pasundoi akai poyo ra Patara. 2Giu' ra Patara natuum mai rondo' kapal mongoi ra Pinisia am ginio sinakayan mai. 3Ugar akai saboi naimpal mai pulu' Siprus, kaa' narayus akai ayuk ra Siria. Asak akai boo ra Tirus sabap ra kapal ondo' sinakayan maili nampatuun ra kuliamos ra giu' i. 4Ongoi akai boo tuum ra ulun Kristian am minayan akai risilo buoi saminggu'. Ralalom kuasa' ru Ambiluo ri Aki Kapuuno', bilini' nilo i Paulus koson kalo mongoi ra Jirusalim. 5Kaa' nasuku' noyo orou ugaran mai, ugar akai ayuk manunggul ra pangkiralanan mai ti. Ngaangai' ilo nabaya' ra andu' am anak nilai pana nangator ramon polos ra liwar ru bandar. Giu' ra nagas ru raat i, igulatur akai ngaangai' am pakiasi'. 6Pakapintor ilo ayuk minindagu ra tumoojo, sakoi akai no ra kapal am ilo pana minuli'.

7Narayus akai intor ra Tirus ongoi ra Ptolimais. Minongoi akai tuum ra ulun Kristian ra giu' i, am ayan risilo buoi songorou. 8#Rin. 6:5; 8:5Iosuabon, ugar akai po am nakasuku' ra Kaisaria. Giu' i, minayan akai ra baloi ru sangulun mampasaboi ra Tanou Moonsoi, makainggalan ri Pilipus. Io ti sangulun intor ra tulu' ngaulun ondo' pinili' giu' ra Jirusalim i. 9Io mokoondo' apat ngaulun anak ralaa ondo' mapandai toojo mampatanou ra bala' intor ri Aki Kapuuno'.#mampatanou ra bala' intor ri Aki Kapuuno'; Harfiah: nanala'. 10#Rin. 11:28Kukula' ngoorou noyo akai ra giu' i, ratong boo sangulun nabi makainggalan ri Agabus intor ra Judia. 11Inggaar io ramon am alapo' no abot ri Paulus. Pobongkoso' no kalindu' am kalayam nali galama' ra abot i am indagu io, “Koson ragitio ragu ru Ambiluo ri Aki Kapuuno': ‘Ulun tatangan ra abot ragitio, bangkilon koson ragitio niayuk ru ulun ru Jaudi giu' ra Jirusalim. Am pataakon io poyo ra kuasa' ru ulun sala' ka Jaudi.’ ”

12Korongog mai ragu ri Agabus ni, akai am ngaangai' ulun Kristian ondo' minayan ra Kaisaria i nanginga' ri Paulus mongoi ra Jirusalim. 13Kaa' taam i Paulus, “Kua kia tangii' min aku koson ragitio saboi mangiluk boo toojo guang kutu? Nakatampos aku no ra bangkilon kia kapoam matoi pana giu' ra Jirusalim, sabap ri Tuhan Jisus.”

14Kaa' kalo noyo lair makapanginga' akai riso. Ginio ra indagu akai, kamai, “Gama' ru atan masauk riso sumugut kasagaan ru Tuhan.”

15Pakasail kukula' ngoorou akai minayan ra giu' i, tomposo' mai boo kuliamos maili am ongoi poyo ra Jirusalim. 16Mokoondo' kukula' ngaulun Kristian intor ra Kaisaria minaya' am nangator ramon ra baloi ri Manason,#nangator ramon ra baloi ri Manason; kapoam: nagibit ri Manason. sabap ra baloi nano inayanan mai. I Manason ti ulun ru Siprus ondo' lair noyo siminauk ra Kristian.

Minongoi i Paulus uma' ri Jakubus

17Pakasuku' akai ra Jirusalim, inuma' akai ru ulun Kristian ra giu' i am naansayan ilo toojo. 18Iosuabon, nababaya' ri Paulus, minongoi akai uma' ri Jakubus;#Jakubus; Iono pabukat ri Jisus Tuhan. Mokoondo' niayuk ngaangai' tingganai ru ulun Kristian soroi ra giu' i. 19Pakauma' ayuk risilo, tunungo' boo ri Paulus ngaangai' ondo' binaal ri Aki Kapuuno' ra ulun ondo' sala' ka Jaudi ralalom ru kandoi nano. 20Pakaining ilo ra ngaangai' ondo' rinagu ri Paulus i, nongompor ilo boo ri Aki Kapuuno'. Indagu ilo boo ri Paulus, “Paulus, pabukat mai! Mokoondo' kukula' ngaribu noyo ulun ru Jaudi nangintopot ri Jisus ragiti, am gumagaya' ilo toojo ra Ukum ri Musa. 21Kaa' nokorongog ilo ra okou kunu' mangila' ra ngaangai' ulun ru Jaudi ondo' mayan ra bansa' ru bokon i, maa' raginio kalo boo pana maya' ra Ukum ri Musa. Kamu poyo ra kalo pana sunatin anak nilono kapoam suguton kaulayan ru ulun ru Jaudi. 22Raino boo, ati kulaan? Maaru' nokorongog ilo noyo ra okou giti raino. 23#Un. 6:13-21Ginio poyo, moonsoi gagayaan mu bilin mai ti. Mokoondo' apat ngaulun ragiti ondo' nagibot ra Tuhan. 24Moonsoi ru maya' kou risilo mampaugar ra kaulayan pangimpasawan am mamalanja' kou risilo, am mabulutan ilo.#mabulutan: ilai' ra 18:18. Gitio noyo mampatutun ra ulun ra atan ondo' naining nilo intor rirun i kalo motopot. Sabap ra okou galama' pana gumagaya' ra Ukum ri Musa. 25#Rin. 15:29Kaa' koson ra ulun Kristian ondo' sala' ka Jaudi, nangator akai noyo risilo ra surat. Gili suang ru surat maili; kalo makaakan ilo ra akanon ondo' pinasulung ra sinungkalalaing, kapoam mangakan ra raraa' kapoam mangakan ra kual ru bibiag ondo' pinatoi sikako' am musiti' ilo minggalur niayuk intor ra baal pansasawaan.”

26Io suabon ragili, i Paulus nababaya' ra apat ngaulun i nampaugar ra kaulayan pangimpasawan. Subol ilo boo ra Baloi Tuhan am pambala' ra kula' poyo ngoorou am mopongo pangimpasawan, koson makapanimbalui ilo boo ra taak nilo sigagama'.

Rinakop i Paulus giu' ra Baloi Tuhan

27Paat ra tulu' ngoorou maar maampus, kukula' ngaulun ru Jaudi intor ra pagun Asia minongoi ra Baloi Tuhan ti am nakito nilo i Paulus ra giu' i. Ginio ra susuko' nilo ulun masuang am rokopo' nilo i Paulus. 28Golok ilo, “Pabukat kau ngaangai', ulun ru Israil! Makiindangan akai. Gitio noyo ulun ondo' mangila' ra ati ayuk intok ra ngaangai' ulun ra pangilaan ondo' manggal ra bansa' ru Israil, Ukum ri Musa am niayuk Baloi Tuhan ti. Mulu' poyo raino ti nagibit io piboo ra ulun ondo' sala' ka Jaudi sumubol ra Baloi Tuhan. Mampajamol io ra intok matulai ti.” (29#Rin. 20:4Minindagu ilo koson raginio sabap ra giu' ra bandar no nakakito ilo noyo i Tropimus, ulun ru Ipisus nabaya' ri Paulus. Indoson nilo ra io no ondo' inibit ri Paulus ra Baloi Tuhan.)

30Kumuliangi-angi ngaangai' ulun giu' ra bandar no am pasisimbul ilo ra Baloi Tuhan. Rokopo' nilo i Paulus am ralaato' paingkualo' intor ra Baloi Tuhan am angabi' boo kulobon i ra mataki'. 31Paat ra ulun-ulun nangkinam mamatoi ri Paulus no, tingganai maayo ru saujor Roma binalaan ra kumuliangi-angi ra titikop bandar Jirusalim. 32Pagindibok boo tingganai maayo saujor i nagibit ra kukula' ngaulun pagawai ru saujor am niayuk saujor am ongoi ra intok ru ulun masuang i. Pakakito ayuk ulun-ulun no ra tingganai maayo saujor nabaya' ra saujor nano, langgai' nilo boo mampalamba' ri Paulus. 33Inggaari' ru tingganai maayo ru saujor no i Paulus am rokopo' no io. Pabangkili' no i Paulus ra ruo rantai. Pangkuot io boo, “Osoi kia ulun ragitio am atan guat binaal nano?” 34Mokoondo' ulun giminolok koson ragitio am bokon poyo raginio. Posongonsol ilo ayuk saboi tingganai maayo ru saujor i kalo napandayan no atan kia sotopot no nasauk ti. Ginio boo ra paibiti' no boo i Paulus giu' ra kim ru saujor. 35Pakasuku' ayuk ra tukar, kayango' boo ru saujor i Paulus, sabap ra ulun masuang ondo' namparakop riso raitii' ni magagaau mamungkayut riso. 36Ilo ngaangai' siminunu' risilo liliwa' giminolok, “Potoyo' io!”

Nagisaung i Paulus

37Maar ilo makaumpos noyo ra kim, indagu i Paulus ra tingganai maayo ru saujor i, “Tuan, mabuli aku kia mindagu?”

Taam tingganai maayo ru saujor i, “Mapandai kou nai ra ragu Junani! 38Koson poyo raginio, okou sala' ka ulun ru Misir i ondo' gili nagibit ra ulun masuang kumuliangi-angi. Naningganai io ra apat ngaribu ngaulun malaat ondo' makakinandoi mangayou mongoi ra tana' kaagisan.”

39Taam i Paulus, “Aku ti ulun ru Jaudi, intor aku ra Tarsus, io no bandar maatang ra Kilikia. Polosoo' aku ayuk mindagu ra ulun-ulun no.”

40Nangiou io am i Paulus pana minigor ra tukar i am nangani' io ra ulun ra pulanu koson mongkoror. Pokopongkoror ilo, indagu boo i Paulus risilo ra ragu Ibrani.

Currently Selected:

RINALATAN 21: TMT

Highlight

Copy

Compare