Aŵaloma 5

1Lomba, pakuti tulilunjicilwe kukucetekela, ŋgatwikale neŵutende naŵaLesa pakuti pali ŵaSikulu ŵesu Yesu Klistu; 2muli ŵo kaŵili fweŵo twalipokele kukucetekela impalaminino kuluse ulu twimakanine-mo; kaŵili ŋgatusembe pakucetekela muŵuleme bwaŵaLesa. 3Kaŵili ifyo fyeŋka tetyo, sombi ŋgatusembe namufyakutukululusya nafyo: ili twisiŵa ati ukukululuka kulaleŋge'mitimanteka; 4nemitimanteka nayo ilaleŋga amekalilo aisiŵilwe; nemekalilo aisiŵilwe nao alaleŋga ulucetekelo; 5nelucetekelo nalo talutuleŋgele'nsoni, Pakuti uŵutemwe bwaŵaLesa bwaliitulucile monse monse mumitima yesu kuMupasi Uswetelele uwapelwe kuli fweŵo. 6Pakuti ili tucinacile, pampindi ielelwe ŵaKlistu ŵaliŵafwilile aŵalukupufya ŵaLesa. 7Pakuti kulikatesye ukuŵona uŋgamufwila umuntu uluŋgeme; sombi cipale umbi aŋgakosyo'mutima wakwe ukumufwilo'muntu uweme. 8Sombi ŵaLesa ŵalukulanjisya uŵutemwe bwaŵo aŵene ubwakuli fweŵo, pakuti ili tucili ŵumbifi, ŵaKlistu ŵalitufwilile. 9Tanje cine lomba, ili tulunjicilwe ŵukumo kumilopa yaŵo, tukapuluka kuŵukali bwaŵaLesa pakuti pali ŵo. 10Pakuti, ili tucili ŵakupatwa, kansi twalilamwininwe kuli ŵaLesa pakuti pamfwa yaMwana ŵaŵo, tanje cine, ili tulamwininwe, tukapuluka pakuti pamweo waŵo. 11Ifyo fyeŋka tefyo, sombi kaŵili tulukusemba muli ŵaLesa, pakuti pali ŵaSikulu ŵesu Yesu Klistu, pakuti pali ŵo epo tupokele ŵukumo ukulamwinwa.

12Pakuti pali fyefyo, fili koti nififi ati: pakuti pamuntu umo, ukuŵifya kwaliinjile mucalo capansi, nemfwa nayo pakuti pakuŵifya; popele apo nemfwa yalikumene kuŵantu ŵonse, pakuti ŵonse ŵaliŵifisye. 13Pakuti, ili taaŋgaŵa'mafunde, emo kwali ukuŵifya mucalo; sombi ukuŵifya takwebwa-po apakuŵula'mafunde. 14Naŋgawe'fyo imfwa yalikomekele aŵantu ukufuma kuli Adama, ukufika nakuli Mose, nekukomeka naŵaŵo aŵataŵaŵifisye koti mekalilo akupulaisya kwakwe Adama, uli kesiŵilo kaŵaŵo aŵasimicilwe ati ŵakesa. 15Sombi impese yaluse taipalene nekupulaisyo'ko. Pakuti, kani pakupulaisya kwamuntu umo aŵenji ŵalifwile, tanje cine uluse lwaŵaLesa, nempese iyakuluse lwaŵantu ŵamo, ŵaYesu Klistu, fyalifulile kuŵenji. 16Kaŵili impese taipalene nafyefyo ifyaletelwe kukuŵifya kwamuntu umo; pakuti ukusololola, ukwaisile pakuti pamuntu umo, kwaliletele ukusinina; sombi impese iyakupa lukoso, iyaisile pakuti pakupulaisya ukwinji, yaliletele ukulunjika. 17Pakuti, kani pakupulaisya kwamuntu umo, imfwa yaliŵele neŵufumu pakuti pali woyo umo; tanje cine aŵo aŵapoka ukufula kwaluse nekwampese yakuluŋgama eŵakaŵa neŵufumu mumweo pakuti pali ŵaŵo ŵamo, ŵaYesu Klistu. 18Popele koti nifyopele'fyo ifi fyaisile kuŵantu ŵonse ukuleto'kusinina, pakuti pakupulaisya kumo; fyopele'fyo fyaliisile kuŵantu ŵonse ukuleto'kulunjika ukwakumweo, pakuti pakucita kumo ukuluŋgeme, 19Pakuti pakupulaisya kwamuntu umo aŵenji ŵaliŵele ŵakuŵifya, fyopele'fyo, pakuti pakutumwa kwaŵantu ŵamo aŵenji ŵakaŵa waluŋgeme.

20Peŋka amafunde aliisile kaŵili, ati ukupulaisya ŋgakufule: sombi apo, apafulile ukuŵifya, tanje cine uluse lwalifulile ukwakuti; 21ati koti nifyopele'fyo ifi kwakomekele aŵantu mumfwa ukuŵifya, fyopele'fyo neluse ŋgaluŵakomeke kukuluŋgama ukuficilo'Mweo wamuyayaya muli ŵaYesu Klistu ŵaSikulu ŵesu.

Currently Selected:

Aŵaloma 5: AAL59

Highlight

Copy

Compare