YouVersion Logo
Search Icon

Jon 2

2
Sisas heafna kigmog lasflam ogfuni
1Afa sambaga sinaini maia ikanaba Sisas heafna patalfuiag elim Galilina bite la apukena afa Kena kembig la auguna. Enanai yi el mungu angwafig flana asa ehem buyis fini. Afa Sisasna afag ehe gafa enag buyis yi blona.
2Afa ehengel Sisasim afa heafna patalfuiag elim esogoni og, “Au ambego kagelni buyis la.” Asa ehengel afuiagohna.
3Afa maia ehengelni wainbug awaienaba afa Sisasna afag ehem esona og, “Ehengelni wainbug awai.”
4Sisas esog, “Mia, magim ne ehengelni kinig mo ne kam sihinag? Hwaba mango kana was mo asa ka kikefum ambala pugufe afa enag osuba meyi fe.”
5Afa heafna afag gafugag elim sihini og, “Heafna mo sa nengel patalfu.”
6Afa Ju elni nihe enaig fane ahgaginim ofibi asa ninga bu la sugum asa ahgag. Afa enwesog la gohug sob muhla folfu fwai yi eba ninga sug sob. Enag sob eba kwaniagig yi enaig dram lofug.
7Afa Sisas gafugag elim sihini og, “Hwa sobni bu hefibi.” Asa enag sob sama memtog la pugui.
8Asa ehe ehengelim enaig esoni og, “Sa ne weti hefi buyisna alagim faiba sama ne nangui.” Asa ehengel enaig esini.
9Afa bu ati wainbug lofena asa bu yisna alag ne nanguna. Afa ehe mas anwenafena mo hanai ehengel flig. Afa gafugag el enam anwenafini afa mas sihini mo. Afa buyisna alag el angwafig asa flag enam awamonam ahkanam,
10asa sihiagena og, “Mungwali el enaig esini suialag wainbug gof mageni asa heafna mangau ningag ahgagini afa sumi ehe mingnag wainbug mageni asa enag mas suialag fena mo asa gof mageni. Asa ne fwina suialag wainbug ne kumuhlagim asa glau ne mangofen.”
11Afa enag kigmog Sisas gof ogfuna Kenana kembig la Galili provins ehe enaig esena. Afa enag kigmog heafna patalfuiag el ogfuni heafna wasneig eba fwina kwania feg asa ehengel ehem olug oningini.
12Afa Sisas, heafna alag i, sumineg i, afa patalfuiag el enag kembig fwahinim asa Kaperneam la mwakwalig augunam asa afuna.
Sisas Godna kwania lala elim lambaitifena
Matyu 21:12-13, Mak 11:15-17, Luk 19:45-46
13Afa Ju elni Pasova buyis muhla ofefenaba asa Sisas Jerusalem gam ikana.
14Afa ehe Godna kwania lala sefu ikanam nanguna el enanai yi enaig gafugafini kig lambifini afa kau, sipsip, afa twafig mageagifini. Afa mingnag el angoluwagna kig flifinim afa heafgelni kig mo ehengelim faigofena.
15Afa ehe nangunam maia enaig esinibi asa ehem olug kinig fena afa ehe we flanam sisim enana kuguaitifenam asa sis embem apuke afuiaminefena. Afa kig lambig elni sime waikefe kig nahgum labaitifena.
16Afa ehe twafig mage elim lagnana og, “Enag lambinam gwesim wanika. Nofeka kana Apina lalam maket lala lofug enaig esi.”
17Afa Sisasna patalfuiag el nangunim asa oningini autunam enag Godna mo ginofini eba enaig esog, “Ka oningig Godna lala sama suialag gofi asa enag oningig kana olug yi suwi lofug lagi. Afa ka oningig gwenam mungu fenag.”
18Afa Ju el Sisasim laginini og, “Ne magim enaig eseg. Enaig asa nimbiafna kigmog kagelim ogfuni asa kagel anwenafi God nem sawi fenag nem og enaig ese asa ne enaig eseg.”
19Afa Sisas wahigi sihini og, “Afa nengel hwa kwania lala bubugi aitifigba asa ka sambaga mungu osuna pese nimblafe.”
20Afa Ju el sihini og, “Atiaho, ne enaig esefe? Afa 46 yia kagelni saglag el hwa lalaba nimblig. Haiseg sa ne esog sambaga mungu osuna ka pese nimblafe?”
21Afa enag kwania lalam Sisas esonaba eba heafna eligim esona.
22Asa maia ehe lahanaba afa pese buihiana afa heafna patalfuiag el pese oningini enag mo ehe esona. Asa ehengel olug oningig Godna mo buk la gi afa oningig Sisasna mo eba nufunam.
23Afa maia Ju elni Pasova buyis ofefenaba Sisas Jerusalem la gafena. Afa el heafna kigmog nanguni asa kaksag el ehem olug oningig.
24Afa Sisas ehengelim anwenafenim asa mas muhlafeni mo.
25Afa ehe hefum ati anwenafeg ehengelni oningigim asa amban el mas ehem sihinai.

Currently Selected:

Jon 2: amn

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy