Aŵaloma 12

1Pakuti pali fyefyo, mweŵakwasu, ndukumukombeteleni, pakuti paŋkumbu syaŵaLesa, ati mupose imiŵili yenu milambu ilaŵi, iswetelele, impokelelo kuli ŵaLesa; pakuti ifyo kupyunjila kwenu ukwamano. 2Kaŵili tekupalana neŵampindi ino; sombi musaŋguke pakuŵuka liŵili imilaŋgwe yenu, ati mwisiŵe bwino ukufwaya kwaŵaLesa ukuweme ukwampokelelo, ukwakuwaminina.

3Pakuti ndukumuŵuleni mweŵo mweŵantu mwense, pakuti paluse ulwapelwe kuli neŵo, ati: Tekulieŵa ukulicindika ukwakucila napafyelelwe; sombi ukulaŋguluka kamulaŋguluka nekutekanya, koti nifyopele'fyo ifi ŵaŵapele ŵonse ŵaLesa ifyakwesya ifyakucetekela. 4Pakuti koti nifyopele'fyo ifi tuli nefileŵa ifinji mumuŵuli umo, nefileŵa ifyo fyonse tafikwete umulimo umo, koku; 5fyopele'fyo nafweŵo, fwetuli ŵenji, tuli muŵili umo muli ŵaKlistu; sombi pakutweŵa umo umo, tuli fileŵa ifyamuŵili ifyana-fyaŋkasi. 6Sombi kaŵili, pakuti tuli nemano apusene koti luse ulo ulwapelwe kuli fweŵo, kani amano ayo akusimika, uyo ŋgaasimike koti kucetekela kwakwe; 7kani akupyunjila ŵaLesa, uyo ŋgaapyuŋge icine; uwakusambisya, ŋgaasambisye icine; 8uwakucenjesya, ŋgaacenjesye icine; uwakupela, ŋgaapele neŵupe; uwakwikalika aŵaŵyakwe, ŋgaaŵekalike nemuŋkonsya; uwakucite'ŋkumbu, ŋgaacite nekusaŋgalala.

9Uŵutemwe ŋgabwikale bwakuŵulo' kutumpaika. Mufikanamine ifiŵipile; mufiikatisye ifiweme. 10Ifyakutemwa aŵakwanu, kamutemwansyanya; ifyaŵuleme kamutotansyanya; 11ifyamuŋkonsya tekufilwa; kamwiŋgana mumitima; kamupyunjila ŵaSikulu; 12kamusemba ili mucetekela; kamuteke'mitima yenu, pakulukukululuka; kamulukukosya ukulukutembela; 13kamuŵofwa-ko aŵaluŋgeme ukupeŋga kwaŵo; kamuŵateŵeta bwino aŵensu. 14Ŵacindikeni aŵo aŵamukululusyeni; kamucindika, tekufiŋgal 15Mulukusemba naŵaŵo aŵalukusemba, nekulukulila naŵaŵo aŵalukulila. 16Kamusuminansyanya. Tekulukulaŋguluke' fyaŵuleme, sombi mulicefye ati mulaŋguluke ifintu ificepele. Tekulitota ati tuli ŵamano. 17Tekuŵabwesesye'fiŵipile aŵantu ŵonse neli umo. Kamufilaŋguluka ifintu ifiluŋgeme pamenso aŵantu ŵonse. 18Kani ifyo tekukaŋga, koti nifyopele'fyo ifi mwisi, ikaleni neŵutende neŵantu ŵonse. 19Tekulicitile' milandu, mweŵo mwentemenwe, sombi mucileke ukufitwa; pakuti palilembelwe ati: ŴaSikulu ati: Ukubwesye'milandu kwanji; neŵo eneŋkalambula. 20Sombi umupate woŵe, kani ali nensala, ukamuteŵete; kani ali necilaka, ukamupele ukunwa; pakuti, pakulukucite'fyo, ukalukuwuŋganya pamutwi wakwe amakalasi amulilo. 21Tekukomekwa kukuŵifya; sombi ukukomeke ukuŵifya kufiweme.

Currently Selected:

Aŵaloma 12: AAL59

Highlight

Copy

Compare