MATHI 17
17
Sonjeibü
(Mk 9.2-13; Lk 9.28-36)
1Chalou laknyet kian phaia Jisuei Peter, hoba Jakob, hoba haona Johan shongh suokbü che to leijung angkei. 2Hobaje hao haoen thedanga son jeian apbei; hoba haoeibü thenyek chanyu tegü haukei, hoba haoeibü neisimei ngesakbü tegü thupaian yeikei. 3Hobaje hao to joyoko Mosa hoba Elija haoen junga louphambei. 4Kheijinei Peterei Jisu to laukei, “Bunyubou, sen han maian kioua! Nyi maang- angsije ngei hanei dip sem lekho: ka shanga che, hoba Masa shanga che hoba Elija shanga che.” 5Haoei lautoua lailaibü sangmei cheei haoen yuklepbei, hoba sangmei ka ngüh cheei laukei, “Ho ngei sanoubü Jayangshou, ao to ngei maangshikda; kanei hao to ditashi.” 6Ladang eikshuongei kho ditkei, haoenei the khüman khüpetkei hoba aeibou hatkei. 7Jisu louan haoen to meitiko laukei, “Pienashi; tehüt!” 8Haoenei chühangtikei hoba Jisu to liman lubü aokei akitei.
9Haoen shongh ka louyenjinei Jisuei haoen to sakkuko laukei, “Müteibü Shou haibü ka alangngai shongko kanei hapbü ho aotokei telen.” 10Eikshuongei hao to phekei, “Aila Ngühkhüm lenbou shuongei Elija shaang loujan dogo lauda?” 11Haoei jongaikei, “Elija maimaitham loulabü hoba ajanjan pendou lamlean phokulabü. 12#Mal 4.5 Lausikei ngei kan to lenda, Elija louan apa, hoba haoenei hao ashen, lausikei haoenei hao to haoen maangangbü tegü kümbei. Kho tegütham Müteibü Shou haoen ikmanga khonkulabü.”
13Kheijinei eikshuongei haoei haoen to Johan Baptibou shangabü laukei dogo ditenkei.
Jisuei Shabü Souei Lapbü Nashou Che Maitibü
(Mk 9.14-29; Lk 9.37-43a)
14Ladang haoen shuong yoa sühlangkei, müt che hao jungto louan khüpetkei 15hoba laukei, “Yaangbou, kü shou to onoukei, aieilausi hao to auleshat bauakei hoba khonkuda; hao hanghangko wanmang to hoba deimang to tomatlangda. 16Ngei hao ka eikshuong jungto leibakei lausikei haoenei hao amaitien.” 17Jisuei jongaikei, “Kan maialembü hoba ayingbü meten! Ngo lalokche kan yoa kila? Ngei kan to lalokche natenla? Hao hato kü jungto leiba.” 18Jisuei shabü sou to kaang hakkei, hoba shabü sou hao ka longkei hoba nashou kho kheijineithama maian apbei. 19Eikshuong Jisu jungto sanshoua loukei hoba laukei, “Künei kho aiei shian asattien?” 20Haoei haoen to laukei, “Aieilausi kaneibü mailem yongko hanbü ka; aishanga ngühmaia ngei kan to lenda, kan to mailem yongkoshiklang tetche ongkei kisije, kanei shongh khüto, ‘Haka khüto kukashi,’ dogo laulabü, hoba kho kuklabü; kan shanga athükaminlabü ai akilabü. 21(Haibüje lubüei aying, lausikei welau si nyengbüei ong sattida.)”
Jisuei Hao Hailabü Shangabü Nyibou Laubü
(Mk 9.30-32; Lk 9.43b-45)
22Haoen Galila kijinei, Jisuei haoen to laukei, “Müteibü Shou mütshuongeibü ikmanga khümbo kuan aplabü. 23Haoenei hao haitilabü, hoba sembounyet hao langngailabü.” Hobaje haoen aeibou maang ngangkei.
Lembüchema Khümnam Atbü
24Ladang haoen Kapernaum to loukei, lembüchem khümnam hebü shuong Peter jungto louan laukei, “Kaneibü lenbouei lembüchem khümnam atda lao?” 25Haoei laukei, “Atda.” Ladang hao chem to lotkei Jisuei shaang laukei, “Simon, nyi ai damda? Kaodak Choba shuongei khümnam ka ao leda? Haoen shousi ka si küksithang ka?” 26Haoei jongaikei, “Küksithang ka.” Jisuei hao to laukei, “Khülongaje shousi kho solo. 27Lausikei senei hebütakbü shuong aphaiyettilabü, hibü yungnyu to hauashi, yaüjin attiashi hoba shaang minbü ngau kho sungenashi; hoba khoeibü sembung kekan chühashi hoba nyi sempak che haplabü. Kho jungan hauan seti shanga atashi.”
Currently Selected:
MATHI 17: CHANGBSI
Highlight
Copy
Compare
Share
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
