RINALATAN 19

I Paulus giu' ra Ipisus

1Paat ri Apolos soroi ra Korintus, i Paulus nangkiralan mongoi ra intok nakaujok ra pagun ti am pupus i nakasuku' io ra Ipisus. Giu' i nakatuum io ra kukula' ngaulun ondo' nangintopot ri Jisus. 2Pangkuot io risilo, “Paat ra akau nangintopot ri Jisus, mokoondo' kia noowot min ra Ambiluo ri Aki Kapuuno'?”

Taam ilo, “Kalo igondo' naining mai koson ra mokoondo' Ambiluo ri Aki Kapuuno'.”

3Pangkuot poyo i Paulus, “Amon ru koson poyo raginio, pampariwan ra atan kia akau riniu'?”

Taam ilo, “Pampariwan ri Juanis Mampariu'.”

4 # Mat. 3:11; Mrk. 1:4, 7-8; Luk. 3:4, 16; Jua. 1:26-27 Indagu i Paulus, “I Juanis ti nampariu' noyo ra ulun koson mambala' ra timinalikur ilo intor ra tula. Kaa' nambala' io poyo ra ulun ru Israil ra ilo ti musiti' mangintopot ra Ulun ondo' tumauli riso, io no i Jisus.”

5Pokorongog ilo raginio, riwo' ilo boo ralalom inggalan ru Tuhan Jisus. 6Pabantaa' ri Paulus kalindu' nali risilo am kinuasa' ilo ru Ambiluo ri Aki Kapuuno'. Ginio ra minindagu ilo ra ragu imuagan am nampasaboi ra pambalaan intor ri Aki Kapuuno'. 7Suang nilai olo'-olo' mopor am ruo ngaulun.

8Talu ngambulan buoi ri Paulus nampatanou ra ulun-ulun giu' ra baloi sambayangan am kalo malaa' io. Nakimansunur io risilo koson mampaintopot risilo intor ra Pamarintaan ri Aki Kapuuno'. 9Kaa' mokoondo' intor risilo i mokotog guang am kalo nangintopot, am nagasab ilo poyo ra pamayagan ri Aki Kapuuno' ra saang ru ulun masuang. Ginio ra i Paulus pana nangiruan risilo am ibito' no ulun ondo' nangintopot noyo ri Jisus am moonong orou#moonong orou; Kukula' naskhah nakalair mamparuang: intor ra 11.00 susuab suku' ra 4.00 mamai'. nangila' io risilo giu' ra intok igigilaan ri Tiranus. 10Sabuoi ruo ngambilor io nambaal raginio am ngaangai' ulun ra pagun ru Asia, io no ulun ru Jaudi am niayuk ulun sala' ka Jaudi, nokorongog niayuk ra bala' intor ra Tuhan.

Anak-anak ri Skiwa

11Ralalom baalon ri Paulus i Aki Kapuuno' nambaal ra kukula' kaimuagan ondo' mapakabunduk toojo ra guang ru ulun masuang. 12Ginio ra konoon parasa' am poyo konoon ra bokon ondo' pinakai ri Paulus inibit ra ulun mangarualan. Maruol nilai pana nairu' am riwato pana pinagiru' intor risilo. 13Mokoondo' poyo kukula' ngaulun ru Jaudi ondo' mangkiralan ra ati ayuk intok koson mampagiru' ra riwato intor ra ulun sinubol. Ilo pana nangkinam mampagiru' ra riwato ralalom inggalan ri Jisus, konilo ra riwato, “Ralalom inggalan ri Jisus ondo' pabalaan ri Paulus no, pagiruon tokou!” 14Ondo' nampasauk raginio am tulu' ngaulun ungkuyon sangkaaka', anak ru sangulun Tingganai Maayo Imam Jaudi makainggalan ri Skiwa.

15Kaa' taam boo riwato no risilo, “Nakaulig aku ri Jisus am nakapandai aku niayuk ri Paulus, kaa' osoi guat akau ti?”

16Timinindak boo ulun sinubol ru riwato i am nambungkayut risilo ngai', saboi nangapilat am nagibabaang ilo nagiru' intor ra baloi ru ulun i. 17Ngaangai' ulun ru Jaudi am sala' ka Jaudi ondo' minayan ra Ipisus i nangalaa' paat ra ilo nokorongog ra nasauk i. Ginio ra inggalan ru Tuhan Jisus ti inompor poyo. 18Masuang ulun ondo' raino ti mangintopot ri Jisus nangiou ra saang ru ulun masuang ra kalaatan ondo' binaal nilo ragili. 19Ilo ondo' mapandai mangilong, nanimung ra buuk igigilaan nilo am solobo' ra saang ru ulun masuang. Logo ru ngaangai' buuk no mokoondo' lair limo ngoopor ngaribu ruit pirok.#ruit pirok: Sampila' ruit ru pirok iono gaji' songorou tayar ru sangulun mangngandoi (Ilai' ra Mat. 20:20). 20Kon raginio noyo ra bala' intor ra Tuhan#Kon raginio…Tuhan: kapoam Ginio ra mabaya' ra kuasa' ru Tuhan, bala' raginio. nakatabual poyo am masuang poyo boo ulun nangintopot ri Jisus.

Kumuliangi-angi ulun giu' ra Ipisus

21Kasauk ayuk ngaangai' raginio, makaguang i Paulus#makaguang i Paulus; kapoam: Ra tingganayon ru Ambiluo ri Aki Kapuuno', makaguang i Paulus. mongoi ra Jirusalim mansail ra Makidonia am Akaya, kono, “Mopongo aku mongoi ra giu', musiti' aku mongoi niayuk ra Roma.” 22Ginio ra, susubo' no ruo ngaulun mangingindangan riso, i Timotius am i Irastus, magulu mongoi ra Makidonia. Kaa' minayan io poyo ra kukula' buoi ra pagun Asia.

23Paat ragili, kumuliangi-angi ulun giu' ra Ipisus sabap ra pangilaan intor ri Jisus ti. 24Giu' ra bandar no, mokoondo' sangulun makainggalan ri Dimitrius, kandoi nano mambaal ra model kuil ru Dewi Artimis intor ra pirok. Masuang niayuk ruit moowot ru ulun mangandoi riso intor ra kandoi raginio. 25Ginio ra piawo' no ngaangai' ondo' mangandoi riso i, am poyo mangngandoi ra bokon ondo' nogondo' niayuk kandoi nilai am indagu, “Pabukat kau ngaangai'! Nakapandai kano ra intor ra kandoi raginio itakau makaalap ra ruit masuang. 26Raino nakito min am norongog min noyo galama' atan kia baalon ri Paulus ti. Mindagu io ra atan ayuk sinungkalalaing ondo' baalon ru ulun, ginilo sala' ka Tuhan toojo. Masuang ulun nangintopot riso, sala' ka giti ayuk ra Ipisus ti, kaa' maar makai' pagun Asia ti poyo. 27Ginio kalaanin takau raino ti, sabap ra maaru' kondoyon takau kalaatin ru ulun. Sala' ka ginio ayuk, kaa' kuil Artimis niayuk kalo boo urumaton ru ulun am katulayan nano lumiot – kabalu' pana sambaan io ru ngaangai' ulun giti ra Asia am ngaangai' pagun ru tana' ti!”

28Korongog nilo ragu ri Dimitrius i, siminangit am golok ilo, “Katulai noyo i Artimis, dewi ru ulun Ipisus!” 29Kumuliangi-angi boo ulun ra ngaangai' ru bandar i. Ulun masuang namparakop niayuk ri Gayus am i Aristarkus, karuruo ti ulun Makidonia ondo' namparangan ri Paulus ralalom pangkiralanan nali. Ralaato' ilo boo ra stadium ru bandar i. 30Masaga' i Paulus sumunu' risilo, kaa' ulun Kristian nanginga' riso. 31Kukula' ngaulun tingganai ru pagun Asia no pana, ondo' rangan ri Paulus i, nambilin riso koson kalo mongoi ra stadium no. 32Kumuliangi-angi ulun ondo' timinimung ra stadium i. Mokoondo' giminolok koson ragitio am mokoondo' poyo bokon giminolok koson raginio, sabap ra kasuangan ru ulun ra giu' i kalo nakapandai ra kua guat tumimung ilo. 33Mokoondo' nangkara' ri Aliksandir ti namuun raginio, sabap ra io ti ondo' jinuulan ru ulun ru Jaudi ra saang ru ulun masuang. Ginio ra nangani' i Aliksandir ra ulun-ulun no ra pulanu maa' raginio mongkoror, am masaga' io mambala' risilo atan masauk. 34Kaa' pakapandai ilo ra io ti ulun ru Jaudi, pagagampan ilo nompogolok saboi ruo nganjam, konilo, “Katulai noyo i Artimis, dewi ru ulun Ipisus!”

35Pupus i sangulun tingganai ru bandar i nakapampalinos risilo. Indagu io, “Rongogo' min, ulun-ulun ru Ipisus! Ngaangai' ulun nakapandai ra bandar Ipisus ti ondo' magalung ra kuil ru Dewi Artimis ondo' maayo, am niayuk batu matulai ondo' naratu' intor ra limbowon. 36Kolondo' sangulun pana makaanggal raginio. Sabap raginio pongkoror kau ayuk am pai' kau jajajou. 37Inibit min poyo ulun-ulun ragitio ragiti, kabalu' pana ra kalo nantakou ilo intor ra kuil mino kapoam nagasab ri Artimis, dewi takau. 38Amon ru mokoondo' poyo panguwan ri Dimitrius am ulun mangngandoi riso no ra sasangulun, moonsoi salasayon nilo ayuk ra makama. Paat ra orou inaru' no moonsoi mongoi ilo ra makama am ginio salasayon ru akim ra giu' no. 39Kaa' amon ru mokoondo' kau poyo kitaakon ra bokon, moonsoi salasayon ginio ra saang ru tingganai mamagun ondo' inaru' noyo. 40Sabap ra atan ondo' nasauk ra orou raiti', itakau niayuk mauwan ra kumuliangi-angi. Kolondo' sasaban ru ginio polosoon takau.” 41Pakaindagu raginio, pinauli' no ulun-ulun no.

Currently Selected:

RINALATAN 19: TMT

Highlight

Copy

Compare