SAN JUAN 17
17
Jesús oyerure jemimboe reta re
1Kuae jei ma yave, Jesús omae ara kotɨ jare jei: “CheRu, ara oväe ma. Che ndeRaɨ emboeteuka, che romboeteuka vaerä vi. 2Echa nde remee cheve mbaepuere anoi vaerä opaete re, amee vaerä tekove opambae vae opaete nde nemee cheve vae reta pe. 3Jare tekove opambae vae jae ko: Ndekuaa reta vaerä nde ko jae meteiño Tumpa añetete vae, jare che Jesucristo nde rembou vae.
4Che romboeteuka kuae ɨvɨ pe. Echa opa ma ayapo mbaravɨkɨ nde nemee ayapo vaerä vae. 5Ndei ɨvɨ oyeapo mbove aiko nde ndive yave ayemboeteuka ko. Jökorai añave chemboeteuka ye ndeɨpɨ pe.
6Amombeu ma nderegua kuae kuimbae reta nde remee cheve kuae oporogüɨroviambae vae reta ipɨte güi vae pe. Jae reta ndembae ko ërei remee cheve. Jae reta oyapo neñee jei vae. 7Jae reta oikuaa ma añave opaete nde remee cheve vae ou ko ndegüi. 8Echa che amombeu ma chupe reta ñee nde remee cheve vae, jare jae reta güɨrovia neñee. Oikuaa kavi che ayu ko ndegüi. Güɨrovia reta ma nde ko chembou vae.
9Ayerure ndeve jese reta. Mbaetɨ ayerure oporogüɨroviambae vae reta re. Ayerure ndeve nde remee cheve vae reta re. Echa jae reta ndembae ko. 10Opaete chembae ndembae ko, jare ndembae chembae ko. Jare che ayemboeteuka ma jese reta.
11Jare mbaetɨta ma aï kuae ɨvɨ pe. Ërei jae reta opɨtañota kuae ɨvɨ pe. Che ajata ma ndépɨri. CheRu Tumpa iyoambae, kuae remee cheve vae reta, eñovatu nderee re; yogüɨreko vaerä metei ramiño, yande metei ramiño yaiko rami. 12Che aiko jae reta ndive kuae ɨvɨ pe ramboeve, añovatu nderee re; remee cheve vae reta che añovatu jare mbaetɨ metei ave okañɨtei, jaeño jókuae ojo tai kañɨtei pe vae, Tembikuatía oyembopo vaerä.#Sal 41.9; Jn 13.18.
13Ërei ajata ma ndépɨri. Körai chemiari chupe reta ɨvɨ pe aiko ramboeve, jae reta oyerovia yae vaerä che ayerovia rami. 14Amombeu ma chupe reta neñee. Jare oporogüɨroviambae vae reta oñemotareɨ, echa jae reta ɨvɨ peguaä ramo, che rami. 15Mbaetɨ ayerure ndeve renoe vaerä kuae ɨvɨ güi. Ayerure ko ndeve reñovatu vaerä ikavimbae güi. 16Che mbaetɨ ko ɨvɨ pegua, jaeramiño vi jae reta. 17Eñono tee reta neñee añete vae rupi. Neñee ko jae añete vae. 18Nde chembou ɨvɨ pe. Jökorai vi che amondo kuae reta opaete ɨvɨ rupi. 19Kuae reta jeko pegua añeñono tee ma ndeveguarä, jae reta vi oñeñono tee vaerä neñee añete vae rupi.
20Kuae reta reñoä ayerure ndeve, ayerure ko ndeve kuae reta imiari vae rupi güɨroviata cheré vae reta re. 21Ayerure ndeve opaete jae reta yogüɨreko vaerä metei ramiño. Nde cheRu Tumpa, reiko che ndive meteiño, jare che nde ndive. Jaeramiño vi jae reta toyogüɨreko metei ramiño vi yande ndive, ɨvɨ pegua reta güɨrovia vaerä nde ko chembou vae. 22Nde mbaemboete remee cheve vae, amee vi chupe reta, jae reta yogüɨreko vaerä metei ramiño, yande rami. 23Che aikota jese reta jare nde cheré, yogüɨreko vaerä metei ramiño kavi, ɨvɨ pegua reta oikuaa vaerä nde ko chembou vae jare nde reaɨu ko kuae reta nde cheraɨu rami vae.
24CheRu, aipota kuae remee cheve vae reta yogüɨreko vaerä vi che aikoa pe, oecha vaerä mbaemboetea remee cheve vae. Echa ndei ɨvɨ oyeapo mbove nde cheraɨuño mai. 25CheRu jupi vae, oporogüɨroviambae vae reta mbaetɨ ndekuaa. Ërei che rokuaa, jare kuae reta oikuaa nde ko chembou vae. 26Che romombeu ma chupe reta jare romombeu yeta, jae reta oaɨu vaerä ïru vae reta nde cheraɨu rami, jare che etei aïta jese reta.”
Currently Selected:
SAN JUAN 17: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.