MATHI 19
19
Bangbü Shangabü Jisuei Lenbü
(Mk 10.1-12)
1Ladang Jisuei khübü ngühlau thonkei, haoei Galil apyojung Jordan thidanga kibü Jihuda kaophei to loukei. 2Mütshang yaang haophai sembei, hoba haoei haoen khünei maitikei.
3Farisi shuong hao jungto louan hao huonko phekei, “Bousuei den che shanga jembü yak sattijan sai?” 4Haoei jongaikei, “Püngla khangla Kümbouei khunak shousi bousu si yaksa kümbei, 5hoba haoei laukei, ‘Ho shangabüa bousuei haobou si haonyu apyolabü hoba haoyak to phenyoan kilabü, hoba ham chela yeilabü’ dogo kanei awe lo? 6Hibü penyi aying lausikei che. Hibü Mühghaüei ai chela shenyotia kho mütei abangtijan.” 7Haoenei hao to laukei, “Khülongaje satlabü le kuan sattiashi dogo aila Mosaei sakkukei?” 8Haoei haoen to laukei, “Kan maangpon kaangbü khoei Mosaei kan la jembü yak bangtila sakkukei; lausikei püngla khanglaje khei akitei. 9Ngei kan to lenda, asangalanbü to liman, aoyouei jembüyak sattian lubü yaksa lelaje, haoei asangalanbü shonda.” 10Hao eikshuongei hao to laukei, “Bousu jembü yak to kheinyu phenyoan ki yingalonga, chem akanbü ong khaibou.” 11Haoei haoen to laukei, “Mudonga aoyou la Mühghaüei kuan ki khübü to liman laubü ho pendouei thamje asungletenda; 12aishanga atje nyusema sungphatan bukbü müt kia, atje mütei sungphatbü kia, hoba atje Khuthük Sangle laüa jembü lolo sungphatbü la yeibü kia. Aoei thüklaje haoei lenbü ho sungletashi.”
Jisuei Nashou Hanbü shuong Haükubü
(Mk 10.13-16; Lk 18.15-17)
13Kheijinei hao ikei shangan welautila shanga nashou hanbü shuong hao jungto leibakei; lausikei haoen leibabü shuong to eikshuongei kaang hakkei.
14Lausikei Jisuei laukei, “Nashou hanbü shuong pho- yoashi. Haoen kü jungto loubü tethanget, aishanga Khuthük Sangle habü tegübü shangabü ki.” 15Haoei haoen to ikei shangkei hoba hao bangkei.
Keibü Heshoubou
(Mk 10.17-31; Lk 18.18-30)
16Müt che loukei hoba hao to laukei, “Lenbou, ponpen langkei hapla shanga ngei ai maibü kümla?” 17Haoei hao to laukei, “Ai maibü ki kho shangabü aila nyi kü to pheda? Maibüje che ong ki. No langkei to atmang sühalonga ngühkhüm shuong jungeiashi.” 18Haoei hao to laukei, “Laobou?” Jisuei laukei, “Nyi ühaitijan, Nyi asangalanbü ashonjan, Nyi akokjan, Nyi amlangbü aukabü akujan, 19Kabou si kanyu soumo hatashi; hoba Nyi kalepbou to jembü tegü sanoujan.” 20Heshoubouei hao to laukei, “Khübü pendou ngei jungeiakei; ngo toukei aiei aonkei?” 21Jisuei hao to laukei, “No penbüsoubü yeimang sühsije, hauashi, nyi kibü yakashi, hoba shalebü la kuashi hoba khuthüka kaibü nyaksinam kilabü; hoba kaiya, hoba küphai semashi.” 22Lausikei ladang heshoubouei kho laubü ditkei, hao ngangko ngaikei; aishanga haoei nyaksinam juong kikei.
23Jisuei hao eikshuong to laukei, “Ngühmaia ngei kan to lenda, keibü shuong shanga Khuthük Sangle to atla seklabü. 24Nyiboukei ngei kan to lenda, keibü mütei Khuthük Sangle to atlabü toje nidku khün danko ut shetlangbü sobou.”
25Eikshuongei kho ditjinei haoen aeibou maangpangkei hoba laukei, “Khülonga ao ong khümenla?” 26Jisuei haoen to chühkei hoba laukei, “Ho müt shanga athükaminlabü, lausikei Mühghaüei pendou thükkei.”
27Kheijinei Peterei laukei, “Kün shangabü lai? Künei pendou apyoan kaphai sembei. Khülonga künei ai hapla?” 28Jisuei haoen to laukei, “Ngühmaia ngei kan to lenda, Haanbü sanglea ladang Müteibü Shou jembü soneikangbü setshanga setlaje, kheijinei kan küphai sembü shuongei Israel phang anthüknyi mat jembo, setshang anthüknyia setlabü. 29Tokei, aoyouei chem yingasikei, jaisina yingasikei, nousina yingasikei, bou yingasikei, nyu yingasikei, shousi yingasikei, sekphai yingasikei kü nyen laüa apyoa, haoei saongao onko haplabü, hoba ponpen langkei phet phanlabü. 30Lausikei shaangbü dan juong phailabü, hoba phaibü dan juong shaanglabü.”
Currently Selected:
MATHI 19: CHANGBSI
Highlight
Copy
Compare
Share
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
