Aŵaloma 11

1Ndukulaŵila lomba ati: Kani ŵaLesa ŵalitamfisye aŵantu ŵaŵo? Ifyo tefyo! Pakuti naneŵo ndi muIsilaeli, uwaŵana ŵakwe Ablaamu, uwacikoto cakwe Benjamini. 2ŴaLesa taŵatamfisye aŵantu ŵaŵo aŵa ŵaisiŵile limo. Kani tamwisi ifyo ifi alaŵile amalembo ifyakwe Elaija? ifi akombetele kuli ŵaLesa ukuŵaŵifya aŵaIsilaeli, ati: 3MweŵaSikulu, ŵaliŵepeye aŵakusimika ŵenu, nekuwisya ifyonto fyenu ifyamilambu; popele neŵo neŋka nasyalapo; kaŵili ŵalukumfwaya-fwaya mukunjipaya. 4Sombi ukwasuka kwaŵaLesa kwalilaŵile syani kuli ye? Ati: Ndililamine aŵantu amasausande asanu naaŵili, awatawaŋgafukamina kuli Bala.

5Koti nifyopele'fyo naŵukumo ŵuno, paliŵele aŵakusyala-po, koti kusalulula kwaluse. 6Sombi kani ukusalululo'ko kuli kwaluse, takuli naŵukumo kwamilimo; pakuti, kani ifyo tefyo, uluse taluli luse naŵukumo. 7Mbasyani lomba? Ifyo ifi ŵalukufwaya aŵaIsilaeli, fyopele taŵabwene-po; sombi aŵasalulwilwe ŵalifibwene; naŵo aŵasyele-po ŵalikosiwe mumitima yaŵo: 8koti nifyopele' fyo ifilembelwe ati: ŴaLesa ŵaliŵapele umupasi wakusipula, nemenso ŵeŋgaŵona, nematwi ŵeŋgomfwa, ukufika nakukasuŵa kalelo. 9Kaŵili Dafidi alilaŵile ati:

Icitenje caŵo icakulya ŋgaciwe cakuŵateya nekuŵekata,

Cakuŵatutula nekuŵalambula;

10Amenso aŵo ŋgaafite ŵeŋgaŵona;

Namweŵo mulukuŵenamisya insiku syonse.

11Popele neŵo ati: Kani ŵalilitutwile ati ŵawe? Ifyo tefyo! Sombi pakuti pakuwa kwaŵo, ukuŵapulusya kulificile kuŵenafyalo, mukuwaleŋgela aŵaIsilaeli icikani. 12Popele kani ukuwa kwaŵo kwaliletele amaŵoni kuŵantunsi ŵonse, nekupeŋga kwaŵo nekuleto'ŵuŵoni kuŵenafyalo, tanje cine ukuŵila kwaŵo kukacite'fyo!

13Sombi ndukulaŵila kuli mweŵo, mweŵenafyalo. Ninentanjisi yaŵenafyalo, pakuti pali fyefyo, ndukulemya uŵupyunjisi bwanji; 14ati njisiŵe cipale ukuwaleŋgele'cikani aŵena ŵanji, mbapulusye ŵambi. 15Pakuti kani ukuŵatamfya kuliŵele kulamwina kwaŵantunsi ŵonse, mbokuŵapoka liŵili kukalukuŵe'ndo? Temweo uŵucile paŵafwile? 16Popele kani icamutulu caŵusuŋga ciliswetelele, fyopele'fyo newusuŋga ŵonse; kaŵili kani umusyu uliswetelele, fyopele'fyo nefinsokela.

17Sombi kani ifinsokela fimbi filikonwenwe, naweŵo, welyolife ilyamumpaŋga, nekulundanikwa-po pakati pali fyo, nekulukwaŵana nafyo umusyu nemafuta alyolife; 18tekulukulitotela pafinsokela. Sombi kani ulukulitota, toli niweŵo ulukupinto'musyu, sombi musyu eulukukupinta weŵo. 19Wakulaŵila lomba ati: Ifinsokela fyalikonwenwe, ati neŵo ŋgandundaniwe. 20Cine: pakuti pakuŵulo'kucetekela ifyo fyalikonwenwe; sombi weŵo, pakuti pakucetekela koŵe, uliimakene. Tekulicindika! Ulukutina! 21Pakuti ŵaLesa, kani taŵalekele ifinsokela ifyacifyalilo, utine ŵeŋgaŵulo'kukuleka naweŵo. 22Uŵone lomba Iŋkumbu nelukansa lwaŵaLesa! Kuli ŵaŵo aŵawile lukansa; sombi kuli weŵo niŋkumbu syaŵaLesa, kani ulukwikalilila muŋkumbu syaŵo; sombi kani tekwikala, naweŵo ukapinikwa. 23Nakaŵili nafyefyo nafyo, kani tafilukwikalilila mukukanika kwafifyo, fikalundanikwa; pakuti ŵaLesa ŵaliisi ukufilundanya liŵili. 24Pakuti mweŵo, kani mwalipinicilwe kuli ceco icafyelwe lyolife ilyamumpaŋga, nekulundanikwa kulyolife iliweme ukutakuli cifyalilo; tanje cine nafifi, ifili finsokela ifyacifyalilo, fikalundanikwa kulyolife lyafifyo ifine.

25Pakuti, mweŵakwasu, mwiŋgesakulitota ati tuli ŵamano, nsilukufwaya ati mwikale ŵakuŵulo'kwisiŵa icamfiso ici, ati ukukosa ukwamumitima kuliisile kuŵaIsilaeli ŵambi, mukwikala ili takuŋgafika ukukumana kwaŵenafyalo; 26popele apo aŵaIsilaeli ŵonse ŵakapuluka, koti nifyopele'fyo ifilembelwe ati:

Akesa ukufuma muSayoni uwakupulusya;

Ukuŵapufya ŵaLesa akakwalula ukukufumya kuli Yakobi:

27Kaŵili uku ekulayana kwanji naŵo,

Ili ŋkaŵafumisya ukuŵifyakwaŵo.

28Pakweŵa Iceŵo leiweme, aŵo ŵali ŵafitilwe pakuti pali mweŵo; sombi pakweŵa ukusalulula, ŵali ŵatemiwe pakuti pali ŵawisiŵo. 29Pakuti impese syaŵaLesa nekwita kwaŵo tafibwelelwa.

30Pakuti, koti nifyopele'fyo ifi mwapulaisye akale kuli ŵaLesa, sombi ŵukumo mulipokele iŋkumbu pakuti pakupulaisya kwaŵaŵo, 31fyopele'fyo naŵaŵo naŵo ŵalipulaisye ŵukumo, ati ŵesiŵe ukupoke'ŋkumbu, pakuti paŋkumbu isyo isyacitilwe kuli mweŵo. 32Pakuti ŵaLesa ŵaliŵesalile aŵantu ŵonse mukupulaisya, ati ŵesiŵe ukuŵacitile' ŋkumbu ŵonse.

33Ele! Uŵutali bwaŵuŵile bwamano nekwisiŵa kwaŵaLesa! Ukusololola kwaŵo kulipelelele, nensila syaŵo tekusilondolosya! 34Pakuti mbaninani uwaisiŵile amano aŵaSikulu? Mbaninani uwali nimpemba yaŵo? 35Mbaninani uwatanjile ukuŵapela akantu, ati ŵakamubwesesye? 36Pakuti ifintu fyonse filafuma kuli ŵo, nekwikala muli ŵo, nekuya kuli ŵo. Kuli ŵo ŋgaŵuŵe uŵuleme insiku syonse lukoso! Ameni.

Currently Selected:

Aŵaloma 11: AAL59

Highlight

Copy

Compare