Aŵaloma 6
6
1Mbatulaŵile syani lomba? Kani twakulukwikele mukuŵifya ati uluse ŋgalukafule? 2Ifyo tefyo! Fweŵo, fwetwafwilile kukuŵifya, mbasyani twakulukwikele-mo nasimbi insiku? 3Kani tamwisi ati fweŵo fwense, fwetwaŵatisiwe muli ŵaKlistu Yesu, twaliŵatisiwe mumfwa yaŵo? 4Pakuti pali fyefyo twalisicilwe pamo naŵo pakuŵatisiwa mumfwa; ati koti nifyopele'fyo ifi ŵaŵusiwe ŵaKlistu pakati kaŵafwile, pakuti paŵuleme bwaŵaWisiŵo, nafweŵo fyopele'fyo tukesiŵe ukwenda mufyaŵukumo ifyaMweo. 5Pakuti fweŵo kani tulikumaŋkene nekupalana kwamfwa yaŵo, tukakumaŋkana kaŵili nekuŵuka kwaŵo. 6Twisiŵe'fi ati uŵuntu bwesu ubwakale bwalitalicilwe pamo naŵo, ati umuŵili wakuŵifya ufumisiwe; twiŋgekala li ŵili muli ŵukaili bwakuŵifya. 7Pakuti uyo uwafwile alikakulucile kukuŵifya. 8Sombi tulukucetekela ati, kani twalifwilile pamo naŵaKlistu, tukalukwikele nemweo kaŵili pamo naŵo. 9Tuliisi ati ŵaKlistu, ili ŵaŵusiwe paŵafwile, taŵakafwa-po liŵili, koku; imfwa taisi ukuŵakomeka liŵili. 10Pakuti imfwa iyo iyi ŵafwile, ŵalifwilile limo kukuŵifya; sombi umweo uyo uyu ŵekala nawo, ŵalekala nawo kuli ŵaLesa. 11Koti nifyopele'fyo namweŵo ŋgamulukulieŵa ati tuli ŵafwile kukuŵifya, sombi ŵalaŵi kuli ŵaLesa muli ŵaKlistu Yesu.
12Pakuti pali fyefyo tekusumina ati ukuŵifya kukomeke imiŵili yenu iisi ukufwa, mwiŋgatumikwa kukukumbwa kwakuko; 13kaŵili tekufiposa kukuŵifya ifileŵa fyamiŵili yenu, mukucite'milimo isendeme; sombi muJipose kuli ŵaLesa, koti ŵalaŵi aŵafumine kuŵafwile, nekuposa kuli ŵaLesa nefileŵa fyamiŵili yenu mukucite'milimo iluŋgeme. 14Pakuti ukuŵifya takukamukomekeni; pakuti mweŵo tamukomekwa kumafunde, sombi nikuluse eko mukomekwa.
15Popele syani? Kani twakuŵifya pakuti tatukomekwa kumafunde, sombi nikuluse eko tukomekwa? Ifyo tefyo! 16Tamwisi ati, pakuliposa kumuntu koti ŵasya mukutumikwa kuli ye, muli ŵasya ŵawoyo kuli ye eko mutumikwa; kani ŵasya ŵakuŵifya ukulete'mfwa, kani ŵakutumikwa ukuleto' kuluŋgama? 17Sombi tukuluŵatota ŵaLesa, pakuti, naŋgawa ati mwali ŵasya ŵakuŵifya, mwalisumine nemitima yenu yonse ukutumikwa kuŵusambisi umukoka uyo uyu mwasambisiwe-mo. 18Peŋka, ili mwakakulucile kukuŵifya, mwaliŵele ŵasya wakuluŋgama. 19Ndukulawila ifyaŵuntunsi pakuti pakunaka kwamiŵili yenu; pakuti koti nifyopele'fyo ifi mwafiposele ifileŵa fyamiŵili yenu koti ŵasya ŵaŵumbifi neŵakupulaisya ati fipulaisye, fyopele'fyo naŵukumo ŋgamufipose ifileŵa fyamiŵili yenu ati ŵasya ŵakuluŋgama ati fiswete. 20Pakuti, ili mwali ŵasya ŵakuŵifya, mwali ŵanaŵaŵene pakwewo'kuluŋgama. 21Mbafisa-fisepo ifi mwali nafyo impindi iyo mufintu ifyo muli fyefyo emo muli nensoni ŵukumo? Pakuti ukupela kwafintu ifyo nimfwa! 22Sombi ŵukumo, ili mukakulucile kukuŵifya nekuŵa ŵasya ŵaŵaLesa, muli nefisepo fyenu ifileto'kusweta, nekupela nako Mweo wamuyayaya. 23Pakuti ukulambulwa kwakuŵifya nimfwa; sombi impese yaŵaLesa iyakupa lukoso Mweo wamuyayaya muli ŵaKlistu Yesu ŵaSikulu ŵesu.
Currently Selected:
Aŵaloma 6: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
