SAN MARCOS 4
4
Jesús ombojaanga omaetɨ vae re
(Mt 13.1-9; Lc 8.4-8)
1Jesús omboɨpɨ ye oporomboe ɨguasu jembeɨ pe. Jare jeta yogüeru oyemboatɨ jae oïa pe. Jáeramo oyeupi metei barco raɨ pe jare oguapɨ pɨpe.#Lc 5.1-3. Jare yatɨ vae reta ñogüɨnoi ɨguasu jembeɨ rupi. 2Jare Jesús omboe reta jeta mbaembae re ombojaanga reve. Jei chupe reta: 3“Peyeapɨsaka: Metei kuimbae omaetɨ vae oë omaetɨ. 4Omaetɨ yave, omoai temitɨ, jare amogüe oa tape rupi. Jayave yogüeru güɨra reta opa jou. 5Mbovɨ temitɨ oa itatɨ rupi ɨvɨ jetambaea pe. Kuae ɨmambae oë, mbaetɨ ɨvɨ jeta güɨnoi ramo. 6Ërei kuaraɨ jasɨ yave opa ipiru, japo matɨä ɨ́vɨkotɨ ojo ramo, otini. 7Ïru temitɨ oa yuu pɨte rupi. Jare yuu okuakuaa yave, opa oyuka jókuae temitɨ jare mbaetɨ ia. 8Ërei ïru temitɨ oa ɨvɨ kavi pe. Kuae reta okuakuaa kavi jare ia. Amogüe treinta jäɨ, amogüe sesenta jäɨ jare amogüe cien jäɨ.”
9Jayave Jesús jei chupe reta: “Oipota oyeapɨsaka vae, toyeapɨsaka kuae re.”
Maera Jesús oporomboe ombojaanga reve
(Mt 13.10-17; Lc 8.9-10)
10Jaeño ma oï yave, jókuae doce oiparavo vae reta jare ïru opɨta vae reta oparandu Jesús pe ombojaanga reve imiari vae re. 11Jayave Jesús jei chupe reta: “Amombeu ma peve Tumpa iporookuaía regua peikuaambae vae. Ërei ïru vae reta amboe ambojaanga reve. 12Kuae ayapo agüɨye vaerä oikuaa kavi, yepe tëi oecha reta, ërei mbaetɨ oecha kavi reta, yepe tëi oendu reta, ërei mbaetɨ oikuaa reta, agüɨye vaerä oyerova reta Tumpa kotɨ, iyoa reta oyemboai vaerä.”#Is 6.9-10.
Jesús omombeu kavi omaetɨ vae re oyembojaanga vae
(Mt 13.18-23; Lc 8.11-15)
13Jayave Jesús jei chupe reta: “¿Mbaetɨ pa peikuaa kuae ambojaanga reve chemiari peve vae mbae oipota jei vae? Jayave, ¿këraita pa peikuaa opaete ambojaanga reve chemiarita vae? 14Jókuae omaetɨ vae oyembojaanga ko ñee ikavi vae omoai vae re. 15Temitɨ tape rupi oa vae oyembojaanga ñee ikavi vae oendu vae reta re. Ërei oendu reta güire, jupiveiño Satanás ou opa oekɨ ipɨa güi. 16Jaeramiño vi jókuae temitɨ oñeotɨ itatɨ rupi vae, oyembojaanga ñee ikavi vae oendu rupive omboresive oyerovia katu reve vae reta re. 17Ërei kuae reta jókuae temitɨ japo matɨä ɨ́vɨkotɨ ojo vae jarembae ipiru rami ko. Jáeramo tembiporara reta ou chupe reta ñee ikavi vae jeko pegua yave, jupiveiño ogüɨapi reta. 18Jökoraiño vi jókuae temitɨ oa yuu pɨte pe vae oyembojaanga ñee ikavi vae oendu vae reta re. 19Ërei jae reta omboɨpɨ oyemoambeko ɨvɨ pegua mbaembae re, jare oyembotavɨ oipota oikokatu ramo, oipota rai vi güɨnoi vaerä jeta mbaembae. Jökorai opaete jókuae reta oyuka ñee ikavi vae, jare opɨta temitɨ iambae rami. 20Ërei jókuae temitɨ oa ɨvɨ kavi pe vae oyembojaanga ñee ikavi vae oendu vae reta re. Kuae reta güɨrovia jare amogüe treinta jäɨ, amogüe sesenta jäɨ jare amogüe cien jäɨ.”
Oñeomi vae oyekuaa ñotai ko
(Lc 8.16-18)
21Jayave Jesús jei chupe reta: “Mechero yaroike yave o pe, ngaraa ñañono mbae igüɨ pe, ani güɨrapembɨ igüɨ pe. Ñañono ko mechero jenda re.#Mt 5.15; Lc 11.33. 22Oime yave mbae oñeomi vae, oyekuaa ñotai ko. Jaeramiño vi oime yave mbae oyekuaambae vae, oyekuaa ñotai ko.#Mt 10.26; Lc 12.2. 23Oipota oyeapɨsaka vae, toyeapɨsaka kuae ñee re.”
24Jare jei vi chupe reta: “Peyemongeta kavi peendugüe re. Echa kërai mbae peyapo rupi oyeapota vi peve,#Mt 7.2; Lc 6.38. jare omoïruta vi peve. 25Echa güɨnoi vae pe oñemoïruta, ërei mbaetɨ güɨnoi vae güi, jókuae mbovɨ yae güɨnoi vae ave oñepɨ̈rota chugüi.”#Mt 13.12; 25.29; Lc 19.26.
Jesús ombojaanga temitɨ okuakuaa vae re
26Jare Jesús jei vi chupe reta: “Tumpa iporookuaía, metei kuimbae ojo omaetɨ vae rami ko. 27Yepe tëi kuimbae oke pɨ̈tu ñavo jare opüa ara ñavo. Jemitɨ oë jare okuakuaa, jare jae mbaetɨ oikuaa kërai ra okuakuaa vae. 28Echa temitɨ oë jaeiño ɨvɨ güi, tenonde iɨ, javoi avatikɨ, joko güi avati. 29Jare yagüɨye ma yave, iya oarɨvo. Echa oväe ma ara oyearɨvo vaerä.”#Jl 3.13.
Mostaza jäɨgüe
(Mt 13.31-32; Lc 13.18-19)
30Jare Jesús jei ye: “¿Mbae ra yambojaangata Tumpa iporookuaía re? ¿Mbae re ra yambojaangata? 31Yandepuere yambojaanga metei mostaza jäɨgüe re. Yepe tëi jäɨgüe michi yae opaete ïru temitɨ reta jäɨgüe ɨvɨ pe oï vae güi. 32Ërei oñeotɨ yave, okuakuaa, jare tuicha yae opaete ïru temitɨ metei año peguaño okuakuaa vae reta güi, jare tuicha jäka oyeapo. Jare güɨra reta oiko jese.”
Maera Jesús oporomboe ombojaanga reve vae regua
(Mt 13.34-35)
33Jeta körai Jesús omombeu ñee ikavi vae opaete vae reta pe ombojaanga reve, jae reta ipuereta oikuaa vae rupi. 34Jare mbaetɨi imiari chupe reta ombojaangambae reve. Ërei jemimboe reta pe oikuaauka kavi mbae oipota jei vae jaeiño ñogüɨnoi yave.
Jesús omokïrii ɨvɨtuai
(Mt 8.23-27; Lc 8.22-25)
35Jókuae ara kuaraɨ oike ma yave, Jesús jei jemimboe reta pe:
—Yaasa ɨguasu jovaicho kotɨ.
36Jayave jae reta oeya jeta vae reta, jare güɨraja Jesús jókuae barco raɨ oï pɨpe vae pe. Jare amogüe vae reta yogüɨraja vi jae ndive ïru barco raɨ reta pe. 37Ërei ou ɨvɨtuai tätagüe, jare ɨaparúa oñeñoña barco raɨ pe, jare ombosakambu pota ma. 38Jare Jesús oñemoäkandɨta oke oï barco raɨ juguai kotɨ. Jayave jae reta omomba jare jei chupe:
—¡Oporomboe vae! ¿Mbaetɨ pa reyandu opata ma ñamano vae?
39Jayave Jesús opüa, jare oñeengata ɨvɨtu pe, jei reve:
—¡Epɨta! ¡Eñemokïrii!
Javoi ɨvɨtu opɨta, kïrii ngatu opɨta. 40Jesús jei chupe reta:
—¿Maera pa pekɨɨye? ¿Mbaetɨño pa penoi mborogüɨrovia?
41Jare ipɨakañɨ yae reta reve, jei oyoupe:
—¿Mbae nunga kuimbae pa kuae? Ɨvɨtu jare ɨguasu ave oyapo jae jei vae.
Currently Selected:
SAN MARCOS 4: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
